Pravasłaŭny aktyvist patrabuje nie dapuścić praviadzieńnia ŭ Minsku kvir-fiestyvalu na Vialikdzień
6-8 krasavika ŭ Minsku maje prajści «IV mižnarodny fiestyval kvir-historyi Dotyk. Zrabi krok!». Doktara z Mahilova Mikałaja Łajšu, pravasłaŭnaha aktyvista, aburyła toje, što hetaja impreza ŁHBT-supolnaści zapłanavanaja na dni pravasłaŭnaha Vialikadnia.
«Jaho pačatak zapłanavany na Vialikuju Piatnicu — dzień ukryžavańnia Chrysta, — adznačaje doktar Łajša. — Na Vialikuju Subotu na 23.00 zapłanavana hiej-viečaryna. Pravasłaŭny aktyvist aburajecca: «Razbahacieli (za košt hrantaŭ ź Jeŭrasadoma). Znachabnieli».
Mikałaj Łajša — viadomy ŭ Mahilovie pravasłaŭny psichaterapieŭt. Mienavita tak jaho pradstaŭlajuć u haziecie «Viečiernij Mohilov», dzie jon publikavaŭsia ŭ tym liku z artykułam «Chełaŭin robić vas chałujami Zachadu i djabła».
Na sajcie kvir-fiestyvalu havorycca, što «misija Dotyk — nabližeńnie našaha hramadstva da talerantnaści i pryniaćcia». Jak adznačajecca, «asnoŭnaj padziejaj stanie adkrytaja kanfierencyja, pryśviečanaja kvir-historyi i nienarmatyŭnaj identyčnaści na postsavieckaj prastory z udziełam śpikiera_k ź Biełarusi, Rasii, Vialikabrytanii, Łatvii, Francyi i Estonii».
«My chočam pahłybicca ŭ kvir- i ŁHBT+ historyju byłoha SSSR, kab zrabić ź jaje vysnovy ab sučasnaści, — adznačajecca na sajcie. — Vystupy daśledčy_c z roznych krain Jeŭropy raspaviaduć ab žyćci zvyčajna_j pradstaŭni_cy ŁHBT+ supolnaści ŭ SSSR, pra ciažkaści zachavańnia kvir-historyi, ab bačnaści ŁHBT+ supolnaści ŭ publičnaj prastory».
Asnoŭnaj placoŭkaj fiestyvalu stanie prastora Stałoŭka XYZ. Uvachod na ŭsie mierapryjemstvy fiestyvalu, akramia viečarynki, budzie volnym, ale 18+.
Na dumku doktara Łajšy, praviadzieńnie takoha mierapryjemstva na Vialikdzień — taki ž hrech, jak fiestyval piva na Trojcu ŭ 1999 hodzie, jaki skončyŭsia ciskaninaj na Niamizie.
«Kančatkovaj metaj usiakaj biazbožnaści źjaŭlajecca naklikać hnieŭ Božy na ludziej i zahubić ich razam z saboj», — piša Łajša.
«My, pravasłaŭnyja chryścijanie, rasceńvajem hety ŭčynak jak dziorzki vyklik Pravasłaŭnaj Carkvie, jak bluźnierstva i raspalvańnie relihijnaj varožaści», — kaža jon.
My patelefanavali ŭ pryjomnuju Biełaruskaj pravasłaŭnaj carkvy, kab vyśvietlić, što tam dumajuć nakont hetaj situacyi. U aficyjnaha pres-sakratara byŭ vychodny dzień, ale adkazać na našy pytańni pahadziŭsia dziažurny Minskaha jeparchijalnaha ŭpraŭleńnia.
«Ja nie liču, što toje, što robiać arhanizatary — hrech. Ale ja nie zusim razumieju, navošta treba pravodzić niejkija inšyja mierapryjemstvy padčas Vialikadnia. My žyviom praktyčna ŭ pravasłaŭnaj krainie. Nie viedać relihijnyja śviaty — heta jak minimum dziŭna. Kali vy płanujecie niejkaje mierapryjemstva, to treba zahadzia pradumać daty. Ja na baku čałavieka, jaki za toje, kab 8 krasavika śviatkavać Vialikdzień. Dla inšych padziej jość jašče 364 dni ŭ hodzie», — prakamientavaŭ «NN» Siarhiej Błandzinaŭ.
Što tyčycca arhanizataraŭ fiestyvalu, to, pa słovach jaho pijar-mieniedžarki Hanny Bredavaj, supadzieńnie dat praviadzieńnia ź Vialikadniom nie naŭmysnaje, praca nad «Dotykam» viałasia jašče z vosieni.
«My ličym, što ŭ kožnaha jość prava vybirać, čym zajmacca na vychodnych. Chto choča iści ŭ carkvu, idzie ŭ carkvu, chto choča iści da nas, pojdzie da nas, chto choča paśla carkvy da nas, taksama sardečna zaprašajem. Nie dumaju, što naš fiestyval — adzinaje nierelihijnaje mierapryjemstva, zapłanavanaje na hetyja vychodnyja»,— patłumačyła «Našaj Nivie» Hanna.
Ciapier čytajuć
Hety małady biełarus stajaŭ la vytokaŭ ChatGPT. Voś što jon zrabiŭ3
Kamientary