U Ispanii pamierła 87‑hadovaja žančyna, sprava jakoj spravakavała ciapierašni palityčny kryzis u krainie

Marykarmen Abaskal prymusova vysielili ź jaje kvatery ŭ Madrydzie, vyniesšy žančynu z domu na nasiłkach. Hetyja padziei vyklikali napružanaść kala budynka i stali pryčynaj šyrokamaštabnych pratestaŭ.

Paźniej Abaskal dazvolili viarnucca ŭ svajo šmathadovaje žyllo. Jana zaklučyła z uładalnikam budynka novy vaśmihadovy dahavor i praciahnuła płacić arendnuju płatu, pryblizna takuju ž, jak raniej.

7 kastryčnika Madrydski sajuz arandataraŭ paviedamiŭ pra śmierć 87‑hadovaj žančyny. Inšyja padrabiaznaści pakul nie paviedamlajucca.

Marykarmen Abaskal pražyła ŭ adnoj kvatery ŭ madrydskim rajonie Recira 71 hod — z 1956 hoda. Jana žyła pavodle staroj, tak zvanaj abaronienaj damovy arendy, jakaja pierachodziła ŭ siamji ad adnaho arandatara da druhoha.

Situacyja źmianiłasia paśla taho, jak kvateru nabyŭ inviestycyjny fond UrbaGestion. Novy ŭładalnik chacieŭ značna pavysić arendnuju płatu — pavodle paviedamleńniaŭ, prykładna na 230%. Dla Abaskal, jakaja žyvie na piensiju, heta było niepadjomna. Jana admoviłasia pakidać kvateru.

Sprava dajšła da sudoŭ, jakija pryznali, što prava na staruju lhotnuju damovu arendy nasamreč skončyłasia. U pryvatnaści, pierachod damovy ad maci Abaskal da jaje samoj byŭ abmiežavany zakonam, a jaje invalidnaść, pryznanaja na ŭzroŭni 50%, nie davała taho dadatkovaha prava na praciah arendy, jakoje praduhledžvałasia dla ludziej z bolš vysokaj stupieńniu invalidnaści. Viarchoŭny sud Ispanii staŭ na bok uładalnika.

Niahledziačy na heta, vakoł Abaskal razharnułasia kampanija ŭ jaje abaronu. Susiedzi, pravaabaroncy i prafsajuz arandataraŭ sprabavali damovicca z uładalnikam, kab žančyna mahła zastacca. Byli navat prapanovy apłacić jaje arendu. Adnak 23 vieraśnia palicyja ŭsio ž praviała vysialeńnie.

Abaskal, jakaja znachodziłasia ŭ vielmi ciažkim stanie paśla stresu, vynieśli z doma na nasiłkach i advieźli ŭ balnicu. Pierad domam u hety čas sabralisia sotni pratestoŭcaŭ, niekatorych ź ich palicyja adciskała ad uvachodu.

Mienavita hetaje vysialeńnie pieratvaryła pryvatnuju sudovuju sprečku ŭ ahulnanacyjanalny simvał žyllovaha kryzisu ŭ Ispanii. Ludzi pačali pratestavać nie tolki za pravy Abaskal, ale i suprać rezkaha rostu arendnaj płaty, vysialeńniaŭ i nabyćcia žylla inviestycyjnymi kampanijami. U Madrydzie ŭźnik łahier pratestoŭcaŭ na płoščy Puerta-del-Sol, akcyi prajšli i ŭ inšych haradach.

Paśla masavych pratestaŭ UrbaGestion prapanavaŭ Abaskal pahadnieńnie, pavodle jakoha jana mahła viarnucca ŭ svaju kvateru i płacić kala 500 jeŭra ŭ miesiac — prykładna 30% jaje piensii. Ale heta nie zaviaršyła palityčnaha kryzisu — u krainie abjavili daterminovyja vybary, jakija projduć 29 listapada.

• 5
• 0
• 1
• 2
• 0
• 7
• 0
• 0