Za pracu ŭ Aršanskim lashasie školnikam zapłacili pa 100 rubloŭ zamiest abiacanaj tysiačy — baćki i dzieci aburany

Adzin sa školnikaŭ paskardziŭsia ŭ Threads na niespraviadlivaść, ź jakoj jon sutyknuŭsia ŭ vyniku supracoŭnictva z Aršanskim lashasam. Pa jaho słovach, pry pracaŭładkavańni na pradpryjemstvie abiacali «kala tysiačy rubloŭ», ale paśla amal miesiaca ciažkaj pracy na ruki jon atrymaŭ usiaho 119.

«Heta plavok u tvar padletkam, jakija chacieli sumlenna zarabić letam», — skardziŭsia školnik. Na takuju ž niespraviadlivaść u siecivie paskardzilisia i baćki inšych vučniaŭ. Praŭda, u lashasie ličać, što ŭsio było zhodna z damovaj.

Pavialičyć

Chłopiec, ź jakoha pačałosia abmierkavańnie pracy ŭ Aršanskim lashasie, užo vydaliŭ svoj post. U im jon raskazaŭ, što ŭmovy pracy dla aformlenych vaśmikłaśnikaŭ i dzieviacikłaśnikaŭ byli «piakielnymi».

Školnikam davieryli prapołku jełak, i tyja, pa słovach chłopca, byli «mocna zarosłyja pustaziellem». Dadatkova praca vypała na mocny soncapiok, ale pracaŭnikam «vydali nikčemna mała vady».

@belarusnovosti2 Školnik požałovałsia na kidałovo ot Oršanskoho leschoza: obieŝali 1000 rublej, a zapłatili 119 #novostibiełarusi #biełaruśnovosti #orša #vitiebsk #biełaruśsiejčas ♬ End of day - SkyZemr

Jašče adna maci školnicy raspaviała ŭ sacsietkach, što asabista prysutničała na schodzie ŭ lashasie, dzie dzieciam paabiacali zarobki pa tysiačy rubloŭ.

«Baćki apłacili charčavańnie, aformili za 20 rubloŭ kartku, na jakuju musiŭ pieraličvacca zarobak. Užo ŭ pieršyja dni pracy mnohija školniki admovilisia [praciahvać], bo heta było ciažka. Zastalisia samyja tryvałyja. Na druhi ž tydzień hetyja dzieci pačuli, što atrymajuć nie bolš za 150 rubloŭ. My padumali, što heta tolki razmovy. Ale kali pryjšoŭ čas raźliku, usie byli ŭ šoku — maksimalnaja apłata składała 139 rubloŭ. Maja dačka atrymała 79. Kaniečnie, heta niespraviadliva!»

Adznačym, što zhodna ź biełaruskim zakanadaŭstvam, apłata pracy niapoŭnahadovych pry skaročanym hrafiku musić adbyvacca tymi ž samymi taryfami, jak i ŭ pracaŭnikoŭ adpaviednych katehoryj pry poŭnym pracoŭnym dni.

Na situacyju adrazu źviarnuli ŭvahu ŭ pres-słužbie Ministerstva lasnoj haspadarki, paabiacaŭšy razabracca.

Pa infarmacyi «Našaj Nivy», u Aršanski lashas zavitali kantrolnyja orhany ź Viciebskaha dziaržaŭnaha vytvorčaha lesahaspadarčaha abjadnańnia — niespraviadlivaści ŭ raźlikach čynoŭniki nie vyjavili.

Pavialičyć

Pa słovach ideołaha Aršanskaha lashasa Juryja Mocina, da jakoha žurnalist «Našaj Nivy» dazvaniŭsia jak pryvatnaja asoba, «usie damovy byli pračytanyja i padpisanyja».

«Pry ŭmovie vykanańnia normy — [prapołki] 900 kvadratnych mietraŭ, jany b atrymali 348 rubloŭ, ale jany jaje nie vykanali. Dzieci pracavali ŭsiaho try hadziny na dzień. Ja razumieju, što nie kožny takuju pracu zdužaje i što chočacca bolšaha.

Ale my — dziaržaŭnaja biudžetnaja arhanizacyja, my nie možam brać hrošy z pavietra — siarod inšaha, nas paśla praviaraje Dziaržkantrol. Pry hetym u nas nie pieršy hod pracujuć maładziony z BRSM — jany zaniatyja pa siem hadzin, i niekatoryja ź ich pieravyšajuć normu. Viadoma, u takim vypadku jany atrymlivajuć na ruki pad tysiaču rubloŭ».

Ideołah taksama adznačyŭ, što paśla takich «hałaŭnych bolaŭ» u rajvykankamie sumniavajucca ŭ tym, što zachočuć dalej supracoŭničać sa školnikami.

• 1
• 1
• 30
• 9
• 0
• 0
• 7
• 0