«Kazaŭ, što źniščyć mianie, bo ŭ jaho suviazi i pahony». Byłaja žonka vajuje z padpałkoŭnikam. Taho panizili da ŭčastkovaha

Havorka idzie pra ŭčastkovaha inśpiektara Baraŭlanskaha adździeła milicyi Minskaha RUUS Alaksieja Hubiča.

Pavialičyć

U 2020 hodzie Alaksiej byŭ padpałkoŭnikam u centralnym aparacie MUS, pracavaŭ va ŭpraŭleńni mižnarodnaha supracoŭnictva staršym inśpiektaram pa asablivych daručeńniach.

Jašče ŭ 2024 hodzie Alaksiej siadzieŭ na ideałahičnaj lekcyi dla kiraŭnictva i supracoŭnikaŭ padraździaleńniaŭ centralnaha aparata i centralnaha padparadkavańnia Ministerstva ŭnutranych spraŭ — słuchaŭ pra Sajuznuju dziaržavu.

A letaś jon lataŭ pa pracoŭnych pytańniach u Vjetnam.

Pavialičyć

Pa infarmacyi ad Belpol, da taho, jak u 2018 hodzie trapić u centralny aparat MUS, Hubič pracavaŭ u Departamiencie vykanańnia pakarańniaŭ i hałoŭnym upraŭleńni ŭnutranych spraŭ Minskaha harvykankama.

Ale niešta ŭ karjery Alaksieja złamałasia — jaho panizili i adpravili pracavać učastkovym. Niadaŭna hazieta «Prystaličča» cytavała Hubiča, jaki raspaviadaŭ pra pracu milicyi z chatnim hvałtam.

Kali vieryć byłoj žoncy Alaksieja, panizili jaho praź jaje zvaroty, jana nie palenavałasia dajści navat da ministra MUS. Pra svoj «kryžovy pachod» žančyna, jakaja padpisanaja ŭ Threads jak Anžalika Varabjova, raspaviadaje ŭ sacsietkach.

Pačynałasia łaŭstory pryhoža. Anžalika pryznajecca, što kali pabačyła na sajcie znajomstvaŭ fotazdymak Alaksieja, dyk serca joknuła: mužčyna z pahonami. Fantazija adrazu namalavała, što ź siłavikom jana budzie jak za kamiennaj ścianoj. Anžalika vieryła, što forma harantuje: mužčyna budzie dyscyplinavanym i nadziejnym.

Para pačała sustrakacca. Ale ramantyčnym adnosinam mocna pieraškadžała toje, što surovy milicyjanier nie vypuskaŭ z ruk mabilnik. I sprava była nie ŭ vyrašeńni pracoŭnych pytańniaŭ.

Jak piša byłaja žonka, Alaksiej non-stopam pierapisvaŭsia ŭ vajbiery z maci i starejšaj siastroj — u ich byŭ asobny čat pad nazvaj «Siamja». Tudy mužčyna ŭvieś dzień dasyłaŭ fotazdymki: kštałtu «Ja na poście» i «Voś tak ja paśniedaŭ». A ŭ adkaz atrymoŭvaŭ biaskoncyja sercajki dy kvietački, pryznańni ŭ lubovi ad svajačak.

Anžalika iranična piša, što kachany žyŭ u sistemie «MVD — Mama Vsiehda Dohovoritsia».

«Kali jon nie telefanavaŭ im piać razoŭ za dzień, pačynaŭsia «vyšuk»: dzie jon, z kim jon, čamu zabyŭ, chto jaho hałoŭnyja žančyny», — raspaviadaje Anžalika ŭ Threads.

Čarhovaj pravierkaj adnosin stała doŭhaja kamandziroŭka Hubiča ŭ Kitaj. Kaniešnie, zakachanaja dziaŭčyna raźličvała na toje, što siłavik adrazu ž kiniecca da jaje. Ale maci ź siastroj patrabavali, kab milicyjanier pryjechaŭ da ich — abaviazkova z načoŭkaj. U toj raz pieramahła Anžalika — svajački Alaksieja ŭsio ž dazvolili tamu adnu noč pravieści ź dziaŭčynaj.

«U hety momant mnie stała jaho amal škada. Pierada mnoj stajaŭ aficer, jaki tolki što viarnuŭsia ź inšaj krainy, ale vyhladaŭ jak školnik, jaki praviniŭsia. U jaho vačach čytałasia ščyraje žadańnie zastacca sa mnoj, ale ŭ kišeni praciahvaŭ vibryravać telefon — čat «Siamja» nie tryvaje deziercirstva. Heta była dziŭnaja pieramoha z horkim prysmakam».

Ale navat i ŭ ramantyčny viečar sustrečy mužčyna ŭvieś čas dasyłaŭ fota ŭ siamiejny čat.

Drama nie skončyłasia navat pierad viasiellem. Za dzień za śviatkavańnia siastra Alaksieja pryjechała da jaho na pracu i pačała rydać pry ŭsich. Pryčyna była prostaja: viečar da hetaha žanich pravioŭ ź niaviestaj zamiest taho, kab być ź siastroj i maci: «Pahladzi, jak nam drenna praz tvoj vybar! Pahladzi, jak ty zdradžvaješ nam!».

Pavialičyć

Nieskładana zdahadacca, što siamiejnaje žyćcio, jakoje pačynałasia tak, ni da čaho dobraha nie pryviało.

Sioleta ŭ studzieni para pajšła ŭ sud afarmlać razvod, apisvaje byłaja žonka. Ciapier Anžalika abvinavačvaje Alaksieja ŭ šmat čym: ad taho, što jon vynosiŭ słužbovyja dakumienty z pracy, da chatniaha hvałtu.

Žančyna śćviardžaje, što šmat hadoŭ siłavik ździekavaŭsia z žonki i dačok, starejšaje dzicia davioŭ da sproby suicydu: «Kali chapaŭ mianie za horła, ja kazała: «Bi!». Jon kazaŭ: «Ja źnišču ciabie tak, u mianie suviazi i pahony».

Adbyłosia, ź jaje słovaŭ, užo niekalki sudoŭ. Anžalika piša, što jaje były muž prajhraŭ usie pracesy i ciapier abaviazan spłacić joj 15 400 rubloŭ — ale prosić u suda rasterminoŭku na dva hady.

Pavialičyć

U kamientarach žančyna raspaviadaje, što adnojčy ŭžo była na pryjomie ŭ ministra ŭnutranych spraŭ — paśla čaho Hubič atrymaŭ strohaje dyscyplinarnaje spahnańnie i byŭ panižany na słužbie.

Anžalika tehaje akaŭnty biełaruskaj milicyi i Aleha Hajdukieviča — spadziajecca na ich padtrymku i piša, što ŭ Biełarusi bolš sapraŭdnych aficeraŭ, čym takich, jak jaje były. I prosić pravieści ź milicyjanieram vychavaŭčuju hutarku.

Hubič ža taksama nie zdajecca. Dniami Anžalika raspaviała, što čatyry hadziny praviała va ŭčastku — akazvajecca, były muž napisaŭ na jaje zajavu za razhałošvańnie asabistych źviestak. Žančyna ličyć, što ničoha nie parušyła, bo artykuł ź imiem, proźviščam i pasadaj jaje byłoha ŭžo apublikavała hazieta «Prystaličča».

• 1
• 0
• 14
• 6
• 0
• 0
• 0
• 0