Što viadoma na viečar 8 listapada pra situacyju na miažy
Pa acenkach biełaruskich pamiežnikaŭ na viečar, kolkaść mihrantaŭ na biełaruska-polskaj miažy pieravyšaje 2000 čałaviek. Polski bok aceńvaje kolkaść mihrantaŭ na miažy ŭ 3000-4000 čałaviek. Jany znachodziacca na niejtralnaj terytoryi pamiž Biełaruśsiu i Polščaj. Spačatku jany rabili sprobu prarvacca na terytoryju Polščy, a potym raźbili pałatačny łahier.
12 tysiač polskich vajskoŭcaŭ na miažy ź Biełaruśsiu pryviedzieny ŭ bajavuju hatoŭnaść. Litva nakiravała dadatkovyja siły da biełaruskaj i polskaj miežaŭ.
U Dziaržpahrankamitecie Biełarusi zajavili, što heta biežancy, jakija chočuć atrymać prytułak u JeC, i Minsk nie budzie pieraškadžać tamu, što jany pakinuć krainu. U praŭładnych telehram-kanałach, u aficyjnych miedyja ŭ Biełarusi razhortvajecca aktyŭnaja infarmacyjnaja padtrymka padziej, źviazanych ź mihracyjnymi prablemami.
U Polščy, u svaju čarhu, abvinavacili ŭłady Biełarusi ŭ pravakacyi, zajaviŭšy, što vialikija hrupy mihrantaŭ znachodziacca pad poŭnym kantrolem biełaruskich śpiecsłužbaŭ i armii.
Polša zakryła ruch praz pamiežny pierachod u Kuźnicy z 7:00 ad zaŭtra.
Na miažy dziejničaje nadzvyčajnaje stanovišča, i praca ŚMI tam niemahčymaja. Žurnalisty atrymlivajuć materyjały pieravažna z sacyjalnych sietak.
Prezident Polščy Andžej Duda pahavaryŭ sa Śviatłanaj Cichanoŭskaj. Taksama Duda siońnia hutaryŭ ź lidarami inšych krain, jakija vykazvali jamu padtrymku.
Krainy z usiaho śvietu vykazvajuć salidarnaść z Polščaj i asudžajuć dziejańni biełaruskich uładaŭ. U pryvatnaści, z Polščaj salidaryzavalisia kiraŭnik Jeŭrakamisii Ursuła fon der Lajen, staršynia Jeŭrapiejskaj Rady Šarl Mišel i pradstaŭnik Dziarždepartamienta ZŠA Nied Prajs.
Pres-sakratar Kramla Piaskoŭ skazaŭ: «My nie sumniavajemsia ŭ tym, što mihracyjnyja słužby Biełarusi prymajuć usie nieabchodnyja miery dla taho, kab situacyju ŭtrymlivać u zakonnym rečyščy».
U ES zahavaryli ab mahčymym uviadzieńni sankcyj suprać avijakampanij inšych krain za pieravozki mihrantaŭ. ES paprosić dapamohu AAN u repatryjacyi mihrantaŭ, jakija prybyvajuć praź Biełaruś.
Ciapier čytajuć
Ananimy — historyi biełarusaŭ, jakim prychodzicca šyfravacca, bo režym ličyć ich dziejnaść «kryminałam»2
Ananimy — historyi biełarusaŭ, jakim prychodzicca šyfravacca, bo režym ličyć ich dziejnaść «kryminałam»
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary