Patencyjnaje załatoje dno: zdabyča kankrecyi na dnie akijana
U śviecie znoŭ razharajecca sprečka nakont płanaŭ pa hłybakavodnaj zdabyčy karysnych vykapniaŭ.
Na praciahu mnohich hadoŭ eka-aktyvisty vystupali suprać idei zdabyčy mietałaŭ z marskich hłybiń. Ciapier ich padtrymali takija bujnyja kampanii, jak BMW, Volvo, Google i Samsung. Jany zaklikajuć da maratoryja na hłybakavodnuju zdabyču karysnych vykapniaŭ, paviedamlaje BBC.
Hety krok raskrytykavali inšyja kampanii, jakija ŭdzielničajuć u raspracoŭcy płanaŭ pa zdabyvańni minierałaŭ na dnie akijana. Jany pierakananyja, što heta bolš metazhodna, čym zdabyvać karysnyja vykapni na sušy.
Kancepcyja zdabyčy hłybakavodnych mietałaŭ uźnikła ŭ 1960-ch hadach. Tady daśledčykaŭ zachapiła ideja zdabyvańnia minieralnych utvareńniaŭ, jakija nazyvajucca kankrecyjami, z hłybiń akijana. Jany bahatyja na kaštoŭnyja minierały, ale cikavaść da ich uzmacniłasia ŭ apošnija hady, kali stała viadoma, što mnohija z kankrecyj majuć u składzie kobalt i inšyja mietały, nieabchodnyja dla batarej u elektramabilach.
Dziasiatki pradpryjemstvaŭ daśledujuć rajony Cichaha i Indyjskaha akijanaŭ, a niekatoryja kampanii raspracavali vializnyja rabatyzavanyja mašyny dla pierasoŭvańnia pa marskim dnie ŭ pošukach kankrecyj, jakija paśla mohuć pieradavacca karablam na pavierchni. Adna z takich pryładaŭ užo vypraboŭvałasia ŭ Ispanii ŭ 2019 hodzie.
Adnak hrupy, jakija zajmajucca prablemami navakolnaha asiarodździa, zaklikajuć da maratoryja na zdabyču hłybakavodnych mietałaŭ da taho času, pakul nie źjavicca bolš źviestak nakont mahčymych nastupstvaŭ takoj zdabyčy. Da ich dałučylisia bujnyja kampanii, siarod jakich viadomy aŭtavytvorca BMW.
Kłaŭdyja Bekier, staršy ekśpiert BMW pa ŭstojlivych pastaŭkach, miarkuje, što hłybakavodnaja zdabyča moža mieć niezvarotnyja nastupstvy. Kankrecyi na dnie akijana ŭtvaralisia na praciahu miljonaŭ hadoŭ, i pakul nieviadoma, kolki vidaŭ zaležyć ad ich i jak heta paŭpłyvaje na charčovy łancuh. Hałoŭnaja pryčyna, pa jakoj BMW padtrymlivaje maratoryj, — adsutnaść padrabiaznych daśledavańniaŭ, jakija b dazvolili acanić ryzyku.
Taksama Bekier dadaje, što, choć šachty na sušy i abvinavačvajuć u zabrudžvańni navakolnaha asiarodździa i vysiečcy lasoŭ, dla ich raspracoŭvajucca vysokija standarty i inšyja šlachi vyrašeńnia prablem. Dla hłybiniaŭ akijana, u svaju čarhu, pakul niama instrumientaŭ kantrolu, kab aceńvać nastupstvy zdabyčy karysnych vykapniaŭ.
Adnak kampanija DeepGreen, jakaja płanuje zdabyvać kankrecyi ŭ Cichim akijanie, ličyć, što aŭtavytvorcy pavodziać siabie biezadkazna, bo hłybakavodnaja zdabyča moža zabiaśpiečyć syravinu dla chutkaha pierachodu da nulavoha vykidu vuhlarodu.
Tym nie mienš, umiašańnie čatyroch bujnych kampanij u dyskusiju ŭzmacniaje nieabchodnaść praviadzieńnia dadatkovych daśledavańniaŭ dla adkazu na klučavyja pytańni.
Minskija ŭłady raskazali, jak buduć zmahacca z «akijanam aŭtamabilaŭ» u dvarach2
Kamientary