Rovar, na jakim Kola Łukašenka kataŭsia ŭ Bałbasavie, kaštuje niekalki tysiač jeŭra
U minułuju subotu kiraŭnik dziaržavy i jaho syn Kola niečakana pryjechali ŭ haradski pasiołak Bałbasava. Dy nie ŭ supravadžeńni kavalkady śpiecmašyn, a pa-prostamu, na rovarach. Ale Tut.by vyśvietliŭ sa śpiecyjalistam adździeła prodažaŭ viełatechniki, što sami rovary prostymi nijak nie nazavieš.
Małodšy syn Kola abraŭ dla viełaprahułki pradukcyju marki Canyon. Chutčej za ŭsio, heta madel ź sieryi Aeroad. Na aficyjnym sajcie vytvorcy taki rovar u topavaj kamplektacyi kaštuje 7499 jeŭra. Za što takija hrošy? Za karbonavuju ramu, dziakujučy jakoj važyć rovar usiaho siem kiłahram.
— Vielmi padobny na «repliku» viersii dla Tur de Frans. Standartny rovar idzie z dyskavymi tarmazami, a hety na abadnych. Darečy ceńnik startuje z 3200 jeŭra, topavaja madel kaštuje 7500 jeŭra, nu, a «replika» moža kaštavać i 10 tysiač jeŭra, — kaža ekśpiert.
Darečy, pradajucca takija rovary bieź piedalaŭ. Ich padbiraje pakupnik indyvidualna. Pavodle słoŭ śpiecyjalista, na rovarach Mikałaja i Alaksandra Łukašenki ŭstanoŭleny piedali, jakija nie adpaviadajuć kłasu techniki. Zvyčajna vykarystoŭvajucca kantaktnyja piedali, kali naha viełasipiedysta macujecca da płatformy. Ale pry hetym spatrebiacca śpiecyjalnyja viełabacinki.
— U Alaksandra Łukašenki rovar šašejnaha kłasa, ale staić dosyć biudžetny rul Easton EA50, a tarmaznyja ručki avid single digit, jakija tudy nijak nie padychodziać pa svaich techničnych charaktarystykach. Koły z aeradynamičnymi śpicami, davoli darahija. Rama pa hieamietryi bolš nahadvaje «hornik». U cełym rovar, padobna, całkam «kastomny», heta značyć sabrany z detalaŭ roznych vytvorcaŭ. Tamu składana skazać, kolki jon moža kaštavać, — adznačaje ekśpiert.
U kadry jość jašče dvoje mužčyn na całkam biudžetnych «hornikach» marki Kellys. Kaštujuć takija prykładna 400-500 dołaraŭ.
Kamientary