Krynicy: «Hazpram transhaz Biełaruś» kančatkova prajhraŭ sierbam sud na $30 miljonaŭ
Vyhladaje, što narešcie skončana adna sa šmatlikich dram, na jakija akazaŭsia bahaty praces uźviadzieńnia «Hazpram-Centra» na miescy aŭtavakzała «Maskoŭski» ŭ Minsku. Sens historyi byŭ u tym, što ambicyjnaja budoŭla pavinna była składacca ź niekalkich niemałych budynkaŭ, jakija płanavałasia zabiaśpiečvać enierhijaj z ułasnaha enierhacentra. Jaho pavinna była ŭźvieści kampanija «Enierhaprajekt Aprema». Suma kantrakta składała 50 miljonaŭ dalaraŭ.
Prykładna na pałovu sumy sierby raboty praviali, ale potym budoŭlu pačali pieraśledavać niaŭdačy: jana niekalki razoŭ spyniałasia, mianialisia prajekty, potym «Hazpram transhaz Biełaruś» uvohule adnabakova razarvaŭ kantrakt i admianiŭ avansavyja płaciažy.
Sierby zapatrabavali kampiensacyju i pajšli ŭ Stakholmski sud — aŭtarytet u pytańni vyrašeńniaŭ sprečak pamiž bujnymi kampanijami roznych krain. Jaho zvyčajna prapisvajuć u bujnych kantraktach.
Spravu razhladali z 2018 pa 2019 hod, u vyniku sud staŭ na bok sierbaŭ. «Hazpram transhaz Biełaruś» nie pahadziŭsia z vysnovami i padaŭ apielacyju.
«Pryjšło rašeńnie, jakoje zamacavała kančatkovuju pieramohu sierbaŭ. Treba šukać hrošy, choć našy jašče sprabujuć nadzimać ščoki i dumajuć, što boj praciahvajecca», — skazała «Našaj Nivie» abaznanaja krynica.
«Da sumy pozvy, vyhladaje, treba budzie vypłacić i padatak na dadatkovuju vartaść za vykarystanaje padčas budaŭnictva abstalavańnie, bo «Hazpram transhaz Biełaruś» byŭ vyzvaleny ad vypłaty PDV na abstalavańnie dla budaŭnictva.
I ŭ ideale kampanija pavinna była afarmlać jaho na siabie i pieradać dla mantažu sierbam, ale tyja sami zavieźli na svaju «dačku», atrymaŭšy tolki adterminoŭku pa spłacie PDV. A abstalavańnia tam było trochu bolš čym na $20 miljonaŭ», — dadaje surazmoŭca.
Razam z hetym niavyznačany los samoha kompleksu na miescy aŭtavakzała «Maskoŭski» — budaŭnictva tam spyniena. Biełaruskija ŭłady pahražajuć vystavić «Hazpram transhaz Biełaruś» vialikuju niaŭstojku za zryŭ inviestycyjnaj damovy, ale pakul što hetaha nie zrabili. Na miescy budoŭli ničoha nie adbyvajecca.
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1111
Kamientary