«Nadyšoŭ toj momant, kali adbyvajecca libieralizacyja niechacia» — ekanamičny ekśpiert

Nahadajem, zhodna z dakumientam, norma biaspošlinnaha ŭvozu składzie 1 tysiaču jeŭra i 31 kh. Raniej u Biełarusi dziejničali inšyja limity — 22 jeŭra i 10 kiłahramaŭ na adnu pasyłku. Pry hetym kolkaść banderolaŭ, jakija možna zamović u miesiac, nie było abmiežavanaja.

Takim čynam, paroh biaspošlinnaha ŭvozu pasyłak z-za miažy, jakija pierasyłajucca ŭ mižnarodnych paštovych adpraŭleńniach i dastaŭlajucca pieravozčykam na adras fizičnych asob, ciapier pavialičvajecca da ŭzroŭniu, jaki dziejničaje va ŭsich astatnich dziaržavach — členach Jeŭrazijskaha ekanamičnaha sajuza.

— Čym vyklikany taki atrakcyjon niečuvanaj ščodraści?

— Heta vyklikana dakładna tym, čym i ŭsie astatnija sproby libieralizacyi, u tym liku admiena pierasiačeńnia miažy raz u try miesiacy, biaźviz i ŭsio astatniaje.

Jość dakładnaje razumieńnie, što z pryčyny sankcyj buduć vialikija prablemy z pastaŭkami roznaha rodu tavaraŭ u Biełaruś. Ułasna kažučy, nadyšoŭ toj momant, kali adbyvajecca libieralizacyja niechacia.

Pakolki bujnyja handlovyja sietki nie zmohuć narmalna vieści svoj biznes z-za sankcyj, ludziam, ipešnikam dajuć bolš mahčymaściaŭ niešta kuplać. Pasyłki i ŭsio astatniaje — jakraz taki toj samy sposab paźbiehnuć deficytu i dać ludziam mahčymaść rabić pakupki za miažoj.

— Heta schavanaje «zialonaje śviatło» čaŭnočnamu biznesu?

— Zbolšaha tak, ale ja dumaju, što tut bolš aryjentacyja idzie na roznyja pasyłki i adpraŭleńni z rasijskich i kitajskich internet-kramaŭ. Heta, napeŭna, pryceł numar adzin. A čaŭnaki ŭvohule i tak pajeduć u Polšču albo polskija čaŭnaki pajeduć u Biełaruś, pakolki ŭ ich biaźviz budzie. Palak moža ź Biełastoka pajechać u Hrodna, tam razhruzicca i viarnucca dadomu.

— Norma biazmytnaha ŭvozu budzie dziejničać da 1 kastryčnika 2022 hoda, paśla hetaj daty jaje znoŭ źbirajucca źnizić da 200 jeŭra i 31 kh.

— Dumaju, što ŭłady buduć hladzieć na biahučuju situacyju. Heta ŭviedziena dla taho, kab paźbiehnuć deficytu za košt roznaha drobnaha biznesu, čaŭnočnaha biznesu, paštovych dastavak. Kali budzie vidać, što sankcyi praciahvajuć pracavać i rynak treba nasyčać takim čynam, my ŭbačym, što termin dziejańnia ciapierašniaha limitu padoŭžać.

— Jak vy ličycie, ci spracuje hetaja miera, na tuju metu, na jakuju nakiravana, — paźbiehnuć deficytu?

— Častkova spracuje, častkova zakryje patreby ludziej. Zrazumieła, što heta viernie nas da pieryjadu 90-ch i vysokaj inflacyi. Albo ty kuplaješ niešta vielmi drennaj jakaści za nievialikija hrošy, abo z deficytam sprabuješ urvać toje, što vyrablajecca ŭ Biełarusi ci Rasii (usio, što vyrablajecca, u nas i ŭ RF, heta budzie drennaj jakaści abo ŭ deficycie). Ci ty płaciš vielmi doraha za jakasny tavar, što źviazana ź inflacyjaj — jak zamiežnaj, u dalaravaj zonie, tak i z tym, što łahistyka padaražeje. Adna sprava vieźci fury, a inšaja — vieźci ŭ bahažniku Passat B2, jak heta robiać čaŭnočniki, i mieć abmienny kurs, umoŭna kažučy, nie bankaŭski, a čornaha rynku.

Tamu my bačym situacyju, padobnuju na pačatak 90-ch. Kali ty chočaš niešta dobraje kupić, to heta budzie doraha, a kali tańniej, ale drennaje, to za hetym treba budzie papalavać, pastajać u čarzie.

• 8
• 0
• 4
• 25
• 2
• 3
• 0
• 0