U ludziej, jakija pakutujuć ad biessani, moža źjavicca davoli niezvyčajny sposab palepšyć son. Kitajskija navukoŭcy vyjavili, što pierasadka kišačnaj mikrabijoty ad zdarovych donaraŭ patencyjna moža dapamahčy pry chraničnych prablemach sa snom. Z padrabiaznaściami znajomić New York Post.
Biessań moža ŭźnikać pa roznych pryčynach — ad stresu i štodzionnych zvyčak da parušeńnia režymu snu i prablem sa zdaroŭjem. Adnak apošnija daśledavańni pakazvajuć, što na jakaść snu moža ŭpłyvać i kišačny mikrabijom.
Adnym sa sposabaŭ źmianić jaho skład źjaŭlajecca transpłantacyja fiekalnaj mikrabijoty (TFM), abo pierasadka fiekalij. Padčas takoj pracedury mikraarhanizmy z kišečnika zdarovaha donara pieranosiać u arhanizm inšaha čałavieka. U niekatorych vypadkach dla hetaha vykarystoŭvajuć kapsuły z donarskaj mikrabijotaj.
Takija kapsuły ŭžo vyvučajuć jak patencyjny srodak dla lačeńnia roznych zachvorvańniaŭ. Ciapier kitajskija navukoŭcy pravieryli, ci moža TFM dapamahčy i ludziam z chraničnaj biessańniu.
U nievialikim daśledavańni pryniali ŭdzieł 80 darosłych, jakija doŭhi čas pakutavali ad biessani. Pałova ź ich atrymała kapsuły z kišačnymi bakteryjami, vyłučanymi z uzoraŭ donarskaha kału zdarovych ludziej, jakija dobra spali. Inšaj pałovie davali płaceba.
Pierad hetym udzielniki asnoŭnaj hrupy na praciahu dvuch dzion prymali antybijotyki, kab pamienšyć kolkaść ułasnych kišačnych bakteryj. Zatym jany atrymali 60 kapsuł z donarskaj mikrabijotaj, a praz dva tydni — jašče 20.
Jakaść snu daśledčyki aceńvali z dapamohaj palisamnahrafii. Padčas takoha abśledavańnia rehistrujucca mazhavyja chvali, ruchi vačej, sercabićcie, uzrovień kisłarodu i dychańnie čałavieka.
Praź miesiac efiektyŭnaść snu ŭ hrupie, jakaja atrymała TFM, vyrasła prykładna z 79% da 93%. Hety pakazčyk aznačaje dolu času, jakuju čałaviek sapraŭdy śpić, znachodziačysia ŭ łožku. U hrupie płaceba źmieny byli značna mienšymi — prykładna z 85% da 87%.
Jašče bolš prykmietnaj akazałasia roźnica ŭ načnych abudžeńniach. U pacyjentaŭ paśla pierasadki mikrabijoty čas niaspańnia paśla zasynańnia skaraciŭsia ŭ siarednim z 79 da 17 chvilin. U hrupie płaceba jon, naadvarot, krychu pavialičyŭsia — z 37 da 42 chvilin.
Adno z mahčymych tłumačeńniaŭ takoha efiektu źviazana z tak zvanaj vośsiu «kišečnik — mozh». Kišačnyja mikraarhanizmy vypracoŭvajuć rečyvy, jakija mohuć traplać praz kroŭ u mozh i ŭpłyvać na zapalenčyja pracesy, reakcyju arhanizma na stres i rehulacyju cykłaŭ snu i niaspańnia.
Pry hetym udzielniki, jakija atrymali TFM, paviedamlali pra palapšeńnie snu navat praz šeść miesiacaŭ paśla pracedury.
Niahledziačy na abnadziejlivyja vyniki, daśledavańnie maje šerah abmiežavańniaŭ. U im udzielničali tolki 80 čałaviek, a abjektyŭna jakaść ich snu aceńvali tolki adzin raz — praź miesiac paśla pačatku lačeńnia. Akramia taho, pierad transpłantacyjaj udzielniki prymali antybijotyki, tamu pakul składana dakładna vyznačyć, jakuju rolu ŭ palapšeńni snu adyhrała mienavita donarskaja mikrabijota.
Zastajecca i pytańnie ab pryčynna-vynikovaj suviazi: ci mohuć źmieny ŭ kišačnym mikrabijomie spryjać biessani, ci, naadvarot, parušeńni snu sami źmianiajuć jaho skład.
Tamu nieabchodnyja dalejšyja daśledavańni, kab lepš zrazumieć miechanizm hetaj suviazi. Pakul ža transpłantacyja fiekalnaj mikrabijoty zastajecca ekśpierymientalnym mietadam lačeńnia biessani.
Ciapier čytajuć
35 maładych biełarusaŭ i biełarusak, za jakimi varta sačyć: apublikavany pieršy śpis Next 3524
Kamientary