U zvyčajnym minskim šmatpaviarchoviku chavajecca sapraŭdny pałac. U jaho ramont ukłali miljony
Niedaloka ad samaha centra horada staić całkam zvyčajny šmatpaviarchovy dom, mima jakoha sotni minčukoŭ štodnia iduć pa svaich spravach. Ale mała chto ź minakoŭ zdahadvajecca, što za jaho fasadam chavajecca sapraŭdny pałac. Dva pavierchi, 341 «kvadrat», interjer u styli baroka z darahoj italjanskaj meblaj, dzie tolki kuchnia kaštuje amal jak adnapakajovaja kvatera.
Kvatera znachodzicca ŭ šmatpaviarchoviku pad №4 na vulicy Cimirazieva, niepadalok ad pierakryžavańnia z praśpiektam Mašerava (źleva ŭ pary sotniaŭ mietraŭ — ŽK «Kaskad»), piša Onliner.by.
Budynak pabudavali ŭ 2008 hodzie. Dla Minska taho času takaja manalitna-karkasnaja pabudova ličyłasia prykładam elitnaha žylla. Asablivy status domu zabiaśpiečyli niekalki rečaŭ: prestyžnaja łakacyja i panaramnyja vidy na praśpiekt Mašerava, zakrytaja terytoryja i padziemny parkinh (tak, ciapier hetym užo nikoha nie ździviš, a tady jašče možna było).
Budynak uzvodzili ŭ tuju samuju epochu, kali ludziam, jakija vyraśli ŭ ciesnych chruščoŭkach, bolš nie chaciełasia abmiažoŭvać siabie ŭ mietražy. Zabudoŭščyk staralisia zadavolić hetyja žadańni, tamu na rynku nieruchomaści źjaŭlalisia kvatery płoščaj bolš za 100 «kvadrataŭ». Tut ceły 341 kvadratny mietr.
Ciapierašnija ŭładalniki nabyli žyllo, kali dom tolki pabudavali. Pieršapačatkova heta byli dźvie asobnyja kvatery na 11‑m i 12‑m pavierchach — kožnaja pa 170 «kvadrataŭ». Ich vyrašyli abjadnać u adnu. Praces uzhadnieńnia zaniaŭ niekalki miesiacaŭ, jak i nastupnaja rekanstrukcyja. Ramont hetaj vielizarnaj prastory, supastaŭnaj pa pamierach z paŭnavartasnym katedžam, zaniaŭ niekalki hadoŭ.
Trapić u kvateru možna ź luboha ŭzroŭniu. Paradny ŭvachod raźmiaščajecca na nižnim paviersie i viadzie ŭ vitalniu, jakaja pieraciakaje ŭ choł ź leśvicaj, a dalej — u haścinuju.
Na pieršym paviersie taksama raźmiaščajucca spalnia, kuchnia sa stałovaj zonaj i sanvuzieł. Na druhi ŭzrovień možna trapić nie tolki znutry, pa leśvicy, ale i zvonku (uvachod arhanizavany praz pralniu). Tut znachodziacca jašče try spalni i dva sanvuzły.
Za raspracoŭku dyzajn-kancepcyi adkazvała studyja Nota Bene, jakaja pracuje pa ŭsioj Jeŭropie. Adnak napaŭnieńniem kvatery zajmalisia sami ŭładalniki. Dla hetaha niekalki razoŭ daviałosia źjeździć na vytvorčaść u Bałońju, kab u žyvuju padabrać materyjały, formy i dekaratyŭnyja elemienty.
— Žyllo całkam abstaŭlena meblaj italjanskaha brendu Visionnaire — hetaja fabryka stvaraje interjery dla pryvatnych rezidencyj, jacht i darahich hatelaŭ. Kampazicyja źbirajecca pa pryncypie total look: usio, što vy bačycie, — ad mebli da śviacilnikaŭ i navat furnitury, — zroblena mienavita tam, pryčym niekatoryja detali vyrablenyja ŭručnuju, — raspaviadajuć haspadary.
Brend prytrymlivajecca fiłasofii meta-luxury. Jak zrazumieła z nazvy, heta luks, pamnožany na luks (mahčyma, dvojčy). Na heta niedvuchsensoŭna namiakaje nie tolki vizualnaja składovaja — pazałočanyja ažurnyja tumbački, marmurovyja stały, lapnina prosta na kuchonnych fasadach, — ale i ceńnik. Naprykład, tolki adzin łožak kaštuje kala €18 000 pa kursie (za hetyja ž hrošy možna nabyć novieńki Belgee).
