Barančyk: Na biełaruskaj movie havorać tolki niezamužnija studentki piedahahičnaha ŭniviersiteta i častka nacyjanalnaj elity
«Na biełaruskaj movie havorać tolki niezamužnija studentki piedahahičnaha ŭniviersiteta i častka nacyjalnaj elity, — zajaviŭ na kanfierencyi «BiełaRuski dyjałoh» ŭ Maskvie rasijski prapahandyst Juryj Barančyk. — A što da tych ža apazicyjanieraŭ, to ŭ Mahilovie ni adzin ź ich nie addaŭ svajo dzicio ŭ biełaruskamoŭnuju škołu», — skazaŭ Barančyk.
Vykazvańnie Barančyka cytuje ŭ svaim fejsbuku žurnalist Źmicier Łukašuk. «Ja ŭ takim vypadku chto — niezamužniaja studentka ci nacyjanalnaja elita?» — iranizuje Łukašuk.
Mižnarodnaja kanfierencyja «BiełaRuski dyjałoh» prajšła ŭ Maskvie 26 studzienia. Maderataram u kožnaj jaje siekcyi vystupaŭ palitołah Andrej Suzdalcaŭ.
Sustreča prajšła na bazie Vyšejšaj škoły ekanomiki, dzie Suzdalcaŭ pracuje namieśnikam dekana fakulteta suśvietnaj ekanomiki i suśvietnaj palityki.
Źviartaje na siabie ŭvahu śpis udzielnikaŭ. U Maskvu byli zaprošany eks-kandydatka ŭ prezidenty Taćciana Karatkievič, staršynia «Našaha doma» Volha Karač, kiraŭnik «Spraviadlivaha śvietu» Siarhiej Kalakin, prafsajuzny lidar Alaksandr Jarašuk.
Zatoje na sustrečy nie było ni Statkieviča, ni Bialackaha, ni Labiedźki, ni Trusava.
Siarod astatnich haściej kanfierencyi varta adznačyć biełarusista z MHU imia Łamanosava, aŭtara paklopnickich artykułaŭ na temu Biełarusi ŭ rasijskich miedyja Bahdana Biaspalku, a taksama ideołaha sajta «Zapadnarus» Lva Kryštapoviča.
Andrej Suzdalcaŭ doŭhi čas žyŭ u Biełarusi, adnak u 2006 hodzie byŭ departavany z našaj krainy «ŭ suviazi z tym, što ŭjaŭlaje saboj pahrozu nacyjanalnaj biaśpiecy Biełarusi».
Juryj Barančyk raniej rabiŭ kiraŭnikom Infarmacyjna-analityčnaha centra NDI teoryi i praktyki dziaržaŭnaha kiravańnia Akademii kiravańnia pry prezidencie Biełarusi. Paśla stvaryŭ internet-prajekt imperiya.by i pierajechaŭ u Maskvu. U 2014 hodzie hety resurs publikavaŭ instrukcyi dla bajevikoŭ Uschodniaj Ukrainy.
Pavodle źviestak Similarweb.com, kolkaść naviedvańniaŭ imperiya.by u śniežni 2015-ha składała prykładna 0,4% ad naviedvańniaŭ sajta «Našaj Nivy». Pryčym ułasna biełaruskaja aŭdytoryja Impieryi składaje tolki prykładna 10%.
Amal usie čaty i supołki kałonij i SIZA Biełarusi pryznali ekstremisckimi farmavańniami. Pad pahrozaj tysiačy čałaviek5
Kamientary