Bieraściejcy sabralisia kala doma žančyny, jakuju milicyja sprabavała zatrymać za rasklejvańnie ŭlotak pratestu

Žychary Bresta praciahvajuć pratesty suprać pabudovy akumulatarnaha zavoda pablizu horada. Siońnia dziasiatki bieraściejcaŭ sabralisia kala doma žančyny, jakuju milicyja sprabavała zatrymać.

U domie doktara-nieŭrołaha Taćciany Fiesikavaj u pradmieści Ścimava siońnia a 17.00 pačaŭsia ahlad, sankcyjanavany prakuroram Bresckaha rajona. Padstavaj dla ahladu staŭ fakt «niezakonnaha rasklejvańnia ŭlotak na administracyjnych budynkach u vioscy Telmy-1» Bresckaha rajona, paviedamiŭ «Briestskoj hazietie» pravaabaronca Raman Kiślak. Na ŭlotkach było fota zatrymanaha 3 krasavika aktyvista pratestaŭ 62-hadovaha Majsieja Maźko, ekanoma miascovaha pravasłaŭnaha manastyra. U mašynie, na jakoj jechaŭ Maźko, vyjavili patrony i rečyva, padobnaje da tratyłu, i, choć Maźko zajaviŭ, što nie viedaje, adkul tam apynuŭsia toj pakiet, na jaho zaviali kryminalnuju spravu, jon ciapier znachodzicca ŭ izalatary Leninskaha RAUS. Zatrymany na troje sutak i jahony syn Dzianis Maźko. Jak skazana ŭ pastanovie ab praviadzieńni ahladu, datyčnymi da raspaŭsiudžvańnia ŭlotak mohuć być Taćciana Fiesikava i Ihar Zubik.

Pa słovach Kiślaka, supracoŭniki Bresckaha RAUS praviali ahlad u domie Taćciany Fiesikavaj, u prysutnaści advakata ŭziali tłumačeńni. A potym pryjechali milicyjanty ź Leninskaha RAUS i skazali, što zabirajuć jaje. Za znachodžańnie na płoščy Lenina z žoŭtymi šarykami 31 sakavika na jaje składzieny pratakoł pa artykule 23.34 «Parušeńnie paradku arhanizacyi abo praviadzieńnia masavych mierapryjemstvaŭ» KaAP RB. Infarmacyja pra heta chutka raspaŭsiudziłasia pa sacsietkach, i kala chaty sabralisia aburanyja ludzi.

Jany nie dali vyvieźci Fiesikavu. Dramatyzm situacyi byŭ u tym, što na miesca vyklikali inśpiekcyju pa spravach niepaŭnaletnich. Muž doktara Fiesikavaj u kamandziroŭcy, i, kali jaje zabrali b, syn-padletak zastaŭsia b adzin doma. Ludzi nie razychodzilisia i nastojvali na tym, kab žančynu vyklikali ŭ RAUS pozvaj u pracoŭny dzień.

Ludzi viali anłajn-tranślacyi padziej. Voś adna ź ich, što sabrała pad 1000 łajkaŭ:

Fiesikavaj stała kiepska, vyklikali bryhadu chutkaj dapamohi, žančynu zabrali ŭ balnicu. Ludzi pravodzili Fiesikavu apładysmientami.

Śledam za joj na mašynach pajechali inšyja aktyvisty, kab jaje nie zatrymali ŭ mašynie daktaroŭ. Kala 23.40 Fiesikavu pakłali ŭ kardyjałohiju, piša sajt «Briestskoj haziety».

Taćciana Fiesikava — adna z hałoŭnych aktyvistak kampanii suprać budaŭnictva pad Brestam akumulatarnaha zavoda. Uviesnu minułaha hoda paśla vystupleńnia na mitynhu «Bieraściejki suprać śvincu» jaje zvolnili z pracy — žančyna pracavała nieŭrołaham ŭ haradskoj balnicy. Vosieńniu minułaha hoda jaje aštrafavali na 10 bazavych za nalepki suprać zavoda.

Bieraściejcy bajacca zabrudžvańnia hlebaŭ i vodaŭ śvincom, jaki ŭtrymlivajecca ŭ akumulatarach. Asabliva ŭsturbavanyja žychary zamožnych pryharadnych viosak, što znachodziacca kala budučaha zavoda. 

Ułady ličać, što pabudova akumulatarnaha zavoda ekanamična metazhodnaja i nie naniasie niedapuščalnaj škody ekałohii. Na zavodzie płanujecca vypuskać spačatku 1 młn akumulataraŭ za hod, a paśla pavialičyć hetyja abjomy jašče ŭdvaja. Buduje pradpryjemstva pryvatny kapitał, AAT «Ajpaŭer». Na zavodzie majuć pracavać 188 čałaviek. 

• 0
• 0
• 0
• 0
• 0
• 0
• 0
• 0