U stylistycy interjer pabudavany na styku ar-deko, sučasnaha baroka i kłasiki. Hałoŭny akcent tut zrobleny na spałučeńni składanych faktur i materyjałaŭ.
U afarmleńni pakojaŭ vykarystanyja skura strausa i vuhra, naturalnaje futra i šoŭk, marmur i paŭkaštoŭnyja kamiani, masiŭ dreva, chramavanaja i pazałočanaja stal. Navat dyvany tut vyrablalisia ŭručnuju.
Pieršaje, što sustrakaje haściej na nižnim uzroŭni, — śvietły pieradpakoj ź lusterkam ad padłohi da stoli, zaklučanym u miakkuju ramu ŭ styli kapitone (raniej hetuju techniku vykarystoŭvali dla abiŭki sałona karety).
U kalidory ŭstalavanaja aksamitnaja bankietka i šafy, jakija taksama majuć pryjemnuju abiŭku z tkaniny.
Adsiul hości traplajuć u choł z «vobłačnaj» leśvicaj, vyrablenaj na zakaz. Jana składajecca z sucelnych marmurovych prystupak z ažurnymi kavanymi parenčami.
Bolšuju častku pieršaha paviercha zajmaje haścioŭnia, pryčym jana padzielena na dźvie paŭnavartasnyja častki — tut možna bieź ciažkaściaŭ arhanizavać zvanuju viačeru na niekalki dziasiatkaŭ čałaviek.
Adna z častak abstalavanaja vakoł elektryčnaha kamina, upryhožanaha skulpturami chieruvimaŭ i sastarełym škłom z pacinaj, što stvaraje krychu mistyčnuju atmaśfieru. Pobač znajšłosia miesca dla chatniaj biblijateki.
Što cikava, knihi dla jaje taksama padbirali dyzajniery (vidać, kab ništo vizualna nie vybivałasia z ahulnaj kancepcyi).
Druhuju častku haścioŭni zajmajuć skuranyja kanapy z karetnaj ściažkaj i chatni kinateatr. Zzadu praduhledžany bar sa stojkaj z masivu dreva, pakrytaha čornym łakam. Šmatuzroŭnievaja stol paŭtaraje matyŭ sa sastarełym škłom, a taksama abstanoŭku dapaŭniajuć taršery ŭ čałaviečy rost.
Kuchnia-stałovaja abyšłasia ŭładalnikam bolš jak €53 000 u ekvivalencie — jaje vyrablali pa indyvidualnym prajekcie na toj ža fabrycy ŭ Bałońni. Biełaśniežnyja fasady z masivu dreva ŭpryhožanyja lapninaj, a rabočaja pavierchnia i abiedzienny stoł vykananyja z sucelnaha kavałka marmuru. U jakaści akcentaŭ — lustry z muranskaha škła, parcalanavyja vazy i azdableńnie ścien fijaletavym aksamitam ź lustranymi ŭstaŭkami.
Niahledziačy na ŭračystaść abstanoŭki, kuchnia atrymałasia dastatkova funkcyjanalnaj. Tut jość usia nieabchodnaja technika: ubudavanaja kava-mašyna, duchavaja šafa, mikrachvalevaja pieč, chaładzilnik. Pry hetym za asobnymi dźviaryma znachodzicca jašče adno pamiaškańnie, jakoje nahadvaje kłasičny pakojčyk dla prysłuhi. Nasamreč heta jašče adna zona dla zachoŭvańnia: unutry ŭstalavali dadatkovyja šafy, druhaja ladoŭnia i vinnaja šafa z padśvietkaj i kantrolem tempieratury.
Haściavuju spalniu na pieršym paviersie aformili ŭ spakojnaj bežava-šeraj hamie. U centry pakoja — masiŭny łožak z padhałoŭjem, dekaravanym raźbianymi vienzielami i pazałotaj. Pryłožkavyja tumbački pafarbavanyja ŭ załacistaje adcieńnie i zamacavanyja niepasredna na ścianie, dziakujučy čamu nibyta łunajuć u pavietry.
