Repier Pi Dzidzi kupiŭ sabie raskošnaje žyćcio ŭ turmie: prysłuha ź viaźniaŭ, kańjak ad achovy i prahlad filmaŭ pra ŭłasnaje padzieńnie

Vosieńniu 2024 hoda aryšt adnaho z samych upłyvovych i bahatych ludziej u historyi chip-chopa šakavaŭ šou-biźnies. Paśla vaśmitydniovaha sudovaha pracesu ŭletku 2025 hoda Kombs byŭ apraŭdany pa najbolš ciažkich artykułach ab rekiecie i seks-trafiku (znakamitaja sprava ab arhanizacyi masavych seksualnych viečarynak «freak-offs»), adnak pryznany vinavatym pa dvuch epizodach transparciroŭki ludziej z metaj prastytucyi.

Atrymaŭšy 50 miesiacaŭ źniavoleńnia, u kastryčniku 2025 hoda jon byŭ pieraviedzieny ź izalatara ŭ Bruklinie ŭ fiederalnuju turmu nizkaha ŭzroŭniu biaśpieki Fort-Dyks u štacie Ńju-Džersi.

Ad kitajskaha masažu da kuraniaci kary

Jak pakazvaje rasśledavańnie telekanała NBC News, zasnavanaje na śviedčańniach čatyroch źniavolenych z adnaho błoka z muzykantam, Kombs faktyčna pieratvaryŭ sukamiernikaŭ u svoj asabisty absłuhovy piersanał.

«Heta nie niejkaje zvyčajnaje dziarmo, jakoje vy bačycie ŭ turmie. Heta bahataje dziarmo, — cytuje NBC News adnaho sa źniavolenych. — Heta vyhladaje varjactvam, ale znoŭ ža, heta Dzidzi».

Apłata pracy absłuhovaha piersanału abychodzicca Kombsu ŭ tysiačy dalaraŭ štomiesiac. Finansavańnie adbyvajecca nie naŭprost: davieranyja asoby mahnata na voli pieravodziać hrošy na asabovyja turemnyja rachunki (commissary accounts) tych viaźniaŭ, jakija pahadzilisia na jaho pracavać.

U pieralik pasłuh uvachodzić myćcio bializny, zaściłańnie łožka, a taksama ŭborka kamiery, tualeta i dušavoj kabiny niepasredna pierad kožnym ich vykarystańniem Kombsam. Asobnyja źniavolenyja pradastaŭlajuć jamu pasłuhi kitajskaha kropkavaha masažu.

Pakolki turemnaje mieniu nie zadavalniaje mahnata, jon najmaje źniavolenych dla pryhatavańnia indyvidualnych straŭ — kuraniaci kary, picy i empanadas, jakija hatujucca z dapamohaj samarobnych nahravalnych elemientaŭ, pahružanych u vadu.

«Praź niekatory čas ja stamiŭsia hatavać. Tady jon pačaŭ źviartacca da jamajcaŭ», — raskazaŭ žurnalistam adzin z byłych turemnych kucharaŭ Pi Dzidzi.

Asobnyja viaźni vykonvajuć funkcyi zachavalnikaŭ listoŭ ad fanataŭ, pakolki abjom karespandencyi mahnata pieravyšaje dapuščalnyja limity dla zachoŭvańnia ŭ adnoj kamiery.

Telefony, antydepresanty i kańjak ad achovy

Niahledziačy na strohija praviły Fiederalnaha biuro turmaŭ ZŠA (BOP), Kombs maje bieśpierabojny dostup da zabaronienych pradmietaŭ.

«Vy možacie atrymać praktyčna ŭsio, akramia kluča ad uvachodnych dźviarej i žančyny», — patłumačyŭ situacyju na čornym rynku Fort-Dyks adzin z surazmoŭcaŭ kanała.

Zhodna z rasśledavańniem, muzykant vykarystoŭvaje kantrabandnyja smartfony dla kiravańnia staronkaj u Instagram i prahladu intymnych fatahrafij, jakija jamu dasyłaje byłaja znajomaja.

Siarod miedykamientaŭ Kombs rehularna nabyvaje ŭ inšych źniavolenych antydepresant «Remieron» (Remeron), jaki vykarystoŭvajecca na turemnym čornym rynku vyklučna dziela palapšeńnia nastroju.

Taksama paviedamlajecca pra najaŭnaść u mahnata schovišča z elitnym ałkaholem, u pryvatnaści, kańjakom Hennessy, jaki pranosicca na terytoryju turmy karumpavanymi supracoŭnikami achovy i raśpivajecca ŭ vuzkim kole pa vychadnych.

Asobnaj detallu rasśledavańnia staŭ fakt najaŭnaści ŭ Pi Dzidzi «ŭzłamanaha» płanšeta. Vydańnie Billboard adznačaje, što praź jaho muzykant hladzieŭ navat dakumientalny sieryjał «Sean Combs: The Reckoning» ad Netflix, jaki byŭ spradziusavany jaho daŭnim kankurentam — repieram 50 Cent — i pryśviečany historyi padzieńnia i seksualnych złačynstvaŭ samoha Kombsa.

Daviedaŭšysia pra heta, 50 Cent iranična adreahavaŭ u svaich sacsietkach: «Cha-cha-cha, zacanicie maju dakumientałku pra Šona Kombsa na Netflix, jakaja chutka źjavicca ŭ turmie pobač z vami».

Reakcyja ŭładaŭ

Prablema kantrabandy ŭ Fort-Dyks maje sistemny charaktar: tolki ŭ vieraśni 2026 hoda prakuratura vystaviła abvinavačvańni piaci asobam, u tym liku dziejučamu i byłomu supracoŭnikam achovy, u arhanizacyi kanałaŭ pastaŭki telefonaŭ, zbroi i narkotykaŭ z dapamohaj dronaŭ.

Adrazu paśla vychadu repartažu NBC News turemnaja administracyja pačała čarhovaje ŭnutranaje rasśledavańnie, a samoha Kombsa terminova pieraviali ŭ adzinočnuju kamieru (Special Housing Unit).

Heta nie pieršy jaho termin u izalatary: letam 2026 hoda jon užo traplaŭ tudy paśla bojki ź inšym źniavolenym, praz što byŭ taksama vyklučany z prestyžnaj prahramy reabilitacyi ad narkazaležnaści. Praz hetyja parušeńni prahnazujemaja data jaho vyzvaleńnia nieadnarazova źmianiałasia i, pavodle rejestra BOP, ciapier pryznačana na 21 studzienia 2028 hoda.

PR-pradstaŭnik Kombsa ŭ kamientary časopisu People abvierh infarmacyju pra asablivyja ŭmovy, zajaviŭšy, što ŚMI «vydajuć zvyčajnyja detali turemnaha žyćcia za naviny», a jaho klijent adbyvaje pakarańnie ŭ strohaj adpaviednaści z praviłami.

Pry hetym, niahledziačy na miljardnyja statki, mahnat pačaŭ sutykacca ź finansavymi prablemami. Časopis Essence dadaje, što ŭ vieraśni advakaty admovilisia pradstaŭlać intaresy Kombsa ŭ šmatlikich hramadzianskich pazovach, pakolki jon bolš za paŭhoda nie apłačvaŭ jurydyčnyja rachunki i pierastaŭ supracoŭničać ź linijaj abarony.

• 1
• 0
• 5
• 3
• 0
• 0
• 5
• 0