Apublikavali abnoŭleny Padatkovy kodeks. Raskazvajem pra asnoŭnyja źmieny
Novy kodeks istotna pavialičyŭ staŭki padatkaŭ, admianiŭ sproščanuju sistemu dla niekatorych pradprymalnikaŭ i ŭvioŭ padatak na adnu kvateru i dadatkovy zbor z tych, chto zanadta paśpiachova handluje ahurkami i jajkami z padsobnaj haspadarki.
Vyras adziny padatak i zbor dla ahrasiadzib
Źmianiajucca staŭki adzinaha padatku — u zaležnaści ad vidu dziejnaści jany pavialičvajucca ŭ 2-4 razy. Dla kožnaha rehijona jany svaje.
Naprykład, dla IP u Minsku staŭki takija: za handal adzieńniem, dyvanami, składanaj bytavoj elektratechnikaj — 1260 rubloŭ, za techničnaje absłuhoŭvańnie i ramont aŭto — 896, pasłuhi cyrulniaŭ i sałonaŭ pryhažości — 540, budaŭničyja pracy — 478. Dla fizičnych asob u stalicy, jakija zajmajucca videazdymkaj, padatak składzie 263 rubli, pierakładami — 169, dyzajnam interjeraŭ — 237, ramontam mebli — 149.
Vyras zbor dla ŭładalnikaŭ ahrasiadzib. Ciapier heta 31 rubiel u miesiac (372 rubli ŭ hod zamiest byłych 58).
Važnyja źmieny dla tych, chto viadzie padsobnuju haspadarku na svaim učastku. Kali ich dachody ad prodažu sadaviny, miasa ci inšaj sielhaspradukcyi pieravysiać 200 bazavych vieličyń na hod (na siońnia heta 6400 rubloŭ), to daviadziecca płacić 10% ad sumy pieravyšeńnia. Raniej hetyja dachody padatkam nie abkładalisia.
Toje ž i dla fizičnych asob, jakija źbirajuć i pradajuć dzikarosłyja jahady, hryby, lekavyja travy, arechi.
Uviali padatak na adnu kvateru
Z hetaha hoda dziejničaje padatak dla ŭłaśnikaŭ adnoj kvatery. Raniej płacili tolki za druhuju i nastupnyja.
Pamier zboru — 0,1% ad raźlikovaha koštu žylla. Raźlikovy košt kvadratnaha mietra adroźnivajecca pa haradach. Pa padlikach Minfina, u siarednim padatak składzie 50 rubloŭ u Minsku i 25 rubloŭ — u rehijonach.
Dla niekatorych hrup buduć ilhoty. Płacić padatak za pieršuju kvateru nie treba piensijanieram, invalidam I i II hrupy, niepaŭnaletnim, asobam, pryznanym niedziejazdolnymi, sałdatam terminovaj słužby, tym, chto prachodzić alternatyŭnuju słužbu, vieteranam.
Źmieny ŭ sproščanaj sistemie padatkaabkładańnia dla IP
Što ź ipešnikami, jakija pracujuć pa sproščanaj sistemie? Ciapier sproščany padatak składaje 6%. Raniej jon byŭ 5% ci 3% plus padatak na dadadzienuju vartaść.
Sproščanaj sistemaj z hetaha hoda nie mohuć karystacca praprymalniki, jakija akazvajuć pasłuhi. Vyklučeńnie tolki dla IP, jakija zajmajucca turystyčnaj dziejnaściu, achovaj zdaroŭja, suchaputnym transpartam, hramadskim charčavańniem, kampjutarnym prahramavańniem.
Tak budzie da kanca hoda. U 2023-m sproščany padatak dla IP admieniać. Im daviadziecca pierajści abo na adziny padatak, abo na padachodny.
Z 2023 hoda uviaduć taksama prafiesijny padatak — dla fizasob i ramieśnikaŭ. Kankretnyja vidy dziejnaści jašče nie vyznačanyja. Hety padatak zamienić padachodny i ŭznosy ŭ fond sacyjalnaj abarony nasielnictva. Pamier jaho budzie 10% (kali vyručka bolšaja za 60 tysiač rubloŭ u hod, to 20%).
Abnavili sumy padatkovych vylikaŭ
U zakonie abnavili sumy dachodaŭ, ź jakich nie biarecca padachodny padatak. Dla dachodaŭ ad dareńnia heta 8078 rubloŭ (raniej padatkam abkładałasia padoranaje na sumu, bolšuju za 7521 rubiel).
Dla materyjalnaj dapamohi ad najmalnika, padarunkaŭ i apłaty puciovak — 2440 rubloŭ (kali havorka nie pra asnoŭnaje miesca pracy — 161 rubiel), dla apłaty strachavych pasłuh — 4148 rubloŭ. Biazvypłatnaja sponsarskaja dapamoha i achviaravańni, jakija atrymlivajuć dzieci ź invalidnaściu ci siroty, nie buduć abkładacca padatkam, kali ich suma za hod mienšaja za 16 142 rubli (raniej było 15 030 rubloŭ).
Prapisali taksama novyja padatkovyja vyliki. Ale tam niaznačnyja źmieny sumaŭ. Standartny padatkovy vylik ciapier składaje 135 rubloŭ — kali miesiačny dachod nie bolšy za 817 rubloŭ (raniej było 126 rubloŭ pry sumie dachodu ŭ 761 rubiel. Vylik na dzicia da 18 hod — 40 rubloŭ, dla ŭdavy ci adzinokaha baćki — 75 rubloŭ na kožnaje dzicia, dla invalidaŭ I i II hrupy — 190 rubloŭ.
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary