Dyrektar Jastrambielskaj kadeckaj vučelni prabačyŭsia pierad Mikitam Hvoździevym za adličeńnie i prosić viarnucca

Na minułym tydni čaćviora navučencaŭ Bresckaj abłasnoj kadeckaj vučelni ŭ Jastrambieli (Baranavicki rajon) vykłali ŭ internet svaje fota ŭ majkach z «Pahoniaj» pad uniformaj.

Što takoje kadeckaja vučelnia? Heta napaŭzakrytaja škoła, dzie dzieci žyvuć i vučacca amal pa vajskovym statucie z 8 pa 11 kłasy.

Karystacca mabilnym tam možna tolki paru hadzin u śpiecyjalna adviedzienyja dni, z kampjutaram — toje samaje.

Vypuskniki «kadetki» majuć prava pastupać u vajskovyja VNU biez zdačy CT, kali adznaki ŭ vučnia vyšejšyja za 7 bałaŭ pa ŭsich pradmietach.

U kadeckich vučelniach taksama vučacca i dziaŭčaty. Heta daje im pieravahu pry pastupleńni ŭ Akademiju MUS.

Z baćkami navučency bačacca redka, raz na tydzień. Za dobryja pavodziny ci peŭnyja pośpiechi možna atrymać dazvoł źjeździć dadomu na vychodnych.

Hetym i tłumačycca toje, što ŭsia infarmacyja ź Jastrambiela była ŭryŭkavaja, časam supiarečlivaja. 

U hetuju «škołu» nielha prosta tak zajści i pahutaryć z nastaŭnikami. Na ŭvachodzie staić KPP, a ŭ budynkach arhanizavanyja pasty z navučencaŭ, jakija dakładvajuć svaim kurataram pra tych, chto ŭvachodzić.

Sami ž dzieci vielmi zapałochanyja: kali ja ŭčora byŭ u Jastrambieli, to kadety vykazvalisia ŭ duchu «my nie razumiejem, pra što vy, a kali i razumiejem, to havaryć nie budziem».

Dyrektar taksama ad žurnalistaŭ chavaŭsia. Z doma zamiest jaho vyjšła jahonaja žonka z sabačkam na rukach i paprasiła nie turbavać.

Bolš raźniavolena navučency kantaktavali ŭ sacyjalnych sietkach. U tym ža «Kantakcie» amal usie kadety padpisanyja niesapraŭdnymi imionami (hieroi fota z «Pahoniaj» taksama»), tamu i adkaznaść za svaje słovy tam adčuvajecca mienš.

Adnakłaśniki chłopcaŭ z fota z «Pahoniaj» raspaviali, što ŭ toj ža dzień, jak zdymak źjaviŭsia ŭ «Našaj Nivie», pra heta stała viadoma administracyi.

Dyrektar vučelni Alaksandr Kalko, maŭlaŭ, byŭ prosta raźjušany — prajšło ŭsiaho tolki paru dzion ad vybaraŭ, a jahonyja navučency vykładajuć u internet fota z «Pahoniaj». Mahčyma, jon bajaŭsia, što ŭ niełajalnaści abvinavaciać jaho samoha. Voś i padniali buču. U škołu navat vyklikali milicyju. Adnak tyja admovilisia zajmacca spravaj, nie vartaj vyjedzienaha jajka — parušeńnie formy adzieńnia.

Paśla chutkaha razboru dyrektar dabiŭsia pryznańnia, chto vykłaŭ fota ŭ internet — heta chłopiec Mikita Hvoździeŭ, jaki na fatazdymku druhi sprava. Uviečary ŭ piatnicu «Hvozd» — takaja ŭ jaho mianuška miž kadetaŭ — zajšoŭ da svaich adnakłaśnikaŭ raźvitacca. Jamu paviedamili pra adličeńnie.

Los astatnich taksama byŭ niapeŭny — dyrektar vučelni nakazaŭ baćkam chłopcaŭ «rychtavacca» da adličeńnia.

Ale infarmacyja pra represii suprać kadetaŭ pajšła ŭ ŚMI. U krainie pačała razhortvacca akcyja padtrymki małych patryjotaŭ Biełarusi z teham #Pahoniapobač. Svaje foty razam z nacyjanalnym biełaruskim hierbam vykłali tysiačy ludziej, u padtrymku chłopcaŭ vykazałasia Nobieleŭskaja łaŭreatka Śviatłana Aleksijevič, nazvaŭšy tych «sapraŭdnymi aficerami» u budučyni. U Jastrambiel źjechalisia karespandenty.

Pakarańnie školnikaŭ-kadetaŭ za biełaruski patryjatyzm nahadała hramadstvu zmročnyja hady inšaziemnych akupacyj.

Adnakłaśniki Mikity kažuć, što dyrektar vučelni zabraŭ nazad svaje słovy pra adličeńnie troch chłopcaŭ. Kadety taksama raskazvajuć, što dyrektar vybačyŭsia pierad Mikitam Hvoździevym i jahonymi baćkami za rezkuju reakcyju i prasiŭ chłopca viarnucca ŭ Jastrambiel. Ale pakul Mikita nie viarnuŭsia — chłopcy miarkujuć, što jon jašče sam uzvažvaje, ci varta.

Zavuč škoły taksama paćviardžaje, što «ŭsie chłopcy vučacca», «tolki Mikitu baćki zabrali pa zajavie na vychodnyja. Učora patelefanavała mama i papiaredziła, što jon na daviedcy, tamu što kiepska siabie adčuvaje».

Jak raskazali «Našaj Nivy» adnakłaśniki, Hvoździeŭ pachodzić sa Staŭbcoŭskaha rajona, ź siamji vajskoŭca.

Siońnia a 16-j hadzinie maje adbycca pastrajeńnie ŭsioj vučelni, dzie, mierkavana, da ŭsich kadetaŭ daviaduć vysnovy z hetaj historyi.

Prajšła infarmacyja, što pakarańniem dla non-kanfarmistaŭ stanie pazbaŭleńnie zvalnieńnia za parušeńnie ŭstanoŭlenaj formy adzieńnia.

«Pahonia» — heta viadomy z kanca CHIII stahodździa staražytny hierb Biełarusi. Čamu «Pahonia»? Tak nazyvaŭsia vysakarodny zvyčaj, pašyrany ŭ našych ziemlach. U vypadku raptoŭnaha nalotu vorahaŭ — voś nalacieli čužyncy, schapili kaštoŭnyja rečy i dziaciej u pałon — usie mužčyny, jakija mahli trymać zbroju, siadali na koniej i pieraśledavali zachopnikaŭ, kab vyzvalić zabranych suajčyńnikaŭ.

Vyjavaj «Pahoni» ŭpryhožanyja ŭsie dziaržaŭnyja dakumienty tahačasnaj Biełarusi, staronki «Mietryki» i «Statutaŭ». U 1918-m «Pahonia» stała dziaržaŭnym hierbam Biełaruskaj Narodnaj Respubliki — pieršaj niezaležnaj biełaruskaj dziaržavy. U 1991—1995 jana była pieršym dziaržaŭnym hierbam RB. Siońnia jana zastajecca papularnym patryjatyčnym simvałam, jaki adsyłaje da staražytnaj historyi biełaruskaha naroda, i ŭniesienaja ŭ dziaržaŭny Śpis historyka-kulturnych kaštoŭnaściej.

• 0
• 0
• 0
• 0
• 0
• 0
• 0
• 0