Navukoŭcy vyznačyli ptušku z samym pryhožym śpievam

Ci možna navukova vyznačyć, jakaja ptuška śpiavaje najpryhažej? Jak piša Daily Mail, daśledčyki ź Ciubinhienskaha ŭniviersiteta pasprabavali heta zrabić — i zaadno vyśvietlili, što mienavita ŭ ptušynych hałasach padabajecca ludziam.

Dla ekśpierymientu jany adabrali zapisy 123 vidaŭ dzikich ptušak, raspaŭsiudžanych u Hiermanii. Siarod ich byli jak słavutyja «śpievaki», tak i vidy, čyje hałasy chutčej nahadvajuć kryki, chrypieńnie ci hahatańnie.

84 udzielnikam prapanavali pasłuchać 15‑siekundnyja zapisy hałasoŭ ptušak i acanić ich pryjemnaść pa škale ad adnaho da piaci. I husty ludziej byli dastatkova padobnymi, kab skłaŭsia vyrazny rejtynh.

Najvyšejšuju siaredniuju acenku 4,52 bała atrymaŭ čorny drozd. Jaho śpieŭ apisvajuć jak nasyčany i miakki, z čystymi hukami, padobnymi da flejty.

Na druhim miescy apynułasia pienačka-viaśnička ź jaje piaščotnym śpievam, na trecim — čornahałovaja vałasianačka, čyj hołas adroźnivajecca bahaćciem i raznastajnaściu hukaŭ. U piaciorcy taksama šery drozd (4,33 bała) i sadovaja vałasianka (4,3).

A voś sałaviej, jaki tradycyjna ličycca adnym z najlepšych ptušynych śpievakoŭ, u pieršuju piaciorku nie trapiŭ. Jon atrymaŭ 4,26 bała i zaniaŭ vośmaje miesca.

Najmienš pryjemnym ludzi paličyli hołas sipuchi, jaki acanali na 1,32 bała. Hetaja sava vydaje rezki praniźlivy kryk, jaki mała nahadvaje toje, što zvyčajna nazyvajuć ptušynym śpievam.

Krychu lepš vystupiła nilskaja huś — 1,62 bała. Jaje hukavy repiertuar uklučaje burčańnie, chrypłyja kryki i hahatańnie. Śledam idzie šeraja čapla ź jaje rezkim sipłym hołasam. I zamykajuć piaciorku aŭtsajdaraŭ sapsan (1,67 bała) i sojka (1,73).

Što robić ptušyny śpieŭ pryjemnym

Ale daśledčykaŭ cikaviŭ nie tolki sam rejtynh. Jany chacieli vyśvietlić, što abjadnoŭvaje ptušynyja hałasy, jakija zdajucca ludziam najbolš pryjemnymi.

Analiz pakazaŭ niekalki zakanamiernaściaŭ. Ludziam bolš padabalisia składanyja i raznastajnyja hałasy. Pryjemniej usprymalisia taksama adnosna vysokija i nie zanadta hučnyja huki, a jašče śpievy z vuziejšym dyjapazonam častot.

Była zaŭvažana i bolš śpiecyfičnaja asablivaść: ptuški z vysokimi acenkami radziej vydavali huki ŭ tym dyjapazonie častot, da jakoha čałaviečy słych asabliva adčuvalny.

Cikava, što dla acenki ptušynaha śpievu zusim nie abaviazkova było raźbiracca ŭ ptuškach. Viedy ŭdzielnikaŭ pra ich, a taksama zdolnaść paznavać vidy pa vyhladzie ci hołasie nie ŭpłyvali na toje, nakolki pryjemnymi im zdavalisia zapisy.

A voś staŭleńnie da samich ptušak mieła značeńnie: udzielniki, jakija bolš ich canili, u cełym stavili ptušynym hałasam vyšejšyja acenki.

Ale čamu čałaviečamu vuchu padabajucca mienavita takija huki? Dakładnaha adkazu ŭ daśledčykaŭ pakul niama. Aŭtary dapuskajuć, što heta moža być źviazana z tym, jak čałaviek usprymaje navakolnaje asiarodździe: raznastajnyja huki ŭmieranaj hučnaści i častaty mohuć słužyć dla nas sihnałam biaśpiečnaha i zdarovaha miesca, dzie možna rassłabicca i adnavicca.

Zrešty, ekśpierymient nie dazvalaŭ uličyć usie asablivaści ptušynaha hołasu. Naprykład, daśledčyki nie praviarali, ci maje značeńnie toje, jak časta ptuška padaje hołas, choć heta taksama moža ŭpłyvać na jaho ŭsprymańnie.

Aŭtary daśledavańnia miarkujuć, što ich vysnovy mohuć dapamahčy ŭ palapšeńni haradskich parkaŭ i ŭdaskanaleńni hukavoha asiarodździa miescaŭ, jakija vyklikajuć stres, naprykład, pakojaŭ čakańnia ŭ balnicach. Akramia taho, heta moža paspryjać spravie achovy pryrody praz papularyzacyju ptušak z asabliva cudoŭnymi hałasami.

• 6
• 0
• 0
• 0
• 0
• 0
• 0
• 3