Pradstaŭniki vojska abviaścili pra kantrol nad uładaj u Zimbabve. Adpaviednaja zajava była vypuščana pa nacyjanalnym telebačańni 15 listapada. U vystupie adznačajecca, što vojska nie sprabuje zrynuć prezidenta krainy Robierta Muhabe, ale choča «razabracca z złačyncami ŭ jahonym atačeńni». Sam prezident, jak śćviardžajecca, znachodzicca «ŭ poŭnaj biaśpiecy».
«My žadajem zapeŭnić nacyju ŭ tym, što jahamość prezident i jaho siamja žyvyja i zdarovyja i ich biaśpieka harantavanaja», — zajaviŭ u efiry telekanała čałaviek u kamuflažy. U hetym čałavieku apaznali hienierał-majora Moja, jaki ŭznačalvaje tyłavoje ŭpraŭleńnie zimbabvijskaha hienštaba.
Pry hetym paviedamlajecca ab zatrymańni ministra finansaŭ Ihnaciusa Čombe — kiraŭnika adnoj z frakcyj kiroŭnaj partyi Zimbabvijski afrykanski nacyjanalny sajuz — Patryjatyčny front.
Zajava pra zachop ułady była zroblena paśla taho, jak u stalicy krainy Charare źjaviłasia vajskovaja technika i pačalisia pierastrełki. Streły byli čuvać u tym liku kala rezidencyi Muhabe.
Padstavaj dla kanfliktu pamiž vajskoŭcami i kiraŭnictvam krainy stała adstaŭka 71-hadovaha vice-prezidenta krainy Emiersana Mnanhahvy. 13 listapada kamandujučy armijaj hienierał Kanstancin Čyvienha abviaściŭ, što nie dapuścić čystak u dačynieńni da svaich adnadumcaŭ u kiroŭnaj partyi.
Čyvienha vystupiŭ suprać taho, kab zamiest Mnanhahvy pierajemnikam prezidenta Muhabe stała jaho žonka Hrejs Muhabe.
Muhabe i jaho pradstaŭniki pakul nie rabili nijakich zajavaŭ.
93-hadovy Muhabe žaleznaj rukoj kiravaŭ krainaj ad 1980 hoda, kali kraina atrymała niezaležnaść. Jon paśladoŭna dušyŭ varožyja da siabie rehijony i apazicyju, choć u kryzisny pieryjad byŭ vymušany stvaryć kaalicyjny ŭrad z udziełam lidaraŭ apazicyi.
52-ja Hrejs Muhabe była žonkaj piłota zimbabvijskaj avijacyi i pracavała ŭ Administracyi prezidenta sakratarkaj, kali stała kachankaj prezidenta. Jana sprabavała zhurtavać vakoł siabie moładź z uładnych kołaŭ. U toj ža čas na čale vojska staić starejšaje pakaleńnie — vieterany vajny za niezaležnaść.
Asnovu ekspartu Zimbabve składajuć tytuń, fieraspłavy i nikiel.
Zimbabvijskaja armija naličvaje 30 tysiač bajcoŭ, jašče 25 tysiač uvachodziać u vajenizavanaje apałčeńnie.
Na momant prychodu da ŭłady Muhabe Zimbabve była adnoj ź pieršych u Afrycy pa pamiery VUP na dušu nasielnictva. Na siońnia jana apuściłasia ŭ niz śpisu.
Ciapier čytajuć
U biełaruskija pašparty buduć upisvać hrupu kryvi9
Kamientary