2018 hod. Mašyny pad kiraŭnictvam sietki Skajnet źniščajuć ludziej...
Terminatar 4 (Terminator Salvation)
ZŠA – Vialikabrytanija – Niamieččyna, 2009, kalarovy, 115 chv.
Režysior: Džozef Makhinci Nikał
Roli vykonvajuć: Kryścijan Bejł, Sem Ŭorcinhtan, Anton Jelčyn, Mun Bładhud, Chielena Bonem-Karter, Arnold Švarcnehier
Žanr: fantastyčny postapakaliptyčny bajavik
Adznaka: 6 (z 10)
2018 hod. Mašyny pad kiraŭnictvam sietki Skajnet źniščajuć ludziej. Džon Konar viadzie vajnu suprać robataj, ale nie hałoŭnych rolach. Źviestak, što pakinuła jamu matula, jakaja ŭpieršyniu sutyknułasia z terminatarami, hieroju brakuje. A tut jašče zahadkavy Markus Rajt – hieroj ludziej ci ahient mašynaŭ…
Praciaham słynnych karcinaŭ pryznačany nialohki los. Kab zadavolić fanaŭ treba paŭtarać užo viadomyja vobrazy – i adnačasova być novym.
Treci terminatar paśla hieraičnych dvuch – paŭtaraŭ vobrazy, ale vyhladaŭ ledźvie nie samaparodyjaj. Čaćviorty musiŭ prapanoŭvać novuju siužetnuju liniju, tym bolej, što najlepšy robat Arnold Švarcnehier siońnia terminuje nie kino, a kalifarnijcaŭ na pasadzie tamtejšaha hubiernatara. (Ale heta nie pieraškodziła jamu źjavicca ŭ doŭhačakanym epizodzie (rubon!), ščodra nasyčanym kamputarnaj apracoŭkaju).
Składanuju zadaču čaćviorty terminatar, jak moh, vykanaŭ. Jość navučany chorarami Kryścijan Bejł – Džon Konar, jaki refleksuje. Jość postapakaliptyčnaje pryšłaje – z vypalenaj ziamloj, kancłahierami dla ludziej i robatami achoŭnikami. Jość vuścišnyja mašyny, što dziŭna transfarmujucca.
I jość novy hieroj, jaki achviaruje saboj. I niavažna, što siužetnyja linii nie zaŭždy źviazvajucca, što novy film nahadvaje inšuju kinafantastyku («Terminatary» sami ž jaje sparadzili!). Misija jašče nie zavieršana.
Ščaślivaj darohi!
Kamientary