Chto takaja Maryja Piatraška, jakaja stała tvaram prapahandysckich rolikaŭ, što vyśmiejvajuć mitynhoŭcaŭ
Pastupiła na śpiecyjalnaść «drukavanyja ŚMI», ale maryła pra telebačańnie, pavodziła siabie fanaberliva, pakutavała na zornuju chvarobu — mienavita tak charaktaryzujuć viadučuju ATN Maryju Piatraška jaje byłyja adnakurśniki z žurfaka. Chacia sama pra siabie jana paviedamlaje łakanična: «ccipłaje abajańnie intelihiencyi».
Paśla prezidenckich vybaraŭ u efiry «Biełaruś 1» źjavilisia siužety, u jakich raniej nieviadomaja viadučaja Maryja Piatraška vyśmiejvaje dziejańni apazicyi i mitynhoŭcaŭ. Karystalniki sacyjalnych sietak zadumalisia, ci nie pradstaŭnica jana taho samaha rasijskaha desanta prapahandystaŭ. Adnak vyjaviłasia, što heta ŭsio ž biełaruskaja žurnalistka.
Što Piatraška robić dla ATN?
Jašče ŭ 2019 hodzie Piatraška była aŭtarkaj pierazapuščanaha prajekta «Pakaleńnie BY», jaki raspaviadaŭ pra maładyja talenty Biełarusi. Jana zdymała roliki pra junych parłamientaryjaŭ. Paśla — načytvała tekst da siužetaŭ ź mižnarodnymi padziejami i navinami kštałtu «U karparacyi «Boinh» łamajuć hałavu, jak adnavić reputacyju», «Madonna raskrytykavała rašeńnie prynca Hary i Miehan Markł zastacca ŭ Kanadzie».
I voś litaralna sa žniŭnia dziaŭčyna zacikaviłasia biełaruskaj palitykaj.
Praŭda, navat za taki karotki termin isnavańnia jaje dvuchchvilinnych siužetaŭ tam paśpieli znajści mnostva fejkaŭ. Pra adzin ź ich my pisali raniej — jon źviazany ź niapravilnym pieralikam hałasoŭ za Łukašenku i Cichanoŭskuju płatformy «Hołas», pra inšuju niedakładnaść napisali MediaIQ.
Va ŭsich svaich vypuskach viadučaja starajecca akcentavać uvahu na tym, što sprabuje aśviatlać niekalki bakoŭ padziej, ale pry hetym sama jana jak reparcior za ŭvieś hety čas naviedała tolki mitynh «Za baćku», narezka ž alternatyŭnych maršaŭ biarecca z «Biełsata», «Radyjo Svaboda» i inšych niezaležnych ŚMI. Pieršyja mitynhi padajucca jak ščyryja i śviatočnyja, druhija — sumnieŭnyja, dzie ludzi sami nie viedajuć, navošta tudy pryjšli.
Ahulnaja rytoryka ŭ vypuskach niearyhinalnaja: «nie patrebny nam Majdan i arabskaja viasna, usie členy Kaardynacyjnaj rady kaardynujucca na Zachadzie» (jak śviedčańnie tamu raspovied pra toje, što Maryja Kaleśnikava parvała tolki biełaruski pašpart, a niamiecki dakumient na PMŽ u Hiermanii pakinuła). Na mierkavańnie aŭtaraŭ rolikaŭ, ich praca, jak i ŭsia dziejnaść ATN, «spatolvaje infarmacyjnuju smahu».
U apošnim z vypuskaŭ viadučaja asudžaje baćkoŭ, jakija biaruć z saboj na maršy dziaciej. Praŭda, nie zhadvaje pra Kolu Łukašenku.
A što jašče raniej?
Jak my i pisali vyšej, dziaŭčyna skončyła fakultet žurnalistyki BDU — śpiecyjalnaść «drukavanyja ŚMI».
Praha da telebačańnia pryviała jaje na ATN. Praŭda, usie svaje siužety, jak i svaju piersonu, viadučaja čamuści chavaje — u sacyjalnych sietkach Maryja Piatraška zrabiła ŭsie akaŭnty zakrytymi i źmianiła proźvišča na Maryjevu, a taksama zabłakavała byłych adnakurśnikaŭ, jakija adkryta vykazali svajo niehatyŭnaje staŭleńnie da jaje tvorčaści.
Sprabavała ŭdzielničać u konkursie «Mis-žurfak — 2014», ale ŭ vynikovy konkursny skład nie trapiła. Uvachodziła ŭ studenckuju radu pa jakaści adukacyi fakulteta žurnalistyki. Napisała dypłom pa temie «Narodnaja hazieta» ŭ kantekście sacyjalna-ekanamičnych pieraŭtvareńniaŭ».
Adnakurśniki zhadvajuć, što z Maryjaj mała chto siabravaŭ praz toje, što jana ličyła siabie vyšejšaj za inšych i chvareła na zornuju chvarobu. Na parach dziaŭčyna čaściakom siadzieła asobna ad astatnich.
Palitykaj Maryja nie cikaviłasia, tolki vykazvałasia pra vielič Uładzimira Pucina. Darečy, paralelna z BDU Maryja pastupiła jašče i ŭ rasijski MDU, vielmi hetym hanaryłasia i zhadvała pry lubym zručnym momancie. U Minsku zastałasia, kab nie marnavać hrošy.
35 maładych biełarusaŭ i biełarusak, za jakimi varta sačyć: apublikavany pieršy śpis Next 3532
Kamientary