12 lutaha ŭ vialikaj kancertnaj zali Biełaruskaj dziaržaŭnaj fiłarmonii projdzie ŭračysty kancert, pryśviečany 500-hodździu biełaruskaj Biblii i biełaruskaha knihadrukavańnia, a taksama 500-hodździu refarmacyi ŭ Jeŭropie.
Na kancercie ŭpieršyniu ŭ Biełarusi prahučać adkryćci muzyki Reniesansa i rańniaha Baroka, a taksama samyja jarkija frahmienty šedeŭraŭ Vysokaha Baroka — Pasijonaŭ pavodle Maćvieja i Jana, Miesy si-minor vialikaha Bacha i aratoryi «Miesija» Hiendela.
Akramia taho, zahučyć i Bieraściejski kancyjanał — pieršy ŭ Biełarusi drukavany notny zbornik, ažno 1558 hoda! Vy pačujecie psalmy, jakija 450 hadoŭ tamu śpiavali našyja prodki ŭ kalvinskich zborach, i miž inšym — słaŭny Mikałaj Radzivił Čorny: mienavita jon byŭ fundatararam Kancyjanała.
U prahramie — vystupleńnie dziaržaŭnaha kamiernaha choru Respubliki Biełaruś pad kiraŭnictvam zasłužanaj artystki Biełarusi Natalli Michajłavaj, ansambla salistaŭ «Vytoki», kamiernaha arkiestra «Capella Academia».
U 2017 hodzie spaŭniajecca 500 hod z dnia, kali Francysk Skaryna ŭpieršyniu nadrukavaŭ biełaruskuju knihu. Nie vypadkova, što pieršaj nadrukavanaj knihaj pa-biełarusku staŭ biblejski «Psałtyr». Akurat u 1517 hodzie ŭ samoj Jeŭropie raspačaŭsia mahutniejšy ruch Refarmacyi, zbudavany na aŭtarytecie Śviatoha pisańnia. Mienavita hetym dvum padziejam i pryśviečany budučy kancert.
Aŭtar hetaha prajekta i dyryžor — łaŭreat mižnarodnych konkursaŭ Alaksiej Frałoŭ. Pačatak — 19.00. Kvitki dastupnyja ŭ kasach fiłarmonii i ŭ biletnych apierataraŭ.
Ciapier čytajuć
Łukašenka zajaviŭ pra hatoŭnaść pryjechać u Kijeŭ60
Kamientary