Hod tamu zatrymali vahnieraŭcaŭ. Zhadvajem, jak ich źviazvali ź Cichanoŭskim i jak pierad imi vybačaŭsia Viktar Łukašenka

«Była atrymanaja infarmacyja ab prybyćci ŭ Biełaruś bolš za 200 bajevikoŭ dla destabilizacyi abstanoŭki ŭ pieryjad vybarčaj kampanii. Pry sabie rasijanie mieli kožny pa nievialikaj ručnoj pakłažy, i na ŭsich — try vialikija ciažkija valizki, zahruzku jakich u transpartny srodak ažyćciaŭlali niekalki mužčyn», — havaryłasia ŭ zajavie. Paźniej mnohija vypuski navin ab vahnieraŭcach źniknuć ź jutuba i dziaržaŭnych sajtaŭ.

U toj ža viečar Łukašenka źbiraje terminovuju naradu z kiraŭnictvam Rady biaśpieki, jakuju na toj momant uznačalvaŭ Andrej Raŭkoŭ. «Ja hladžu na reakcyju rasiejcaŭ. Jany ŭžo, apraŭdvajučysia, kažuć, što ledź nie my ich sami siudy zavieźli. Jasna, treba ž niejak apraŭdać svaje brudnyja namiery», — kazaŭ Łukašenka.

«Snajpier, padryŭniki, ajcišniki», — charaktarazavaŭ zatrymanych bajevikoŭ Andrej Raŭkoŭ.

Na ranicu nastupnaha dnia ŭsich kandydataŭ u prezidenty, a heta adbyvałasia za tydzień ź nievialikim da vybaraŭ, vyklikali ŭ CVK, kab raskazać pra situacyju. Na sustrečy prysutničaŭ asabista Raŭkoŭ, jaki staŭ raskazvać, što ŭ lasach Biełarusi chavajecca bolš za 170 bajevikoŭ, jakich jašče nie paśpieli złavić. «Nam paviedamili, što pad rasijskimi Pskovam i Nievielem farmirujucca jašče dźvie hrupoŭki», — raskazaŭ potym žurnalistam kandydat Andrej Dźmitryjeŭ.

Tym nie mienš, Cichanoŭskaja nie pajšła na admienu mitynhu-kancertu na Banhałory 30 lipienia, na jaki sabralisia dziasiatki tysiač vybarcaŭ. Mitynh prajšoŭ biez pravakacyj.

Viadoma, Rasija nie razumieła, što adbyvajecca, i kamientavała padziei z zatrymańniem svaich hramadzian dastatkova strymana. Ukraina zajaviła, što prosić ekstradziravać zatrymanych na jaje terytoryju. Sprava ŭ tym, što mnohija ź ich prymali ŭdzieł u bajavych dziejańniach na ŭschodzie Ukrainy. MZS vyklikaŭ da siabie pasłoŭ abiedźviuch krain.

Dalej Śledčy kamitet pasprabavaŭ źviazać zatrymanych vahnieraŭcaŭ ź dziejnaściu Siarhieja Cichanoŭskaha i Mikoły Statkieviča. «Raniej jany ličyli, što ja vałodaju telepartacyjaj, bo abvinavačvali mianie ŭ tym, čaho ja nie rabiŭ, u miescy, dzie ja nie byŭ. Ciapier jany vyrašyli, što ja vałodaju jašče i telepatyjaj, bo siłaj dumki pranikaju ŭ hałovy i arhanizoŭvaju zmovy ź Cichanoŭskim i «vahnieraŭcami», — kamientavaŭ Statkievič ź SIZA.

Viersija Śledčaha kamiteta była ŭ tym, što ŭ zatrymanych rasijan byli bilety ź Minska ŭ Stambuł, ale jany imi nie skarystalisia, a pajechali ŭ Biełaruś, kab destabilizavać situacyju napiaredadni vybaraŭ. Na ich zaviali kryminalnuju spravu pa artykule 293 KK «Padrychtoŭka masavych biesparadkaŭ».

