U Turkmienistan ciapier možna pajechać pa elektronnaj vizie i biez abaviazkovaha zaprašeńnia
Z 1 kastryčnika Turkmienistan uvioŭ elektronnyja turystyčnyja vizy i adnačasova admianiŭ patrabavańnie abaviazkovaha aficyjnaha zaprašeńnia dla zamiežnych turystaŭ, paviedamiŭ Respublikanski sajuz turystyčnych arhanizacyj.
Ciapier dziejničajuć elektronnaja turystyčnaja viza e-TU, biznes-viza i humanitarnaja viza. Zvyčajna aformić jaje možna na praciahu siami pracoŭnych dzion. Pry terminovym afarmleńni vizu vydajuć za try dni, a ekspres-vizu možna atrymać za 24 hadziny. Košt zaležyć ad typu vizy i terminu jaje afarmleńnia.
Raniej inšaziemcam dla naviedvańnia Turkmienistana nieabchodna było mieć aficyjnaje zaprašeńnie, zaćvierdžanaje mihracyjnaj słužbaj krainy. Dla jaho atrymańnia turystam davodziłasia źviartacca da miascovaj licenzavanaj turystyčnaj kampanii. Ciapier takoje zaprašeńnie bolš nie patrabujecca.
Jašče raniej, z krasavika 2026 hoda, u Turkmienistanie spraścili i mihracyjny ŭlik zamiežnikaŭ, pieravioŭšy jaho ŭ elektronny farmat. Kali inšaziemiec płanuje znachodzicca ŭ krainie bolš za try pracoŭnyja dni, infarmacyju pra miesca jaho znachodžańnia praź internet moža padać jak bok, jaki prymaje, tak i sam turyst. Na niekatorych pamiežnych punktach praduhledžanaja mahčymaść imhniennaj rehistracyi z vykarystańniem bijamietryi.
Takim čynam, za apošni čas Turkmienistan istotna spraściŭ niekalki pracedur, źviazanych z ujezdam i znachodžańniem u krainie zamiežnych turystaŭ.
Libieralizacyja turkmienskaha turystyčnaha zakanadaŭstva adbyvajecca na fonie inicyjatyŭ susiednich krain pa stvareńni ahulnaj turystyčnaj prastory ŭ Centralnaj Azii.
U pryvatnaści, Uźbiekistan aktyŭna prasoŭvaje ideju «Turystyčnaha kalca Centralnaj Azii». Adzin z mahčymych kambinavanych maršrutaŭ praz Uźbiekistan i Turkmienistan moža vyhladać tak: Chiva — Kunia-Urhienč — Ašchabad — Mary i staražytny Mierv, jakija ŭvachodziać u śpis suśvietnaj spadčyny JUNIESKA, — Buchara.
Dla Turkmienistana heta stvaraje mahčymaść dałučycca da ŭžo najaŭnaj płyni padarožnikaŭ, jakija naviedvajuć krainy rehijona pa maršrutach, źviazanych ź Vialikim šaŭkovym šlacham.
Akramia taho, ciapier abmiarkoŭvajecca kancepcyja «centralnaazijackaha Šenhiena» — adzinaj vizy, jakaja dazvoliła b naviedvać niekalki krain rehijona. Turkmienistan pakul aficyjna nie paćvierdziŭ svoj udzieł u hetym prajekcie, adnak zapusk ułasnaj elektronnaj vizy razhladajecca jak važny sihnał jaho hatoŭnaści da bolšaj intehracyi ŭ ahulnuju turystyčnuju prastoru Centralnaj Azii.
Ciapier čytajuć
Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač26
Kamientary