Syn indyjskaha miljardera Mukieša Ambani, Anant Ambani, znoŭ prapanavaŭ pieravieźci ŭ Indyju biehiemotaŭ, jakija pachodziać ad žyvioł z kolišniaha zaaparka narkabarona Pabła Eskabara. Havorka idzie pra 80 asobin, jakich chočuć vyratavać ad mahčymaj likvidacyi ŭ Kałumbii i raźmiaścić u pryvatnym centry dla žyvioł «Vantara» ŭ štacie Hudžarat, piša The Guardian.
Hetaja historyja pačałasia jašče ŭ 1980‑ch hadach, kali viadomy kałumbijski narkabaron Pabła Eskabar stvaryŭ u svaim pamieści Hacienda Nápoles vialiki pryvatny zaapark. Tudy jon zavioz roznych ekzatyčnych žyvioł, u tym liku słanoŭ, žyrafaŭ i čatyroch biehiemotaŭ z Afryki.
Paśla likvidacyi Eskabara ŭ 1993 hodzie kałumbijskija ŭłady pakinuli biehiemotaŭ na voli, bo žyvioły byli niebiaśpiečnyja i ciažkija dla kantrolu. Ź ciaham času jany pierasialilisia ŭ basiejn raki Mahdalena i pačali vielmi chutka razmnažacca. U rehijonie nie było naturalnych vorahaŭ dla ich, klimat padychodziŭ, a ježy chapała, tamu kolkaść žyvioł značna vyrasła.
Ciapier, pavodle acenak, u Kałumbii žyvie bolš za 200 dzikich biehiemotaŭ. Heta samaja vialikaja papulacyja pa-za miežami Afryki. Žyvioły nanosiać škodu miascovaj pryrodzie: źniščajuć raślinnaść, vyciaśniajuć miascovyja vidy, mohuć napadać na chatniuju žyviołu i stvarajuć niebiaśpieku dla ludziej.
Raniej ułady sprabavali sterylizavać hipapatamaŭ, ale praces idzie zanadta pavolna. Ekśpierty papiaredzili, što praź niekalki dziesiacihodździaŭ ich kolkaść moža pieravysić tysiaču. Tamu ŭ krasaviku ŭłady Kałumbii abviaścili, što pačnuć aficyjny adstreł dla skaračeńnia papulacyi. Heta vyklikała abureńnie ŭ abaroncaŭ žyvioł.
Na hetym fonie Anant Ambani vystupiŭ z prapanovaj vyvieźci častku žyvioł u Indyju. Jon zajaviŭ, što biehiemoty — žyvyja istoty, i kali jość mahčymaść vyratavać ich biaśpiečnym i humannym sposabam, heta treba zrabić. Jon taksama adznačyŭ, što žyvioły nie vybirali miesca naradžeńnia i nie vinavatyja ŭ situacyi, u jakoj apynulisia.
Heta nie pieršaja takaja prapanova z boku hetaha čałavieka. Jašče ŭ 2023 hodzie razhladaŭsia płan pieravieźci 60 biehiemotaŭ u toj ža centr, jaki tady nazyvaŭsia Green's rescue and rehabilitation. Ale prajekt nie realizavali z-za techničnych składanaściaŭ: treba było złavić vialikich dzikich žyvioł vahoj kala dźviuch ton kožnaja, arhanizavać transpartavańnie, atrymać dazvoły i ŭzhadnić usio pamiž roznymi strukturami.
Ciapier Ambani zajaviŭ, što asabista źviarnuŭsia da ŭrada Kałumbii z prośbaj dazvolić navukova arhanizavanaje i biaśpiečnaje pierasialeńnie 80 biehiemotaŭ u novy pastajanny dom.
Adnak ideja vyklikaje pytańni. Sam centr «Vantara» maje davoli sprečnuju reputacyju. Tam utrymlivajecca bolš za 150 tysiač žyvioł, u tym liku redkija vidy. Krytyki śćviardžajuć, što častka žyvioł mahła trapić tudy z parušeńniami pravił abo nieetyčnym šlacham. Taksama hučali abvinavačańni ŭ suviaziach ź niezakonnym handlem dzikaj pryrodaj. Inšyja nazyvajuć prajekt «asabistym zaaparkam dziela prestyžu» siamji Ambani, bo zvyčajnyja ludzi nie majuć tudy dostupu.
Siamja Ambani i kiraŭnictva «Vantara» ŭsie abvinavačańni admaŭlajuć. Letaś rasśledavańnie Viarchoŭnaha suda Indyi nie znajšło dokazaŭ niezakonnaj dziejnaści.
Jość i praktyčnyja sumnievy ŭ metazhodnaści hetaj apieracyi. Biehiemoty nie žyvuć u Indyi ŭ naturalnych umovach. Choć u centry jość miadźviedzi, krakadziły, słany, leapardy i tyhry, niama viadomaha dośviedu ŭtrymańnia biehiemotaŭ, tym bolš adrazu 80 asobin. Akramia taho, ich pieravozka moža kaštavać bolš za 4 miljony dalaraŭ.
Adnak kali hety prajekt usio ž realizujuć, to historyja biehiemotaŭ Pabła Eskabara atrymaje jašče adzin niečakany praciah.
Ciapier čytajuć
Byłoha milicyjaniera asudzili za žadańnie vajavać u Pałku Kalinoŭskaha. Pahražała da 15 hadoŭ kałonii20
Kamientary