Pratest kamiery №15: za što zmahajucca žančyny, jakija abviaścili haładoŭku ŭ CIP na Akreścina

Ź siaredziny kastryčnika na dziaŭčat z kamiery №15 pačaŭsia cisk z boku administracyi: u ich zabrali ŭsiu vierchniuju vopratku, jakuju aryštantki mahli vykarystoŭvać u jakaści matracaŭ. Toje, što žančyny paśpieli ŭziać u ruki, zabrali i dadali ŭ śpis aryštavanych rečaŭ. Usio astatniaje — u śmiećcie. Z 1 listapada dziaŭčynam nie davali tualetnuju papieru. 

U suviazi z hetym aryštantki kamiery №15 abviaścili haładoŭku da vykanańnia ŭsich patrabavańniaŭ: viarnuć zatrymanym prahułki, vadzić u duš, vyklučać u kamierach śviatło na noč, vydavać usie nieabchodnyja rečy zhodna z normami, viarnuć usie rečy i leki.

U kamiery, akramia zatrymanaj 30 kastryčnika žurnalistki Iryny Słaŭnikavaj, da ŭčorašniaha dnia siadzieła i palitźniavolenaja Anastasija Krupienič-Kandraćjeva, na jakuju skłali novy pratakoł i pieraviali ź CIP ŭ IČU (za kratami jana ŭžo 111 sutak).

Byłyja aryštantki raspaviali, što ciapier adbyvajecca ŭ kamiery № 15 CIP na Akreścina, paviedamlajuć pravaabaroncy.

«Advuču skarhi pisać». Čamu pačali cisnuć na žančyn

Jak stała viadoma pravaabaroncam, takuju drennuju reakcyju ŭ administracyi CIP vyklikała niadaŭniaja skarha na ŭmovy ŭtrymańnia adnoj z byłych aryštantak. Padčas «šmonu» namieśnik načalnika CIP zajaviŭ, što skarhi, jakija aryštavanyja pišuć paśla vyzvaleńnia, nie dziejničajuć. Pry hetym dadaŭ, što ŭmovy ŭtrymańnia buduć paharšacca, kab «advučyć» pisać skarhi. Taksama jon paabiacaŭ, što zrobić u kamiery tolki siem hradusaŭ ciapła.

Usie hetyja tydni ŭ kamiery ładzili, akramia dvuch naležnych, jašče adzin dadatkovy «šmon» dniom. Heta raspaŭsiudžvałasia vyklučna na kamieru № 15, niahledziačy na toje, što na paviersie była jašče adna mužčynskaja «palityčnaja» kamiera.

Padčas hetaha «šmonu» zabrali ŭsie «niepatrebnyja», na dumku administracyi, rečy: zubnyja ščotki, prakładki, leki. Pa słovach vyzvalenych, u mužčyn taksama ŭ siaredzinie kastryčnika zabrali ciopłuju vopratku.

Dziaŭčaty raspaviadajuć, što ŭ samoj kamiery vielmi horača i niama čym dychać. Pry hetym «karmušku» pryadčyniajuć časam na try santymietry prykładna na hadzinu-paŭtary. Užo ŭ kancy miesiaca «karmušku» pierastali adčyniać naohuł. Pavodle nahladčykaŭ, «pavietra zatrymanyja buduć atrymlivać padčas pryjomu ježy». Kali ž u kamiery nočču stanaviłasia choładna z-za adkrytaj karmuški, to na prośby začynić, kab nie prastyć, supracoŭniki CIP adkazvali admovaj. Taksama byłyja aryštantki zaŭvažyli, što razdatčyca pierastała vydavać bieły chleb, choć jany i pavinny davać jaho dvojčy ŭ dzień pa 75 hramaŭ.

U dziaŭčat navat zabrali miedycynskija maski, jakija jany vykarystoŭvali ŭ jakaści humak dla vałasoŭ.

Myła i tualetnuju papieru aryštantkam davodzicca vyprošvać

Raniej tyja zatrymanyja, jakich zabirali z doma, mahli prynosić z saboj u kamieru srodki asabistaj hihijeny, ručniki i ŭsie nieabchodnyja rečy. Ciapier u kamieru da žančyn «novieńkija» prychodziać z pustymi rukami — u CIP usio heta zabirajuć. Tamu žančyny da hetaha času siadziać biez šampuniu i zubnoj pasty. Zubnyja ščotki, bializna i ručniki zastajucca ad byłych aryštantak. Žančynam davodzicca myć vałasy miascovym myłam — pałovaj kavałka na dziesiać aryštavanych. Jaho, jak i tualetnuju papieru, zatrymanym davodzicca vyprošvać u administracyi. Časam ich nie vydajuć dva-try dni zapar. A na prośbu vydać tualetnuju papieru supracoŭniki CIP prapanoŭvali zamiest jaje vykarystoŭvać svaje majki.

«Tut vam nie sanatoryj». Na 10 dziaŭčat — čatyry ščotki, try butelki vady i siem prakładak

Z tumbačak u žančyn zabrali ŭsie leki: tabletki ad prastudy, sprei dla nosa i horła, supraćvirusnyja paraški, śmiektu. Pry hetym skazali: «Tut vam nie sanatoryj, kab vy mahli lačycca».

Butelki z vadoj, jakija aryštantki vykarystoŭvali dla taho, kab pamycca, pahrecca i papić, zusim vykinuli, bo, na dumku administracyi, ich było zašmat.

Leki zatrymanym fielčar zvyčajna vydaje padčas ranišniaha abychodu. Zapas tabletak maleńki, a supraćvirusnych niama zusim, tolki paracetamoł, ambraksoł, analhin, validoł i srodki ad alerhii. Akramia hetaha, u kamierach nie dazvalajuć zachoŭvać tyja leki, jakija mohuć spatrebicca chutka, a kab atrymać praź fielčara, nieabchodna šmat času.

Žančyny adznačajuć, što ŭ kamiery ŭ aryštavanych jość vošy. Jany źjavilisia jašče ź vieraśnia, kali ŭ kamieru padsadzili adrazu troch biazdomnych žančyn. U kastryčniku ŭ kamieru na 15 sutak padsadzili viadomuju biazdomnuju Ału Iljiničnu (byłaja sukamiernica Volhi Chižankovaj, jakaja šmat raspaviadała pra jaje). Pa stanie na 3 listapada ŭ kamiery na dziesiać dziaŭčat zastałosia tolki čatyry zubnyja ščotki, try butelki dla vady i prykładna siem prakładak.

• 0
• 0
• 0
• 0
• 0
• 1
• 0
• 0