Namieśnik staršyni «Biełarusbanka» pryznaŭ, što nabraŭ chabaraŭ bolš čym na $200 tysiač

U sudzie Centralnaha rajona Minska 19 lipienia pačaŭsia praces pa spravie Hienadzia Haspadaryka. 57-hadovaha pieršaha namieśnika staršyni praŭleńnia Biełarusbanka abvinavačvajuć u chabarnictvie i złoŭžyvańni słužbovymi paŭnamoctvami.

Pavialičyć

Haspadaryka zatrymali rabotniki KDB jašče ŭ červieni minułaha hoda. Jaho ŭziali z paličnym, u momant atrymańnia chabaru pamieram $14 tysiač. Realnyja sumy chabaru byli našmat bolšymi, zapeŭniŭ paźniej staršynia Kamiteta Valer Vakulčyk.

Ciapier Hienadziu Haspadaryku pahražaje da 15 hadoŭ pazbaŭleńnia voli.

Razam ź im na łavie padsudnych 51-hadovy Mikałaj Cyrto — namieśnik dyrektara departamienta pa pracy z kaštoŭnaściami Biełarusbanka. Cyrto abvinavačvajuć u tym ža, u čym i Haspadaryka: chabarnictva, złoŭžyvańnie paŭnamoctvami.

Pavialičyć

Mikałaja Cyrto zatrymali ŭ adzin dzień z Haspadarykam, ale amal dva miesiacy jon znachodziŭsia pad chatnim aryštam, i tolki paśla jaho pieraviali ŭ SIZA KDB.

Pa viersii śledstva, Haspadaryk braŭ hrošy daŭno, pieršy epizod — jašče ŭ kancy 2009 hoda, kali «ŭ restaranie «Čumacki šlach» jamu pieradali 4 tysiačy dalaraŭ». Chabar jon atrymaŭ ad biznesoŭca Bučnieva, za toje, kab trochi paźniej «Smart Biznes Technoładžy» (kampaniju Bučnieva) abrali pastaŭščykom abstalavańnia dla «Biełarusbanka». Paźniej u tym ža restaranie Bučnieŭ pieradaŭ Haspadaryku jašče 3 tysiačy jeŭra.

Paśla Hienadź Haspadaryk atrymlivaŭ ad Bučnieva našmat bolšyja sumy: spačatku 70, a paźniej - 90 tysiač dalaraŭ, iznoŭ ža za «dazvoł» pastaŭlać abstalavańnie. Hrošy top-mieniedžaru banka pieradavali prosta ŭ mašynie.

Tak praciahvałasia niekalki hadoŭ. U 2014 hodzie Bučnieŭ spłaciŭ bankiru jašče 2 tysiačy.

Ad nastupnaj kampanii chabar Haspadaryku pieradavaŭ Mikałaj Cyrto — toj samy supracoŭnik «Biełarusbanka», jaki siońnia siadzić pobač ź im na łavie padsudnych. Hienadź Haspadaryk atrymaŭ 32 tysiačy dalaraŭ, kab «Biełarusbank» pačaŭ karystacca pasłuhami kampanii «Rehuła», jakaja pastaŭlała bankaŭskaje abstalavańnie. Paźniej Cyrto pieradaŭ Haspadaryku jašče 14 tysiač dalaraŭ.

Pavialičyć

Prakuror śćviardžaje, što atrymlivaŭ hrošy i sam Cyrto. Ad taho ž Bučnieva jon atrymaŭ ahułam 220 tysiač dalaraŭ. Pry hetym, ličyć śledstva, mienavita Cyrto padbuchtorvaŭ biznesoŭca dać chabar Haspadaryku.

Hienadź Haspadaryk pryznaŭ vinu amal całkam (nie pryznaŭ tolki złoŭžyvańnie słužbovymi paŭnamoctvami). Mikałaj Cyrto paprasiŭ dazvołu adkazać pra pryznańnie viny paźniej.

Praces praciahniecca 20 lipienia.

• 0
• 0
• 0
• 0
• 0
• 0
• 0
• 0