Lebiadok: Hałoŭnaja asablivaść vučeńniaŭ — u surjoznym naroščvańni rasijskich sił SPA
Rasija ŭsio bolš zasvojvaje Biełaruś jak apieratyŭnuju prastoru svaich uzbrojenych siłaŭ dla realizacyi palityčnych i vajennych metaŭ, ličyć analityk Jahor Lebiadok. Pa jaho mierkavańni, pieradumoŭ dla źnižeńnia prysutnaści pakul nie vidać, a voś uzmacnieńnie — mahčyma.
«Pačałosia heta nie siońnia, — zaŭvažaje ŭ svaim telehram-kanale ekśpiert. — Jašče na vučeńniach «Słavianskaje braterstva 2020» adbylisia pieršyja paloty stratehičnaj avijacyi Rasii. U minułym hodzie paloty stali čaściejšymi i pa-za vučeńniami. Taksama u 2021-m byli raźmieščanyja Su-30, kompleksy S-400, pravodzilisia inšyja mierapryjemstvy».
Analityk źviartaje ŭvahu na toje, što nie ahučanaja ahulnaja kolkaść udzielnikaŭ vučeńniaŭ. Była tolki zajava, što jana nie pieravysić abmiežavańni, praduhledžanyja «Vienskim dakumientam» 2011 hoda. To-bok 13 tysiač čałaviek.
Ale nie ŭsio tak vidavočna. Pamočnik biełaruskaha ministra abarony Aleh Voinaŭ zajaviŭ, što adnačasova budzie prachodzić šerah taktyčnych vučeńniaŭ, «pa zamierach, nie źviazanyja z vučeńniami «Sajuznaja rašučaść»».
«Ci źjaŭlajecca heta drabnieńniem pracesu dla demanstratyŭnaha źnižeńnia kolkaści vajenych, pakul skazać ciažka», — piša Jahor Lebiadok.
Na dumku ekśpierta, kantynhient rasijskich vojskaŭ, jaki budzie zadziejničany ŭ vučeńniach, moža skłaści 1500−2500 čałaviek.
«Cikava, što ŭ niekatorych Telegram-kanałach źjaviłasia papiaredžańnie, nibyta zdymka pieramiaščeńnia ešałonaŭ traplaje pad kryminalny pieraśled, — robić akcent analityk. — Vierahodna, heta častka skaardyjanavanych dziejańniaŭ pa aśviatleńni vučeńniaŭ».
Pa-pieršaje, heta robicca dla zapužvańnia biełarusaŭ u ramkach linii z 2020 hoda — nie raspaŭsiudžvać infarmacyju, akramia sankcyjanavanaj načalstvam. Pa-druhoje, kab stvaryć dadatkovaje napružańnie zvonku, u pieršuju čarhu — va Ukrainie.
«Hałoŭnaja asablivaść vučeńniaŭ — u surjoznym naroščvańni rasijskich sił SPA, — praciahvaje ekśpiert. — U Biełaruś prybuduć dva dyvizijony S-400 i rasijskija źniščalniki Su-35. Klučavoje pytańnie, ci zastanucca S-400 na miažy z Ukrainaj».
Usio heta vyhladaje praciaham palityki Uładzimira Pucina «pa demanstracyi surjoznaści namieraŭ u pieramovach z NATA ab harantyjach nieraspaŭsiudžvańnia ŭpłyvu aljansa», miarkuje Jahor Lebiadok.
«Takoje raźvićcio padziej vyrašaje try zadačy: akazvaje cisk na Ukrainu; uzdymaje staŭki ŭ pieramovach z NATA; adździalaje Biełaruś ad suviaziaŭ z Ukrainaj i abmiažoŭvaje Łukašenku ŭ źniešniaj palitycy», — ličyć analityk.
U vypadku, kali Biełaruś daść mahčymaść vykarystoŭvać svaju terytoryju dla napadu na inšuju dziaržavu, pa mižnarodnym pravie heta budzie aznačać ahresiju suprać Ukrainy. Jak zdarałasia ŭ historyi, takoje likvidujecca «vymušanym adkazam, samaabaronaj», nahadvaje ekśpiert.
«U svaju čarhu Ukraina moža adkazać rakietnymi ŭdarami, užyvańniem avijacyi i bieśpiłotnikaŭ, a taksama nakiravać u Biełaruś dyviersijnyja hrupy, — papiaredžvaje vajenny analityk. — Na vučeńniach akurat adpracoŭvajucca naroščvańnie SPA dla pieraduchileńnia rakietnych i avijacyjnych atak i «pošuk, błakavańnie i źniščeńnie niezakonych uzbrojenych farmavańniaŭ i dyviersijna-raźviedvalnickich hrup praciŭnika»».
Padčas vučeńniaŭ buduć adpracoŭvacca miery pa pieraduchileńni mahčymaha ŭdaru ci kontrudaru ukrainskich sił, robić vysnovu Jahor Lebiadok.
Lebiadok: Biełaruś usio bolš šturchajuć u rehijanalnuju varonku eskałacyi sa standartnym vychadam — praz vajnu
Ciapier čytajuć
Tamara Vińnikava pradała svoj łondanski dom, zaviešany karcinami samoj siabie ŠMAT FOTA18
Kamientary