Spravazdača pra incydent z Ryanair: iluminatar, u jaki zaciahnuła hałavu pasažyra, prabili askołki ruchavika
Žonka paciarpiełaha i jašče dvoje pasažyraŭ na praciahu niekalkich chvilin trymali jaho za nohi.
Papiaredniaje rasśledavańnie incydentu na borcie Ryanair, kali hałavu i plačo pasažyra zaciahnuła ŭ iluminatar, pakazała: akno było raźbita askiepkami złamanaha ruchavika, piša Bi-bi-si.
Papiaredniuju spravazdaču pradstaviŭ Nacyjanalny saviet biaśpieki na transparcie (NTSB) — fiederalnaje ahienctva ZŠA, jakoje rasśleduje pryčyny transpartnych avaryj i katastrof.
U dakumiencie havorycca, što 10 lipienia nieŭzabavie paśla vyletu z Sałonikaŭ u Mieminhien na borcie Ryanair «padčas naboru vyšyni adbyŭsia adryŭ łapatki vientylatara druhoha (pravaha) ruchavika».
«Ekipaž pryniaŭ rašeńnie viarnucca ŭ Mižnarodny aeraport Sałoniki, dzie ździejśniŭ pasadku biez zdareńniaŭ», — havorycca ŭ spravazdačy.
U nastupnyja paśla incydentu dni hreckija ŭłady «całkam pieradali rasśledavańnie» amierykanskamu fiederalnamu ahienctvu.
Hałavu i pravaje plačo hramadzianina Sierbii Lubišy Karaviča zaciahnuła ŭ iluminatar samalota, u vyniku čaho jon atrymaŭ «surjoznyja traŭmy i znachodziŭsia ŭ stanie šoku».
Jak raskazvała Bi-bi-si žonka paciarpiełaha Śviatłana Hrkavič-Maksimavič, jana i jašče dvoje pasažyraŭ na praciahu niekalkich chvilin trymali jaho za nohi.
U spravazdačy NTSB pryviedziena chranałohija padziej sa słoŭ lotnaha ekipaža. Ź jaje vynikaje, što padčas naboru vyšyni piłoty atrymali sihnał pra «mocnuju vibracyju» ruchavika. U adkaz jany źnizili mahutnaść ruchavika i praviali šerah pravierak. Jak havorycca ŭ spravazdačy, kali vibracyja spyniłasia, ekipaž praciahnuŭ nabor vyšyni na aŭtapiłocie.
Adnak zatym vibracyja ruchavika adnaviłasia, i ekipaž pačuŭ hučny vybuch, paśla čaho piłoty abviaścili nadzvyčajnuju situacyju i pačali źnižeńnie.
Bortpravadniki taksama paviedamili, što adčuvali vibracyju, a niezadoŭha da taho, jak vypali kisłarodnyja maski, bačyli ŭ sałonie nievialikuju kolkaść dymu.
Zatym, pavodle słoŭ adnaho z bortpravadnikoŭ, pasažyry pačali klikać na dapamohu — i ściuardy ŭbačyli, što adnaho čałavieka litaralna vysmoktvaje vonki praz vybity iluminatar.
U spravazdačy adznačajecca, što ŭ mai hetaha hoda ruchavik prajšoŭ ultrahukavy kantrol, padčas jakoha nijakich niaspraŭnaściaŭ vyjaŭlena nie było.
Hienieralny dyrektar Ryanair Majkł O'Liry raniej vykazaŭ zdahadku, što incydent moh być vyklikany «paškodžańniem ruchavika starońnim pradmietam».
Jak pisali ŚMI, samalot Boeing 737‑800 byŭ vyrableny ŭ 2008 hodzie i ekspłuatavaŭsia daččynaj kampanijaj Ryanair — Malta Air.
Kamientary