«Nie treba kavanym botam stukać u dźviery čałavieku». Ale tyčyć heta nie ŭsich.
Alaksandr Łukašenka na naradzie ŭ Minsku 30 krasavika zajaviŭ pra niedapuščalnaść pierahibaŭ u pracy kantraloraŭ.
Jon źviarnuŭ uvahu na niadaŭniuju razmovu sa staršynioj Kamiteta dziaržkantrolu Vasilom Hierasimavym, u jakoj išła havorka pra niedapuščalnaść pierahibaŭ u pracy kantraloraŭ.
«Ja prosta chaču padkreślić — i ŭradu, i hubiernataram, i asabliva našym parłamientaryjam. Vasil Mikałajevič [Hierasimaŭ] zasvoiŭ.
My ni ŭ jakim razie nie pavinny pierajści niejkuju čyrvonuju liniju ŭ adnosinach z našym hramadstvam i našymi ludźmi, — skazaŭ Łukašenka. — Ni ŭ jakim razie my nie pavinny zaciskać ludziej tak, što jany (asabliva kiraŭniki) buduć aziracca na kožny krok. Ludzi chočuć žyć u svajoj krainie svabodna».
Pavodle jaho słoŭ, u pryvatnaści ŭ pracy KDK nazirajecca peŭny kren, jakoha być nie pavinna. «Takoje jość, chaj nie ŭ Hierasimava, a ŭ padnačalenych, u inšych — pryjści i pakazać svoj spryt. Voś mała nie padasca ad hetaha sprytu», — dadaŭ Łukašenka.
Jon zajaviŭ, što niedapuščeńnie takich pierahibaŭ źjaŭlajecca ŭ tym liku zonaj adkaznaści ŭrada i staršyniaŭ abłvykankamaŭ. U vypadku, kali takija pierahiby ŭsio ž majuć miesca, možna źviarnucca da jaho, zapeŭnivaje jon.
Łukašenka skazaŭ, što ŭ kajdanki treba brać tych, chto hetaha zasłuhoŭvaje. Naprykład, kali ŭ pravaachoŭnikaŭ jość infarmacyja pra toje ci inšaje parušeńnie. «Kali takoj infarmacyi niama, nie treba kavanym botam stukać u dźviery čałavieku. Ni ŭ jakim razie», — skazaŭ jon.
Ale z tymi, chto nie padtrymlivaje Łukašenku, vidać, tak možna. Jon takich ludziej, vyhladaje, abaznačyŭ jak tych, «chto choča razburyć krainu», i pastaviŭ ich u adzin šerah z žulikami, chabarnikami, prajdziśvietami.
«Cisnuć biaźlitasna treba na chabarnikaŭ, prajdziśvietaŭ, žulikaŭ i tych, chto choča razburyć krainu. Tut prabačeńnia nie pavinna być nijakaha. Ale chadzić i stryhčy pad adzin hrebień usich, kaho treba i nie treba ŭ krainie, ni ŭ jakim razie nielha», — reziumavaŭ Łukašenka.
Kamientary
Cinizm čieła nie znajet hranic.... Sovietskij Sojuz "razvaliłsia" po bolšomu čsiotu počiemu, dumali komuniaki odno, hovorili druhoje,a DIEŁALI TRIEŤJE.... Tak i etot. I, poetomu" boitsia bolšie vsieho Čiestnych, Svobodnyj i Prozračnych Vyborov. Znajet Čto skažiet biełorusskij Narod.