Rasijskaja prapahanda mocna nakinułasia na Łukašenku praz hetaje zatrymańnie. U pieradačy Sałaŭjova havaryłasia, što faktyčna Biełaruś razryvaje adnosiny z Rasijaj praz hety incydent, a samu spravu možna było b vyrašyć spakojna na ŭzroŭni śpiecsłužb i nie pryciahvać uvahu.

Siarod hramadskaści było papularnym mierkavańnie, što bajcy Vahniera, jakija pryjechali ŭ Biełaruś pa zaprašeńni Cichanoŭskaha — čarhovy śpiektakl, jaki ničym nie skončycca, jak było z dochłymi pacukami ci džypami, što praryvalisia praz ukrainskuju miažu. Adnak praŭładnyja analityki kštałtu Alaksandra Špakoŭskaha i Piatra Piatroŭskaha pierakonvali, što na hety raz usio vielmi surjozna i va ŭładaŭ jość nieasprečnyja dokazy.

Ale potym pačalisia prezidenckija vybary, uspychnuli pratesty. I ŭłady ŭbačyli, što spadziavacca mohuć tolki na Rasiju, a dla hetaha treba ŭłahodzić situacyju z vahnieraŭcami. 14 žniŭnia zatrymanyja rasiejcy byli adpraŭlenyja na radzimu. Paźniej Łukašenka skazaŭ, što daŭ zahad starejšamu synu Viktaru vybačycca pierad hetymi ludźmi. Voś tak ciaham pałovy miesiaca Rasija z donara niestabilnaści ŭ Biełarusi stała znoŭ hałoŭnym sajuźnikam.

U vyniku toj śpiecapieracyi palacieŭ z pasady Andrej Raŭkoŭ. Ciapier jon pasoł u Azierbajdžanie.

Paźniej ukrainskija śpiecsłužby raskazali, što vymańvańnie vahnieraŭcaŭ u Biełaruś było častkaj ich śpiecapieracyi pa zatrymańni hetych asob. Mienavita ŭkrainskija śpiecsłužby vierbavali vahnieraŭcaŭ na padstaŭnuju pracu ŭ Siryi i kuplali im kvitki ź Minska ŭ Stambuł. Padčas viarboŭki vahnieraŭcy paviedamlali ab svaich złačynstvach va Ukrainie. Padčas pieralotu samalot pavinien byŭ pryziamlicca va Ukrainie, bo adnamu z pasažyraŭ stała b młosna na borcie. Śpiecapieracyja była sankcyjanavanaja Piatrom Parašenkam jašče ŭ 2018 hodzie.

Minuŭ hod z zatrymańnia vahnieraŭcaŭ. Siońnia ŭłady, dziaržaŭnyja ŚMI navat nie zhadvajuć, kudy ž padzielisia tyja 170 bajevikoŭ, jakija chavalisia ŭ biełaruskich lasach. I Śledčy kamitet nie paviedamlaje, jak idzie rasśledavańnie pa kryminalnaj spravie, jakuju zaviali na rasijan.

Nie tak daŭno pra toj vypadak vykazaŭsia i prezident Ukrainy Uładzimir Zialenski:

«Apošni raz z Łukašenkam my razmaŭlali pa telefonie. Kali vahnieraŭcy byli na terytoryi Biełarusi, ja patelefanavaŭ Alaksandru Ryhoraviču, ja paprasiŭ jaho, ja jaho papiaredziŭ, što hatovy pieradać jamu ŭsiu infarmacyju adnosna hetych ludziej, tam byli proźviščy, my razumieli, chto heta takija. Tym nie mienš jon skazaŭ mnie pa telefonie: «Ja razumieju, darahi Uładzimir Alaksandravič, ja nie padviadu, usio budzie narmalna, ja raźbiarusia». Ja byŭ upeŭnieny, što jon pieradaść nam hetych zabojcaŭ. Ale potym adbyłosia toje, što adbyłosia. Heta była apošniaja naša ź im hutarka», — skazaŭ Zialenski.

• 0
• 0
• 0
• 0
• 0
• 0
• 0
• 0