Bolš za pałovu mašyn, jakija zhareli sioleta ŭ Biełarusi, nie mieli dziejnaha techahladu
Bolš za pałovu transpartnych srodkaŭ, jakija zhareli ŭ Biełarusi za pieršyja vosiem miesiacaŭ 2026 hoda, nie mieli dziejnaha dazvołu na dopusk da ŭdziełu ŭ darožnym ruchu. Pra heta paviedamili ