Biełaruska raspaviała, kolki joj kaštavała viarnucca ŭ Biełaruś paśla amal čatyroch hadoŭ žyćcia ŭ Dubai
U 2022 hodzie Iryna Šmat pajechała sa svaim kachanym na adpačynak u Dubaj, a ŭ vyniku zastałasia tam na niekalki hadoŭ.
U Biełarusi Iryna pracavała farmaceŭtkaj, ale časta dumała nad tym, u jakoj śfiery jašče moža raźvivacca. Žartuje, što kali b joj raniej niechta skazaŭ, što jana kinie pracu, pierajedzie ŭ Dubaj i stanie «zachavalnicaj ačaha» (a jašče pačnie volna razmaŭlać na anhlijskaj), dyk nie pavieryła b.
U 2022 hodzie biełaruska razam sa svaim kachanym palacieła ŭ Dubaj na adpačynak — jany dumali viarnucca na radzimu praź niekalki tydniaŭ. Ale ŭ vyniku zastalisia.
Iryna pryznajecca, što dla jaje situacyja stała šokam. Bo jana mieła 500 dalaraŭ u kašalku, a pa-anhlijsku mahła skazać chiba što banalnaje «Hello, how are you?». Ale Dźmitryj — abrańnik Iryny — zmoh jaje supakoić i zapeŭnić, što biare ŭsiu adkaznaść na siabie.
Pieršy čas samym składanym dla biełaruski było źmirycca, što zvykłaja praca zastałasia ŭ minułym, a taksama pačać kamunikavać z rodnymi i blizkimi ŭ asnoŭnym pa videasuviazi.
Iryna zakryłasia, bajałasia kudyści chadzić, znajomicca z novymi ludźmi. Rola chatniaj haspadyni davałasia jon nie vielmi prosta. U adnym videa biełaruska kaža, što ŭ jaje jość «zarpłata žonki» — bolšuju častku hetych hrošaj jana adkładała.
Pry hetym, jana adznačaje: niezapłanavanaja emihracyja zrabiła ich adnosiny tolki macniejšymi — para stała sapraŭdnaj kamandaj. I heta z ulikam taho, što da pajezdki ŭ Dubaj Iryna i Dźmitryj sustrakalisia ŭsiaho kala šeść miesiacaŭ i navat nie žyli razam.
Składana było i biez mašyny. Para nabyła aŭtamabil praz vosiem miesiacaŭ i pačała aktyŭna vandravać. Iryna raspaviadaje, što, dziakujučy hetamu, jany abjeździli roznyja atmaśfiernyja harady i viosački. Mienavita tady biełaruska i pačała aktyŭna vieści błoh u instahramie, kab pakazvać niebanalnyja miescy.
Adaptavałasia jana ŭ Dubai praz paŭtara hoda.
Padčas adnoj sa svaich pajezdak na radzimu Iryna praviała cikavy ekśpierymient i padličyła, kolki kaštuje jaje dzień u Biełarusi (bo była ŭpeŭnienaja, što ŭ Dubai žyć našmat daražej).
U toj minski dzień uvajšła kava ŭ «Makdonaldsie», kupla nievialikich dziavočych pryjemnaściaŭ u «Załatym jabłyku» i «Bielicie», abied ź siabroŭkami, nabyćcio kašuli ajčynnaha brenda, kakava ŭ kafe dy taksi. Atrymałasia kala 120 dalaraŭ u ekvivalencie — u Dubai anałahičny dzień kaštavaŭ by kala 150 dalaraŭ. To-bok roźnica nie kaśmičnaja.
Praz čatyry hady para vyrašyła viarnucca na radzimu. Adnoj z hałoŭnych pryčyn Iryna nazyvaje toje, što chvalavałasia za svoj miedycynski dypłom: kali doŭha nie pracavać pa śpiecyjalnaści, to jon zharaje. A da hetaha žančyna nie hatova.
Druhaja pryčyna — nie chapała finansaŭ na toje, kab u Dubai padtrymlivać zvykły ład žyćcia, a źnižać płanku nie chaciełasia. A treciaja — klimat. Chaciełasia bolš śviežaha pavietra i zielaniny, nie dumać pra toje, što kožnaje leta nieabchodna kudyści evakujavacca ad śpiakoty.
Dyk kolki ž kaštavała viartańnie? Dziaŭčyna dzielicca raschodami. Kvitki na samalot dla dvaich — $2500.
Kvateru ŭ Dubai para arandavała zusim pustuju — to-bok u svoj čas im treba było nabyć usio — ad mebli i techniki da stałovych pryboraŭ i dekoru. Pieravieźci rečy kaštavała b šalonych hrošaj, tamu ŭsio raspradavali. Iryna ździŭlajecca, ale atrymałasia pradać navat tekstyl. Ale stracili jany na ŭsich hetych manipulacyjach jak minimum $5000.
Pradavać mašynu ŭ Dubai było zusim niavyhadna, tamu pryjšłosia apłačvać dastaŭku jaje ŭ Minsk — i voś jašče minus $4000.
Na fonie hetaha $100 dalaraŭ, jakija addali za apošniuju noč u hateli Dubaja, padajucca drobiaźziu.
U vyniku Iryna aceńvaje ich zatraty na pierajezd u Biełaruś u $11‑-12 tysiač. Ale niervaŭ pry arhanizacyi ŭsiaho hetaha spatrebiłasia značna bolš.
Viartańnie ŭ Biełaruś nie było lohkim — pryjšłosia znoŭ prachodzić praz adaptacyju. Iryna piša, što, z adnaho boku, byccam by viarnułasia nie damoŭ, a ŭ novuju krainu. Ź inšaha — było sumna razumieć, što za hety čas u Minsku ŭsio zastyła.
Biełaruski servis paśla dubajskaha vyklikaje šmat pytańniaŭ. Zatoje atrymlivajecca ekanomić: kali ŭ Dubai možna było kupić usio i adrazu, to ŭ Biełarusi treba šmat čaho zamaŭlać praz bajeraŭ, a ŭ Iryny niama entuzijazmu hetym zajmacca.
Ciapier čytajuć
Rasijskaja błohierka-miljońnica, jakaja zhańbiłasia ź biełaruskaj movaj, zapisała videa z tłumačeńniami — ale tak i nie vybačyłasia33
Kamientary
[Zredahavana]