FT: Pucin i Makron damovilisia źnizić napružańnie vakoł Ukrainy, rasijskija vojski ź Biełarusi vyvieduć
Pucin i Makron na sustrečy ŭ Maskvie 7 lutaha damovilisia źnizić napružanaść vakoł Ukrainy z dapamohaj vyvadu rasijskich vojskaŭ ź Biełarusi paśla zakančeńnia supolnych ź Minskam vučeńniaŭ. Maskva taksama paabiacała nie pačynać «vajennyja inicyjatyvy» z-za Ukrainy.
Prezident Rasii Uładzimir Pucin i prezident Francyi Emaniuel Makron zaklučyli ździełku pa źnižeńni napružańnia ŭ situacyi vakoł Ukrainy, ale ŭ Kramli čakajuć adabreńnia jaje ŭmoŭ z boku ZŠA. Ab hetym piša The Financial Times sa spasyłkaj na svaje krynicy.
Pucin i Makron dasiahnuli pahadnieńnia nakont taho, što Rasija nie budzie pradprymać novych «vajennych inicyjatyŭ», piša vydańnie sa spasyłkaj na francuzskich aficyjnych asob. Akramia taho, Maskva pahadziłasia ŭdzielničać u dyjałohu nakont razhortvańnia ŭłasnych uzbrojenych sił.
Prezident Rasii, pa ich słovach, taksama pahadziŭsia vyvieści ź Biełarusi «da 30 tysiač rasijskich vajskoŭcaŭ» [pavodle vajennych viedamstvaŭ Biełarusi i Rasii, ich značna mieniej], jakija zadziejničanyja ŭ sumiesnych ź Minskam vučeńniach «Sajuznaja rašučaść — 2022». Hetaje pytańnie budzie abmiarkoŭvacca na dalejšych sustrečach, na jakich płanujecca zaklučyć pahadnieńnie ab «strukturavanym dyjałohu pa pytańniach kalektyŭnaj biaśpieki», piša FT. Rasija pakul nie paćvierdziła zaklučeńnie ździełki.
«Usie hetyja pytańni patrabujuć zhody sajuźnikaŭ Francyi pa Jeŭrasajuzie i NATO, u pieršuju čarhu, ZŠA, — skazaŭ pres-sakratar prezidenta Rasii Dźmitryj Piaskoŭ, — Pakul rana kazać ab čymści jašče».
Padčas pres-kanfierencyi paśla pieramovaŭ u Maskvie ni Pucin, ni Makron nie zhadali dasiahnutyja pahadnieńni.
Razam z tym francuzski prezident paviedamiŭ ab tym, što Pucin hatovy abmiarkoŭvać deeskałacyju situacyi vakoł Ukrainy, piša RBK.
Pa słovach Makrona, nieabchodna sfarmavać kankretnyja harantyi biaśpieki dla ŭsich krain u rehijonie — u tym liku Rasii, Ukrainy i členaŭ Jeŭrasajuza. Taki krok, na jaho dumku, dazvolić damahčysia stabilnaści i stvaryć «novy paradak biaśpieki».
Čytajcie taksama: Makron: Nastupnyja dni buduć vyrašalnymi dla Ukrainy, a niezaležnaść Biełarusi pavinna być zachavanaja
«My ŭśviedamlajem surjoznaść situacyi i nadzionnuju nieabchodnaść u intaresach usich bakoŭ znajści šlach padtrymańnia miru i stabilnaści ŭ Jeŭropie», — zajaviŭ prezident Francyi paśla pieramovaŭ z Pucinym, dadaŭšy, što «čas jašče jość».
Pucin zajaviŭ, što šerah prapanoŭ Makrona moh by stać častkaj «asnovy dalejšych našych sumiesnych krokaŭ», adznačyŭšy pry hetym, što padrabiazna kazać pra ich jašče, mahčyma, zanadta rana, dadaje RBK.
Aficyjnyja asoby ZŠA, Francyi i inšych zachodnich krain u apošnija miesiacy kažuć ab ryzycy taho, što Rasija ŭvarviecca va Ukrainu. U Biełym domie i Pientahonie miarkujuć, što Maskva rychtuje pravakacyju, kab abhruntavać ahresiju suprać Kijeva. Rasijski bok padobnyja abvinavačvańni adchilaje. «Rasija nikoli pieršaj ni na kaho nie napadała», — kazaŭ Piaskoŭ.
Na fonie napružańnia vakoł Ukrainy pamiž Maskvoj i Paryžam pačaścilisia kantakty, Pucin i Makron ciaham adnaho tydnia trojčy stelefanavalisia dla abmierkavańnia rasijskich harantyj biaśpieki i mahčymaści deeskałacyi — 28 i 31 studzienia, a taksama 3 lutaha. Užo 7 lutaha prezident Francyi prybyŭ u Maskvu dla asabistaj sustrečy z Pucinym, toj adznačyŭ namahańni Paryža pa deeskałacyi napružanaści.
Pierad sustrečaj Makron kazaŭ na niedasiažnaść adnabakovych zachadaŭ u hetym pytańni z boku Maskvy i zajaviŭ, što varta «vybudoŭvać miechanizmy i kroki dla pavyšeńnia ŭzajemnaha davieru». Na jaho dumku, metaj Maskvy źjaŭlajecca nie Ukraina, a ŭdakładnieńnie praviłaŭ suisnavańnia ź Jeŭrasajuzam i NATO. «My pavinny pabudavać novyja rašeńni, mahčyma jany pavinny być navatarskimi», — skazaŭ prezident Francyi.
Makron nazyvaŭ deeskałacyju vakoł Ukrainy ŭ jakaści pryjarytetnaha napramku źniešniaj palityki Francyi, paśla sustrečy z Pucinym prezident Francyi maje namier naviedać Kijeŭ.
Kamientary