U Łondanie kamiery raspaznali bolš za paŭmiljona tvaraŭ. Vynik — adzin «złačyniec». Dy i jon nie toj
Brytanskaja transpartnaja palicyja paŭhoda testavała na vakzałach Łondana sistemu raspaznavańnia tvaraŭ u realnym časie. Za hety pieryjad jana praskanavała bolš za paŭmiljona čałaviek. Heta abyšłosia prykładna ŭ $426 tysiač i ni razu nie dapamahło zatrymać čałavieka sa śpisu nazirańnia. Adzinaje spracoŭvańnie akazałasia pamyłkovym. Adnak, jak piša The Guardian, ekśpierymient nie spynili, a pašyryli na stancyi łondanskaha mietro.
Piłotny prajekt brytanskaj transpartnaj palicyi startavaŭ u lutym 2026 hoda. Na bujnych łondanskich vakzałach ustalavali kamiery, jakija ŭ realnym časie paraŭnoŭvali tvary pasažyraŭ z palicejskimi śpisami. Takim čynam palicyja chacieła vyjaŭlać ludziej, jakija znachodziacca ŭ vyšuku, a taksama tych, na kaho sud nakłaŭ peŭnyja abmiežavańni. Kali prahrama znachodzić padabienstva, jana padaje sihnał supracoŭniku palicyi, ale kančatkovaje rašeńnie ŭsio roŭna pavinien prymać čałaviek. Vyjavy ludziej, jakich niama ŭ śpisie, pavodle palicyi, pavinny adrazu vydalacca.
Na praktycy pieršyja šeść miesiacaŭ dali amal nulavy vynik. Z dakumientaŭ, atrymanych Liberty Investigates ad palicyi pa zapycie ab svabodzie infarmacyi, vynikaje, što sistemu zapuskali 18 razoŭ. Za hety čas jana praskanavała bolš za 500 tysiač tvaraŭ, a arenda abstalavańnia i praca supracoŭnikaŭ kaštavali prykładna 426 tysiač dalaraŭ. Akramia taho, palicyja patraciła na hetyja apieracyi amal 100 pracoŭnych hadzin.
Za ŭvieś pieryjad ałharytm tolki adzin raz paviedamiŭ, što nibyta znajšoŭ čałavieka sa śpisu nazirańnia. Adnak paśla ručnoj pravierki vyśvietliłasia, što heta byŭ inšy čałaviek.
Palicyja ŭsio roŭna vyrašyła praciahnuć
Niahledziačy na taki vynik, transpartnaja palicyja ekśpierymient nie spyniła. U žniŭni jaho padoŭžyli jašče na čatyry miesiacy i pašyryli na stancyi łondanskaha mietro. U palicyi tłumačać, što pieršy etap byŭ patrebny nie tolki dla taho, kab zatrymlivać ludziej, ale i kab zrazumieć, jak uvohule lepš vykarystoŭvać takuju technałohiju ŭ transpartnaj sistemie. Za čas testu mianiali miescy ŭstanoŭki kamier, pracedury pracy, abstalavańnie i sami śpisy ludziej, jakich sistema pavinna šukać.
Paśla pašyreńnia prajekta źjavilisia try paćvierdžanyja supadzieńni. Va ŭsich vypadkach sistema pravilna raspaznała ludziej, na jakich dziejničali sudovyja abmiežavańni. Adnak pravierka pakazała, što jany hetyja ŭmovy nie parušali, tamu zatrymlivać ich nie było padstaŭ.
Pry hetym u palicyi padkreślivajuć, što sami dziažurstvy kala kamier nie byli całkam biezvynikovymi. Supracoŭniki zatrymlivali ludziej za napad, kradziež, našeńnie zabaronienaj zbroi i parušeńnie hramadskaha paradku. Adnak hetyja zatrymańni adbylisia nie dziakujučy sistemie raspaznavańnia tvaraŭ, tamu ŭ jaje statystyku nie ŭklučalisia.
Ci jość sens u takoj sistemie
Były brytanski kamisar pa bijamietryi i kamierach nazirańnia Frejzier Sempsan (Fraser Sampson) źviarnuŭ uvahu na toje, što sama pa sabie techničnaja zdolnaść sistemy raspaznavać tvary jašče nie aznačaje, što jaje vykarystańnie budzie efiektyŭnym. Šmat zaležyć ad taho, dzie stajać kamiery, u jaki čas ich uklučajuć, kaho ŭnieśli ŭ śpis nazirańnia i nakolki imavierna, što hetyja ludzi ŭvohule apynucca ŭ kankretnym miescy.
Sempsan paraŭnaŭ palicejskaje vykarystańnie takoj technałohii z kamierami ŭ handlovych abjektach. Dla kramy dobrym vynikam moža ličycca ŭžo toje, što viadomy złodziej pabajaŭsia zajści ŭnutr. Ale kali palicyja stavić kamiery dziela taho, kab znajści kankretnych ludziej, vynik łahična vymiarać kolkaściu tych, kaho sapraŭdy ŭdałosia vyjavić. U hetym sensie, adznačyŭ jon, pieršyja paŭhoda łondanskaha vyprabavańnia ciažka nazvać plonnymi.
Adnak sprečka vakoł technałohii idzie nie tolki pra jaje efiektyŭnaść. Sistema ŭ realnym časie apracoŭvaje bijamietryčnyja danyja ŭsich ludziej, jakija traplajuć u pole kamiery, tamu pravaabaroncy patrabujuć, kab palicyja mahła abhruntavać, navošta takoje nazirańnie patrebnaje i ci adpaviadaje jaho maštab realnamu vyniku.
Pytańnie stanovicca ŭsio bolš aktualnym, bo padobnyja sistemy raspaŭsiudžvajucca. Pavodle analizu Liberty Investigates, raspaznavańnie tvaraŭ na vulicach užo vykarystoŭvali bolš za pałovu palicejskich słužbaŭ Anhlii i Uelsa. U Łondanie taksama płanujuć ustalavać stacyjanarnyja kamiery ŭ centry horada, u tym liku na Oxford Street, jakuju niadaŭna zrabili piešachodnaj.
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy7
Kamientary
(U śviecie ŭ lidarach Kitaj, Indyja).
2. I efiektyŭnaść u RB značna bolšaja: kali nie 97%, to 50% dakładna parušalniki: naprykład, ŭ 2017-m čałaviek pračytaŭ artykuł tut.by i kinuŭ znajomym, kaleham, susiedziam.
Mienšaja, ale istotnaja kolkaść byli padpisany na Niechtu i inšyja kanały, byli ŭ miascovych čatach, dzie paŭsiudna kidali naviny (= ekstremisckija materyjały).
Jašče mienš, ale ŭsio roŭna vielmi šmat, byli pa hieałakacyi telefonaŭ u zonach pratestaŭ u 2020-m. I h.d.