Najstarejšy ŭ Jeŭropie časopis pra kino pryśviaciŭ numar Biełarusi
Śviežy numar časopisa «Mastactva kino», što vychodzić u Rasii z 1931 hoda, pryśviečany Biełarusi. Na jaho vokładcy rabota mastački Rufiny Bazłavaj, a ŭnutry — teksty pra filmy, što raskazvajuć pra padziei minułaha hoda ŭ Biełarusi, i padborka aktualnych biełaruskich pjes.
Pra źmiest novaha numara ŭ svaim fejsbuku raskazaŭ jaho hałoŭny redaktar, viadomy kinakrytyk Anton Dolin. Centralnaj temaj vydańnia stała Biełaruś.
Na vokładcy raźmieščana rabota biełaruskaj mastački ŭ Prazie Rufiny Bazłavaj — jaje čyrvona-biełaja vyšyŭka stała šyroka viadomaj paśla padziej žniŭnia.
Vokładka adsyłaje da dakumientalnaha filma «Kuraž» Alaksieja Pałujana, premjera jakoha adbyłasia sioleta na Bierlinale. Materyjał pra stužku dla časopisa napisaŭ biełaruski kinakrytyk i prahramny dyrektar kinafiestyvalu «Listapad» Ihar Sukmanaŭ.
Praz toje, što hierojami «Kuraža» stali akciory teatra, «Mastactva kino» zrabiła padborku najnoŭšych biełaruskich pjes, što zakranajuć temu pratestaŭ, — heta pjesy Nastaśsi Vasilevič, Jaŭhienii Bałakiravaj, Paŭła Pražko i Sašy Filipienki.
Tema Biełarusi zaviaršajecca tekstam rasijskaha režysiora Barysa Huca, jaki źniaŭ film Minsk i pryśviaciŭ jaho padziejam žniŭnia. Praca nad karcinaj jašče idzie, jaje premjera adbudziecca na adnym z bujnych kinafiestyvalaŭ.
Kamientary