Čamu pra sychod Šunieviča pieršym paviedamiŭ jon sam? 

Ničoha nie pradviaščała adstaŭki Ihara Šunieviča ŭ infarmacyi pra jaho sustreču z Alaksandram Łukašenkam. Pres-słužba prezidenta paviedamlała, jakija ŭkazańni dadzienyja ministru pa padrychtoŭcy da Jeŭrapiejskich hulniaŭ, jakija — pa hulni chakiejnaha «Dynama».

Ale kali Ihar Šunievič vyjšaŭ ad prezidenta, jon sam niečakana paviedamiŭ žurnalistam pra adstaŭku.

Redki vypadak, kali pra sychod ministra pieršym paviedamlaje sam ministr, a nie prezident ci aficyjnyja kanały.

«Siońnia ja źviarnuŭsia da kiraŭnika dziaržavy z rapartam ab adstaŭcy, i jon hetuju adstaŭku pryniaŭ», — skazaŭ žurnalistam Šunievič.

Jon nazvaŭ svajo rašeńnie ab sychodzie z pasady «vyvieranym, pravilnym i svoječasovym».

«Projdzieny vielmi doŭhi i składany šlach pracy ŭ ministerstvie. Šmat što zroblena. U niejki momant ja pačaŭ razumieć, što treba zabiaśpiečvać pierajemnaść, dynamiku, chutkaść i efiektyŭnaść pryniaćcia rašeńniaŭ.

I heta dosyć składana — być aktualnym», — skazaŭ jon, tłumačačy pryčyny takoha kroku.

— Pa-pieršaje, patrebien śviežy pohlad na pracu ministerstva. Pa-druhoje, dumajučy i pra svaju efiektyŭnaść, liču, što pryjšoŭ čas źmianić rod dziejnaści. Dastatkova doŭha ja znachodžusia na pasadzie ministra. Moža, voka zamyliłasia. Moža, treba pasprabavać niešta inšaje. Heta adzinaja matyvacyja, ja jaje vykłaŭ kiraŭniku dziaržavy, jon z hetym pahadziŭsia».

Što heta było? Składajecca ŭražańnie, što ŭ Łukašenki siońnia nie źbiralisia paviedamlać pra adstaŭku Šunieviča, ale niešta pajšło nie tak na samoj sustrečy. 

Telehram-kanał «Kulhavy djabał» paviedamlaŭ raniej, što Šunievič prasiŭsia ŭ adstaŭku pa stanie zdaroŭja, ale kiraŭnik dziaržavy jaho nie adpuskaŭ.

Ihar Šunievič mieŭ reputacyju prychilnika žorstkaj linii — pryčym va ŭsich spravach. Hramadskaść rezka niehatyŭna ŭspryniała dva vypadki, kali ministr źjaviŭsia na publicy ŭ formie savieckaha NKVD.

Pravaabaroncy źviartali ŭvahu na asabisty ŭdzieł Šunieviča ŭ dopytach palitviaźniaŭ u 2010—2011 hadach.

Šunievič taksama vyłučaŭsia rezkimi, časam demanstratyŭnymi vykazvańniami na roznyja dyskusijnyja temy.

Jon ustupiŭ u palemiku z brytanskim pasolstvam pa pytańni ŁHBT. Jon admoviŭsia prynieści prabačeńni cyhanam za previentyŭnyja zatrymańni ŭ Mahilovie — heta daviałosia zrabić kiraŭnicy Administracyi prezidenta.

Čytajcie taksama: Šunievič: U mianie niama ni nahody, ni padstavaŭ vybačacca pierad cyhanami

Pry im pad faktyčnuju achovu byŭ uziaty złaščasny pomnik carskamu haradavomu, pastaŭleny pierad ministerstvam, što vyklikała kpiny.

Čytajcie taksama: Šunievič pra padletka, jaki vybačyŭsia pierad skulpturaj haradavoha: Heta maja ideja

Narešcie, pa padazreńni ŭ atrymańni hihanckaha chabaru byŭ aryštavany namieśnik kiraŭnika Rady biaśpieki Uciuryn, jaki pa svajoj pasadzie byŭ źviazany mienavita z MUS.

Čytajcie taksama: Mercedes GL, na jakim jeździć Šunievič, stajaŭ pad znakam. Što jamu pahražaje za heta? FOTA

Źviarnuła ŭvahu, što na paviedamleńni «Sovietskoj Biełoruśsii» pra hetuju zajavu Šunieviča čamuści źmianiŭsia čas publikacyi: z 14.15 na 14.22, toj samy, što i na BiełTA.

U svaich vykazvańniach pa vychadzie ad Łukašenki Ihar Šunievič nie frandziravaŭ.

Jon adznačyŭ, što pakul kankretnyja prapanovy inšaj pasady jamu nie pastupili, adnak jon spadziajecca prynieści karyść dziaržavie na inšaj pasadzie: «Žyćcio praciahvajecca. Žadańnie i mahčymaść pracavać jość. U situacyi, jakaja skłałasia, ja nie baču absalutna ničoha ekstraardynarnaha. Usio raźvivajecca pa śpirali. Siadzieć skłaŭšy ruki ja dakładna nie budu. Spadziajusia być karysnym dziaržavie na luboj pasadzie», — skazaŭ Šunievič.

Tolki paśla zajavy Šunieviča źjaviłasia tłumačeńnie pres-sakratarki prezidenta Natalli Ejsmant. Jana abmiežavałasia, faktyčna, paŭtareńniem tezisaŭ Šunieviča: rapart padaŭ jon sam, pryčyny — u nieabchodnaści novaha pohladu na pracu ministerstva.

• 0
• 0
• 0
• 0
• 0
• 0
• 0
• 0