Finlandyja prapanavała trochbakovyja pieramovy pa BiełAES, Litva choča bolš udzielnikaŭ
Litva adchiliła zaprašeńnie Finlandyi na trochbakovyja kansultacyi ź Biełaruśsiu pa BiełAES, paviedamlaje Interfax.by.
«Heta prablema ŭsiaho ES, heta rehijanalnaja prablema i prablema ES, tamu my chacieli b, kab usie rehulatary ES byli niejak uciahnutyja ŭ vyrašeńnie hetaj prablemy», — skazała kiraŭnik prezidenckaj hrupy pa zamiežnaj palitycy Asta Skajshirycie.
«My b chacieli bolš šyrokaha ŭklučeńnia. Finskaha rehulatara taksama, razam z rehulatarami inšych krain ES», — dadała jana.
Pa słovach dypłamata, BiełAES «nie źjaŭlajecca dvuchbakovaj spravaj Litvy i Biełarusi ci Finlandyi i Biełarusi».
Prapanovu ab praviadzieńni trochbakovych kansultacyj ahučyŭ napiaredadni ŭ Minsku ministr zamiežnych spraŭ Finlandyi Pieka Chaavista paśla sustrečy z Alaksandram Łukašenkam. Pavodle jaho słoŭ, «heta dazvoliła b zrabić supracoŭnictva šyrejšym i ŭstalavać pryjarytety partniorstva».
Dla Biełarusi važna ŭ budučyni mieć mahčymaść pradavać elektryčnaść z Astravieckaj AES u Jeŭrasajuz. Heta, akramia taho, harantavała b najaŭnaść stratehična važnaha enierhietyčnaha mosta ŭ Jeŭropu. Prapanova Finlandyi važnaja, bo jana daje mahčymaść u budučyni lehalizavać pastaŭki elektraenierhii z AES u Jeŭrasajuz tak, kab pry hetym aficyjnaja Vilnia nie straciła tvaru. Varta adznačyć, što Finlandyja — adna ź niešmatlikich dziaržaŭ, jakija vałodajuć technałohijami budaŭnictva AES, naroŭni z Francyjaj, Rasijaj, ZŠA i Japonijaj.
Litva dahetul kateharyčna admaŭlaje mahčymaść zakupu elektraenierhii z Astravieckaj AES, baicca rasijskich atamnych technałohij pad bokam u svajoj stalicy.
Kamientary