U rasijanina skrali navušniki ŭ ciahniku Minsk-Maskva — ciapier jany ŭspłyli ŭ Baranavičach
Rasijanin paprasiŭ biełarusaŭ dapamahčy viarnuć navušniki Apple, jakija źnikli ŭ jaho ŭ ciahniku Minsk-Maskva. Dziakujučy hieałakacyi mužčyna vyśvietliŭ, što ciapier AirPods znachodziacca ŭ Baranavičach. Biełarusy žartujuć — spačatku viarnicie kryž Jeŭfrasińni Połackaj.
«Pavažanyja biełaruskija siabry! Maje navušniki Apple skrali 27 vieraśnia ŭ ciahniku Minsk-Maskva», — napisaŭ mužčyna ŭ Treds.
Pavodle jaho, ciapier navušnikami karystajecca čałaviek, jaki žyvie nasuprać baranavickaha supiermarkieta «Karona». Da dopisu rasijanin prykłaŭ skrynšoty z prahramy «Łakatar»: pryłada pakazvajecca ŭ rajonie vulicy Nakaniečnikava.
Sam rasijanin ciapier znachodzicca ŭ Kitai i płanuje viarnucca ŭ Biełaruś praz dva miesiacy. Jon pacikaviŭsia, jak možna zabrać svaju reč, i vykazaŭ spadzieŭ na «vielmi strohija zakony nakont kradziažu i niezakonnaha prysvajeńnia čužoj majomaści».
Niekatoryja paraili mužčynu pakinuć AirPods u režymie zhublenaj pryłady, kab na ekranie taho, chto pasprabuje imi skarystacca, źjavilisia kantaktnyja danyja ŭładalnika. Adzin z kamientataraŭ raskazaŭ padobnuju historyju: u jaho skrali zaplečnik z iPad, ale paśla zvanka ŭ milicyju rečy viarnuli tak chutka, što jon nie paśpieŭ dajeści zakaz u «Makdonaldsie».
«Tamu telefanujcie ŭ milicyju. Moža, vam pašancuje, i, niahledziačy na toje, što vy za miažoj, vaš zvarot prymuć», — paraiŭ jon.
Aŭtar patłumačyŭ, što jašče ŭ ciahniku pieravioŭ AirPods u režym zhublenaj pryłady, ale śpiašaŭsia na samalot i tamu nie paśpieŭ adrazu źviarnucca «ŭ palicyju».
Ale najbolšuju padtrymku nabraŭ kamientar «Viarnicie kryž Jeŭfrasińni Połackaj, potym pahavorym» — jon atrymaŭ bolš za 630 łajkaŭ.
Znajšlisia i tyja, chto byŭ hatovy dapamahčy bolš pradmietna. Adna z žycharak Baranavičaŭ napisała, što znachodzicca prykładna za 500 mietraŭ ad navušnikaŭ, ale sama zabrać ich nie moža: «Tolki milicyja». Kali jaje spytali, čamu b prosta nie schadzić pa pryładu, žančyna paprasiła dakładny adras i zaŭvažyła, što, miarkujučy pa hieałakacyi, navušniki ŭvohule lažać na parkoŭcy.
A niekatoryja zasumniavalisia ŭ viersii pra kradziež.
«Moža, nie skrali, a niechta zhubiŭ?» — spytali ŭ aŭtara. Inšyja zaŭvažyli, što čałaviek, u jakoha ciapier znachodziacca AirPods, moh znajści ich u ciahniku ci nabyć u kahości, nie viedajučy pra ich pachodžańnie. Tamu hieałakacyja sama pa sabie jašče nie dakazvaje, chto i pry jakich abstavinach ich zabraŭ.
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha16
Kamientary