Ekśpiert: Rychtujecca tatalnaja zabarona luboj publičnaj krytyki situacyi ŭ krainie
Iduć paviedamleńni ab padrychtoŭcy biełaruskimi dziaržorhanami sapraŭdy drakonaŭskich źmianieńniaŭ u zakanadaŭstva. U pryvatnaści, ab płanach niejmavierna pašyryć dziejańnie artykuła KK 369-1, piša ekśpiert Andrej Jelisiejeŭ.
«Naŭmysnaje raspaŭsiudžvańnie ŭ luboj formie zahadzia łžyvych źviestak ab palityčnym, ekanamičnym, sacyjalnym, vajennym abo mižnarodnym stanoviščy RB, nakiravanaje na pryčynieńnie škody nacyjanalnaj biaśpiecy RB, prapanujecca karać aryštam abo pazbaŭleńniem voli na termin da troch hadoŭ», — takaja norma zakona prapanavanaja.
Kali heta budzie pryniata ŭ takim vyhladzie, uličvajučy jašče i biaźmiežnuju pravavuju praktyku, to faktyčna adbudziecca zabojstva analityčnaha žanru ŭ ŚMI, a taksama pracy daśledčych centraŭ luboha kštałtu.
Pry takoj razmytaj farmuloŭcy i pry volnym tłumačeńni sudovymi orhanami luby krytyčny ekśpiertny kamientar možna budzie padvieści pad dziejańnie artykuła, miarkuje Andrej Jelisiejeŭ.
Usim viadoma absurdnaja kryminalnaja sprava ŭ dačynieńni da žurnalistki TUT.BY Kaciaryny Barysievič i doktara balnicy chutkaj miedycynskaj dapamohi Arcioma Sarokina, jakija prainfarmavali hramadskaść ab adsutnaści ałkaholu ŭ kryvi zabitaha Ramana Bandarenki.
A kali tak, to dziaržorhanam ničoha nie budzie kaštavać pryciahvać za vušy źmienieny artykuł KK da luboj niepažadanaj acenki sacyjalna-ekanamičnaj abo palityčnaj situacyi ŭ krainie.
Ekanamist pakrytykavaŭ adstałuju sistemu sacyjalnaha zabieśpiačeńnia ŭ Biełarusi ŭ svaim artykule, palitołah abo pravaznaŭca rastłumačyŭ u radyjoprahramie, čamu biełaruskaja Kanstytucyja — fikcyja, mižnarodnik vykazaŭsia ab pravale zamiežnaj palityki ŭ fejsbuku — usich ich tady mohuć pry žadańni abvinavacić u «naŭmysnym raspaŭsiudzie zahadzia łžyvych źviestak». I nijakija spasyłki na abjektyŭnyja ličby i navukovyja arhumienty nie dapamohuć.
Sapraŭdy hetak ža, jak nie dapamahajuć šmatlikim zatrymanym videamateryjały, jakija adnaznačna abviarhajuć viersii pra čas, miesca i abstaviny ich zatrymańnia, a achviaram katavańniaŭ nie dapamahajuć dakumientalna zafiksavanyja śpiecyjalistami charaktarystyki naniesienych im paškodžańniaŭ (usio vydumali i «mazali farbaj» — tak skazali źvierchu).
Praz takija źmieny ŭ zakanadaŭstva płanujuć vypalić usialakuju abjektyŭnuju acenku padziej u krainie ŭ anłajn ŚMI, začyścić ciapier užo i anłajn-prastoru. Usia, navat navukova i faktałahična abhruntavanaja, krytyka ryzykuje syści ŭ ananimnyja telehram-kanały.
Ciapier čytajuć
Pamiatajecie paru studentki i vykładčyka, dzie jon starejšy na 31 hod? Akazvajecca, jon byŭ śviatarom, a jana vučyłasia na rehientku9
Kamientary