Zamiest štrafu za samahon — kryminalnaja sprava: na Słuččynie žančyna raśpichała chabar pa kišeniach učastkovym pakul jaje zdymali na kamieru
Sproba paźbiehnuć administracyjnaj adkaznaści za handal nielehalnym ałkaholem abiarnułasia dla 52‑hadovaj žycharki Słuckaha rajona kudy bolš surjoznymi prablemami z zakonam. Žančyna praihnaravała papiaredžańni milicyjanieraŭ i litaralna siłkom uručyła im hrošy, što pryviało jaje ŭ izalatar.
Historyja pačałasia ź sihnału ŭ pravaachoŭnyja orhany: niechta paviedamiŭ, što ŭ adnym ź miascovych ahraharadkoŭ žančyna arhanizavała kropku pa prodažy śpirtnoha prosta ŭ siabie doma. Učastkovyja inśpiektary, jakija prybyli z pravierkaj pa ŭkazanym adrasie, paćvierdzili infarmacyju i znajšli nielehalny ałkahol.
Haspadyni patłumačyli, što za niezakonnuju pradprymalnickuju dziejnaść joj daviadziecca adkazać pavodle administracyjnaha kodeksa. Adnak pierśpiektyva aficyjnaha raźbiralnictva žančynu nie zadavoliła.
Kab zamiać spravu i paźbiehnuć pratakoła, parušalnica prapanavała kožnamu ź milicyjanieraŭ pa 200 rubloŭ. Pravaachoŭniki nieadnarazova papiaredzili haspadyniu, što prapanova hrošaj słužbovaj asobie — heta złačynstva. Niahledziačy na heta, žančyna vyrašyła dziejničać nastojliva: jana prosta padyšła i samastojna pakłała kupiury va ŭniformu inśpiektaraŭ. Jana nie ŭličyła adnu detal — usie jaje dziejańni bieśpierapynna zapisvalisia na nahrudnuju videakamieru supracoŭnika milicyi.
Finał historyi akazaŭsia zusim nie taki, na jaki raźličvała parušalnica. Jaje zatrymali naŭprost va ŭłasnym domie.
Jak prakamientavaŭ situacyju načalnik upraŭleńnia achovy pravaparadku i prafiłaktyki UUS Minskaha abłvykankama Anatol Suščenia, śledčyja ŭžo ŭzbudzili ŭ dačynieńni da viaskoŭki kryminalnuju spravu za daču chabaru. Ciapier zamiest zvyčajnaha administracyjnaha štrafu za handal ałkaholem žančynie pahražaje značna bolš surovaje kryminalnaje pakarańnie.
Kamientary