Dziaŭčynie, što raśpisała ščyty la Pałaca Niezaležnaści, dali dva hady kałonii. Jaje chłopcu — paŭtara
U sudzie Kastryčnickaha rajona Minska 22 studzienia byli vyniesienyja prysudy Safii Małaševič i Cichanu Klukaču. Jany pryznanyja vinavatymi pa ŭsich artykułach.
Safija atrymała dva hady pazbaŭleńnia voli ŭ kałonii ahulnaha režymu, Cichan — hod i šeść miesiacaŭ pazbaŭleńnia voli ŭ kałonii ahulnaha režymu. Takoje pakarańnie i prasiŭ prakuror, paviedamlaje spring96.org.
Ich abvinavacili ŭ tym, što jany raśpisali bałončykami ščyty śpiecsrodkaŭ zaharody na akcyi pratestu šostaha vieraśnia (č. 2 art. 339 KK RB), a taksama ŭdzielničali ŭ dziejańniach, jakija hruba parušajuć hramadski paradak (art. 342 KK). Akramia taho, Safii Małaševič vystavili abvinavačańnie ŭ publičnaj abrazie prezidenta (art. 368 KK RB).
Padčas suda abvinavačańnie admoviłasia ad abvinavačańnia Cichana Klukača pa č. 2 art. 339. Prakuror zaprasiŭ dla chłopca adzin hod i šeść miesiacaŭ pazbaŭleńnia voli ŭ kałonii ahulnaha režymu (pa č. 1 art. 342).
Abvinavačańnie taksama pierakvalifikavała č. 2 art. 339, zhodna ź jakoj abvinavačvajuć Safiju Małaševič, na č. 1 art. 339. Takim čynam, šlacham składańnia pakarańniaŭ pa troch artykułach (č. 1 art. 368, č. 1 art. 342, č. 1 art. 339) dla jaje prakuror zaprasiŭ dva hady pazbaŭleńnia voli ŭ kałonii ahulnaha režymu.
Praces viała sudździa suda Kastryčnickaha rajona Volha Niaborskaja. Dziaržabvinavaŭca — Uljana Rudnickaja.
Kamientary