Pad Słuckam padčas nielehalnych honak žonka nakiravała Range Rover u Subaru muža. Ciažka paciarpieli čaćviora
U Słuckim rajonie zaviaršyli rasśledavańnie kryminalnaj spravy ab parušeńni pravił darožnaha ruchu i ekspłuatacyi transpartnych srodkaŭ, u vyniku jakoha paciarpieli čatyry čałavieki. Jany atrymali ciažkija i mienš ciažkija cialesnyja paškodžańni, paviedamlaje Śledčy kamitet.
Niesankcyjanavanyja vuličnyja honki adbylisia ŭviečary 26 lipienia 2025 hoda kala vioski Vialiki Bykoŭ Słuckaha rajona. Padčas finalnaha zajezdu 32‑hadovaja miascovaja žycharka za rulom pazadarožnika Range Rover vyrašyła paspaborničać u chutkaści sa svaim mužam, jaki kiravaŭ Subaru Impreza.
Paśla finišu aŭtamabili raźviarnulisia, kab viarnucca da miesca startu. Kiroŭca Subaru pastupova źnižaŭ chutkaść, a Range Rover praciahvaŭ ruchacca z chutkaściu nie mienš za 100 km/h pry dazvolenych 90 km/h. Pa materyjałach śledstva, žančyna bačyła napieradzie ludziej i aŭtamabili, ale nie stała spyniacca.
Na vialikaj chutkaści pazadarožnik sutyknuŭsia z aŭtamabilem muža, paśla čaho vyjechaŭ na pravuju abočynu. Tam jon źbiŭ traich piešachodaŭ, a zatym urezaŭsia ŭ pryparkavany Volkswagen Golf. Ad udaru lehkavy aŭtamabil adkinuła ŭ kiuviet. U jaho sałonie znachodziłasia pasažyrka.
Siarod paciarpiełych piešachodaŭ była siamiejnaja para. Z-za zatoru jany spynilisia kala darohi i pajšli ŭzdoŭž uzbočyny, kab vyśvietlić pryčynu. Pierakanaŭšysia, što napieradzie niama avaryi, muž i žonka viartalisia da svajho aŭtamabila. U momant najezdu jany stajali śpinaj da pazadarožnika, jaki nabližaŭsia.
Padčas rasśledavańnia vyśvietliłasia, što tarmaznaja sistema Range Rover mieła techničnuju niaspraŭnaść: mietaličny trubapravod zadniaha levaha koła praržavieŭ. Adnak sudovaja aŭtatechničnaja ekśpiertyza pakazała, što navat pry hetaj niaspraŭnaści kiroŭca mieła techničnuju mahčymaść svoječasova spynić aŭtamabil i paźbiehnuć sutyknieńnia, kali b trymałasia dazvolenaj chutkaści i svoječasova nacisnuła na piedal tormazu. Subaru Impreza, pavodle vysnoŭ ekśpiertaŭ, znachodziŭsia ŭ spraŭnym stanie.
Sudova-miedycynskija daśledavańni vyznačyli stupień ciažkaści traŭmaŭ. 18‑hadovaja žycharka Salihorska atrymała ciažkija cialesnyja paškodžańni. Siamiejnaja para atrymała mienš ciažkija paškodžańni, jakija pryviali da praciahłaha razładu zdaroŭja. Paškodžańni pasažyrki Volkswagen Golf pryznali ciažkimi pa prykmiecie nievyvodnaha źniaviečańnia tvaru.
Sama abvinavačanaja padčas śledstva śćviardžała, što ŭ momant ruchu piedal tormazu «pravaliłasia». Pavodle jaje viersii, tamu jana nibyta naŭmysna nakiravała pazadarožnik na aŭtamabil muža, sprabujučy spynić niekiravany aŭtamabil.
Pry vyvučeńni asoby žančyny vyśvietliłasia, što na momant avaryi jana nie mieła sudzimaściaŭ, ale raniej nieadnarazova pryciahvałasia da administracyjnaj adkaznaści za parušeńni Pravił darožnaha ruchu.
Dziejańni 32‑hadovaj žycharki Słuckaha rajona kvalifikavanyja pavodle častki 2 artykuła 317 Kryminalnaha kodeksa — parušeńnie pravił darožnaha ruchu i ekspłuatacyi transpartnych srodkaŭ asobaj, jakaja kiruje transpartnym srodkam, što pa nieaściarožnaści paciahnuła pryčynieńnie ciažkaha i mienš ciažkaha cialesnaha paškodžańnia.
Kryminalnaja sprava pieradadzienaja prakuroru dla nakiravańnia ŭ sud.
Pamiatajecie varjackuju honku ŭ Breście, padčas jakoj zahinuła troje? Na VIDEA z ekšn-kamiery matacyklista vidać, što jon razahnaŭsia da 186 km/h
U Vilejskim rajonie 84‑hadovy kiroŭca źbiŭ viełasipiedystku i źjechaŭ ź miesca avaryi
Za 146 parušeńniaŭ i dva DTZ — try miesiacy biez pravoŭ. U Minsku sa skrypam pakarali kiroŭcu Bentley
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5757
Kamientary