U štabie Viktara Babaryki prajšła pres-kanfierencyja kandydata ŭ prezidenty Śviatłany Cichanoŭskaj, žonki Valeryja Capkały Vieraniki, a taksama pradstaŭnicy štaba Viktara Babaryki Maryi Kaleśnikavaj. Napiaredadni było damoŭlena pra abjadnańnie štabaŭ kandydataŭ. Usie žančyny pryjšli z kvietkami. Śviatłana Cichanoŭskaja zaniała miesca pa centry.
Pačała vystupać Maryja Kaleśnikava, jana ahučyła, što mienavita ź inicyjatyvy kamandy Babaryki adbyłosia abjadnańnie. «My zastalisia ŭtraich i damovilisia za 15 chvilin», — skazała jana.
«Hałoŭny vorah siońnia — nie režym, a niavierje ŭ toje, što niešta moža atrymacca», — zaznačyła Kaleśnikava.
«Vy ŭsie viedajecie, čamu ja na hetym miescy — praz kachańnie, kachańnie da muža. Ja lublu Biełaruś i biełarusaŭ, tamu ja idu dalej, niahledziačy na sproby mianie złamać. Ja idu dziela svaich dziaciej, kab jany nie siadzieli ŭ turmie bieź viny. My nie robim ničoha kiepskaha i niezakonnaha. My nie vierym u česnyja vybary. Ja ŭdziačna padtrymcy biełarusaŭ, tolki razam my zmožam pabudavać krainu dla žyćcia», — skazała sama Śviatłana Cichanoŭskaja.
«My abjadnalisia na asnovie piaci pryncypaŭ: jaŭka na vybary 9 žniŭnia, vyzvaleńnie palitviaźniaŭ i ekanamičnych viaźniaŭ, praviadzieńnie novych volnych vybaraŭ», — adznačyła kandydatka ŭ prezidenty.
Za kaho ž hałasavać zaklikajuć štaby? «Viadoma, za Śviatłanu», — adznačyła Vieranika Capkała.
«Niesumlenna ŭłada źniała troch samych mocnych kandydataŭ — Cichanoŭskaha, Capkału i Babaryku. Ułada baicca žančyn. My nie druhasnyja, my staim na roŭnych z mužčynami i my pieramožam», — skazała Vieranika Capkała.
Stała viadoma, što Andrej Dźmitryjeŭ padtrymaŭ inicyjatyvu, ale havorka pra źniaćcio kandydataŭ nie idzie.
Maryja Kaleśnikava ŭvieś čas adznačała, što dziejničać treba vyklučna ŭ ramkach zakona. Samaj radykalnaj u svaich pramovach była Vieranika Capkała. Mienavita jana havaryła pra «falsifikacyi» vybaraŭ. «I sud, i CVK kantralujucca adnym čałaviekam», — skazała jana.
Pakul ni Maryja Kaleśnikava, ni Vieranika Capkała nie ŭvojduć u śpis davieranych asobaŭ Śviatłany Cichanoŭskaj.
«My hatovyja zaklikać ludziej abaraniać svaje hałasy tak, jak jany paličać patrebnym», — uvieś čas padkreślivała Śviatłana Cichanoŭskaja. Kolki b žurnalisty ni sprabavali davieści, ci ŭklučaje heta ŭ siabie vuličnyja akcyi, udzielnicy pres-kanfierencyi admoŭčvalisia.
Śviatłana Cichanoŭskaja skazała, što nie viedaje pryčyny, čamu sa śpisu davieranych asobaŭ jaje syšli pradstaŭniki «Jeŭrapiejskaj Biełarusi». «Heta lepš spytać u ich», — skazała Cichanoŭskaja.
«My bačym kolkaść ludziej i reakcyju ŭładaŭ, jak AMAP chapaje ludziej, piensijanieraŭ, padletkaŭ. AMAP davaŭ prysiahu nie adnamu čałavieku, a biełaruskamu narodu, spynicie represii», — skazała Vieranika Capkała.
Voś videa pres-kanfierencyi:
Kamientary