Kurdskija farmavańni ŭ Siryi abviaścili pra samarospusk i dałučeńnie da siryjskaha vojska
Lidar Siryjskich demakratyčnych sił (SDS) Mazłum Abdzi 26 žniŭnia zajaviŭ pra aficyjny rospusk arhanizacyi. Pavodle jaho słoŭ, SDS zaviaršyli praces intehracyi ŭ skład siryjskaha vojska i bolš nie buduć dziejničać jak samastojnaja ŭzbrojenaja siła, piša Euronews.
Siryjskija demakratyčnyja siły, jakija ŭznačalvajuć kurdy, paśla ŭradavaj apieracyi ŭ studzieni stracili značnuju častku terytoryj, jakija kantralavali na paŭnočnym uschodzie Siryi. Paśla hetaha baki damovilisia pra ŭklučeńnie kurdskich vajskovych i cyvilnych struktur u dziaržaŭnuju sistemu krainy.
Padčas baraćby z «Isłamskaj dziaržavaj» SDS byli hałoŭnym partnioram ZŠA ŭ Siryi. Adnak paśla zrynańnia Bašara Asada ŭ śniežni 2024 hoda Vašynhton pačaŭ naładžvać bolš ciesnyja adnosiny z novym kiraŭnictvam u Damasku na čale z časovym prezidentam Achmiedam aš-Šaraa.
Jašče tydzień tamu Abdzi paviedamlaŭ, što vajskovyja, siłavyja i administracyjnaja struktury SDS užo całkam intehravanyja ŭ dziaržaŭnyja instytuty. Pavodle jaho słoŭ, ciapier arhanizacyja pierachodzić da novaha etapu, a jaje palityčnaja dziejnaść budzie skiravanaja na zamacavańnie pravoŭ kurdaŭ u Kanstytucyi Siryi.
Pahadnieńnie ab intehracyi było dasiahnuta paśla niekalkich miesiacaŭ pieramoŭ. ZŠA nazvali jaho histaryčnym.
U studzieni 2026 hoda Achmied aš-Šaraa padpisaŭ ukaz, jaki harantuje nacyjanalnyja pravy kurdaŭ i pryznaje kurdskuju movu adnoj z nacyjanalnych. Kurdskaje śviata Naŭruz taksama atrymała status aficyjnaha vychadnoha dnia. Akramia taho, ukaz praduhledzieŭ nadańnie hramadzianstva kurdam, jakija doŭhi čas nie mieli paŭnavartasnaha pravavoha statusu.
Paśla bajoŭ u Alepa ŭ śniežni 2025 hoda SDS pahadzilisia advieści svaje padraździaleńni na terytoryi na zachad ad raki Jeŭfrat. Siryjskaje ministerstva abarony zajaviła, što na vyzvalenyja terytoryi buduć uviedzienyja ŭradavyja vojski.
Pry hetym zastajucca składanymi adnosiny pamiž kurdskimi farmavańniami i Turcyjaj. Ankara ličyć zasnavanyja SDS Narodnyja atrady samaabarony (NAS) siryjskim kryłom Rabočaj partyi Kurdystana (RPK). Tureckija ŭzbrojenyja siły raniej pravodzili suprać NAS i SDS niekalki vajennych apieracyj. RPK pryznana terarystyčnaj arhanizacyjaj Turcyjaj, ES, ZŠA, Vialikabrytanijaj i Francyjaj.
Lidar RPK Abduła Adžałan, jaki ciapier adbyvaje pažyćciovaje źniavoleńnie ŭ tureckaj turmie, taksama ličyŭ, što damoŭlenaści pamiž SDS i Damaskam mohuć paskoryć praces narmalizacyi situacyi ŭ Turcyi. U svaim zvarocie ŭ kancy 2025 hoda jon zajaviŭ, što pahadnieńnie stvaraje asnovu dla demakratyčnaj intehracyi i dyjałohu, a kanstruktyŭnaja rola Turcyi moža mieć važnaje značeńnie dla miru ŭ rehijonie.
Kamientary