Kańje Uest zarabiŭ na admienienych u Rasii kancertach 20 miljonaŭ dołaraŭ
Kańje Uest mieŭsia vystupić u Sankt-Pieciarburhu 10 i 11 kastryčnika, ale abodva kancerty admianili. Pavodle «Kommiersanta», amierykanski repier užo atrymaŭ za ich kala 20 miljonaŭ dołaraŭ. I, imavierna, nie viernie hetyja hrošy.
Amierykanski repier Kańje Uest, viadomy taksama jak Ye, atrymaŭ kala 20 miljonaŭ dołaraŭ za dva kancerty ŭ Sankt-Pieciarburhu. Pra heta paviedamlaje «Kommiersant'» sa spasyłkaj na dźvie krynicy, znajomyja ź situacyjaj. Vystupy mieli prajści 10 i 11 kastryčnika na «Hazpram Arenie», ale pa nieviadomych pryčynach byli admienienyja. Imavierna, ich nie ŭzhadnili na samym viersie.
Adzin z surazmoŭcaŭ haziety ŭdakładniŭ, što ŭsia suma nie źjaŭlajecca asabistym zarobkam muzykanta.
«Heta nie čysty hanarar — z hetych hrošaj apłačvajucca, naprykład, pasłuhi jaho piersanału», — skazaŭ jon.
Pavodle druhoj krynicy, Uest, vierahodna, nie viernie hrošy za kancerty, bo heta nie praduhledžana jaho kantraktam.
Arhanizataram vystupaŭ było maskoŭskaje ahienctva Say Agency. Jano abiacaje pačać viartańnie hrošaj za bilety 12 kastryčnika — paśla dat, na jakija byli pryznačanyja kancerty. Pakupniki ŭžo padajuć pazovy z patrabavańniem viarnuć srodki.
Kiraŭnica ahienctva Hanna Subčava nastojvaje, što kampanija nie parušyła «nivodnaha zakona». Pavodle jaje, kankurenty stvaryli chvalu niehatyvu vakoł kancertaŭ, a ŚMI jaje ŭzmacnili.
Prapahandysty na «Sałaŭjoŭ Live» paśla naviny pra kancert Kańje Uesta raźnieśli «Hazpram»: «Cikava, kali hety soram spynicca».
Kamientary