Dziarždep: Dla Alaksandra Łukašenki nadyšoŭ «momant, kali treba vyrašać»
Čynoŭnik Dziarždepartamienta ZŠA zajaviŭ, što Rasija moža vykarystać vajskoŭcaŭ, adpraŭlenych u Biełaruś na vučeńni, dla ŭvarvańnia va Ukrainu.
Prybyćcio rasijskich vojskaŭ u Biełaruś vyklikaje zaniepakojenaść, bo jany mohuć być vykarystanyja dla napadu na Ukrainu, zajaviŭ vysokapastaŭleny čynoŭnik Dziarždepartamenta ZŠA na bryfinhu ŭ Vašynhtonie. Vučeńni ŭ Biełarusi dajuć Rasiei mahčymaść napadu na susiedniuju krainu, miarkujuć u Vašynhtonie.
Pa słovach supracoŭnika dziaržaŭnaha Departamienta, Maskva nakiravała ŭ Biełaruś bolš vajskoŭcaŭ, čym možna było b čakać u ramkach standartnych vučeńniaŭ.
Dla Alaksandra Łukašenki nadyšoŭ «momant, kali treba vyrašać», jon pavinien vyznačycca nakont budučyni suvierenitetu svajoj krainy. «Dla Biełarusi heta momant kali treba vyrašać adnosna budučyni suvierenitetu krainy, i heta pytańnie dla Łukašenki i dla tych, dziakujučy kamu jon trymajecca va ŭładzie», — skazaŭ čynoŭnik.
Pra pahrozu novaha ŭvarvańnia Rasiei va Ukrainu zachodnija raźviedki zahavaryli ŭ listapadzie, paśla taho jak Maskva sabrała na miežach z Ukrainaj vialikija siły. Na siońnia jana praciahvaje pierakidać dadatkovyja čaści z Dalokaha Uschodu.
Minabarony Biełarusi nazvała metaj vučeńniaŭ acenku hatovaści sił Sajuznaj dziaržavy da abarony miežaŭ.
U pryvatnaści, u Biełarusi, siarod inšaha, razhornutyja 12 rasiejskich źniščalnikaŭ Su-35 i procirakietnyja sistemy S-400.
Zajaŭlena, što pieršaja častka vučeńniaŭ projdzie da 9 lutaha, druhaja — 10—20 lutaha.
Žychary Bresckaj i Homielskaj abłaściej Biełarusi paviedamlajuć ab prysutnaści rasijskich vajskoŭcaŭ i techniki kala roznych nasielenych punktach. Akramia taho, paviedamlajecca ab pieramiaščeńni rasijskaj vajennaj techniki pa čyhuncy Maskva-Minsk-Brest. Dziasiatki fatahrafij i pastoŭ pra heta źjavilisia ŭ sacyjalnych sietkach i telehram-kanałach.
Kamientary