U nišu pamiž dźviuma ŭbudavanymi šafami intehravali tualetny stolik ź lusterkam. Abstanoŭku dapaŭniajuć kłasičnaje kresła, bankietka i šmatjarusnaja kryštalnaja lustra.
Pobač raźmieščany haściavy sanvuzieł, dzie praciahvajecca taja ž pałacavaja stylistyka: puzataja tumba pad umyvalnik, dušavaja kabina, pazałočanaja santechnika i hihanckaha pamieru sušyłka dla ručnikoŭ, jakaja zajmaje praktyčna ŭsiu ścianu.
Padymajučysia pa leśvicy na druhi pavierch, adrazu ŭpiraješsia pozirkam u vitražy na stoli. Zdajecca, niby praź ich padaje naturalnaje dzionnaje śviatło, jakoje zalivaje choły mazaičnymi blikami, ale nasamreč heta ŭbudavanaja padśvietka.
Ścieny tut pafarbavanyja ŭ hłyboki cahlana-terakotavy koler i słužać vydatnym fonam dla žyvapisu biełaruskich mastakoŭ.
Druhi ŭzrovień možna ličyć pryvatnaj zonaj — tut raźmieščany try spalni. Hałoŭnaja aformlena z vykarystańniem bezavaha i sierabrystaha adcieńniaŭ.
Centralnaje miesca zajmaje vieličny łožak z šaŭkovym padhałoŭjem. U stol intehravany miakki tekstylny bałdachin, a siarebranaja kamoda, tualetnyja stoliki i lustranyja pano z fasietam dadajuć pamiaškańniu chałodnaha mietaličnaha blasku.
Asobnaj uvahi zasłuhoŭvaje najaŭnaść u pakoi dźviuch harderobnych.
Miesca tut z zapasam: biez prablem možna raźmiaścić paŭnavartasnuju kalekcyju abutku, paŭsiadzionnaha adzieńnia i vopratki na ŭsie siezony.
Sa spalni možna trapić u pryvatny vanny pakoj, jaki čymści nahadvaje rymskuju kupalniu. Džakuzi ŭstalavana na vysokim podyumie, a ścieny vykładzienyja jarkaj mazaikaj. Dva absalutna adnolkavyja ŭmyvalniki z pazałočanymi lusterkami raźmieščany stroha simietryčna — možna źbiracca adnačasova sa svajoj druhoj pałavinkaj.
Unutry taksama abstalavanyja dušavaja kabina i tualet, i navat apošni ŭražvaje.
Na hetym ža paviersie znachodziacca jašče dźvie spalni: biruzovaja z aksamitnymi ścienami i lustranoj šafaj, jakaja vizualna rassoŭvaje miežy pakoja, i kantrasnaja ŭ karyčnieva-čyrvonych tonach z abstalavanaj rabočaj zonaj.
Akramia dekaratyŭnaj składovaj i redkich materyjałaŭ, kvatera abstalavanaja sistemaj «Razumny dom»: sa smartfona možna kiravać pracaj radyjataraŭ, rehulavać ciopłyja padłohi, naładžvać prytokava-vyciažnuju vientylacyju, aŭtamatyčna zakryvać abo adkryvać štory i zadziejničać datčyki pracioku z zapornymi kłapanami.
Taksama ŭ kožnym pakoi — pradumanaje aśviatleńnie: ad ubudavanaj padśvietki da akcentnych bra i lustraŭ. Z-za takoj varyjatyŭnaści ŭ niekatorych pamiaškańniach adzin vyklučalnik abjadnoŭvaje pa 6—8 kłaviš.
Heta dazvalaje kropkava naładžvać atmaśfieru pad kankretnuju zadaču: ad miakkaha paŭzmroku dla prahladu kino da jarkaha paradnaha aśviatleńnia padčas pryjomu haściej.
Ciapier unikalnaja rezidencyja vystaŭlena na prodaž. Jaje košt — 4 510 950 rubloŭ (prykładna €1 334 000 pa kursie).
— Tolki ŭ ramont układziena bolš za dva miljony jeŭra, ale my vydatna razumiejem, što za takija hrošy kvateru naŭrad ci niechta kupić. Daviałosia źnizić canu, kab narešcie jaje pradać, — dzielicca pradstaŭnik siamji.
Ciapier čytajuć
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki9
Kamientary