Minčuk chacieŭ pieravieści biez kamisii hrošy i straciŭ 150 rubloŭ
Što adkazali ŭ banku?
U Onliner.by napisaŭ čytač, jaki sutyknuŭsia z kamisijaj pry pieravodzie kitajskich juaniaŭ u Biełarusbanku. Jon raspavioŭ, što paśla zaličeńnia 15 000 juaniaŭ na rachunak z sumy ŭtrymali kala 2% — amal 150 rubloŭ.
Mužčyna śćviardžaje, što pierad pieravodam udakładniŭ umovy ŭ adździaleńni banka i atrymaŭ infarmacyju, što dadatkovaj kamisii za pastupleńnie juaniaŭ z rachunku inšaha banka nie budzie, kali tolki bank-adpraŭnik sam nie ŭtrymaje svaju kamisiju.
Ale praź piać dzion paśla zaličeńnia jon vyjaviŭ, što z sumy ŭtrymali kala 2% — amal 150 rubloŭ.
— Ja ŭdakładniaŭ hety momant u adździaleńni pierad pieravodam, tamu byŭ upeŭnieny, što dadatkovych vydatkaŭ nie budzie, — nastojvaje jon.
Pavodle słoŭ klijenta, paśla zvarotu ŭ bank jamu paviedamili, što razhledzieć pretenziju nie mohuć, pakolki kansultacyja supracoŭnika nie zapisvałasia.
Jak patłumačyli ŭ Biełarusbanku, kamisija za zaličeńnie srodkaŭ na rachunki fizičnych asob u zamiežnaj valucie, u tym liku ŭ kitajskich juaniach, sapraŭdy jość, kali inšyja ŭmovy nie ŭstanoŭlenyja damovaj.
Pamier uznaharodžańnia składaje 2% ad sumy valuty ździełki ŭ ekvivalencie biełaruskich rubloŭ, ale nie bolš za 700 rubloŭ. Kamisija raźličvajecca pavodle kursu Nacyjanalnaha banka na dzień praviadzieńnia apieracyi.
U Biełarusbanku ŭdakładnili, što takoje ŭznaharodžańnie nie spahaniajecca, kali pamiž bankam i płacielščykam zaklučany dahavor na adpaviedny vid pieravodu, a taksama ŭ šerahu inšych vypadkaŭ. Siarod ich — pieravody z rachunkaŭ fizičnych asob, adkrytych u samim banku, apieracyi praź sistemu imhniennych płaciažoŭ, viartańnie niavykananych mižnarodnych pieravodaŭ i niekatoryja sacyjalnyja vypłaty.
Daviedacca pra pamier kamisii da praviadzieńnia apieracyi možna ŭ Zborniku ŭznaharodžańniaŭ banka na sajcie Biełarusbanka, a taksama praz kantakt-centr abo ŭ adździaleńni.
Ciapier čytajuć
U Minsku masažyst Andrej tajemna zdymaŭ hołych klijentak27
Kamientary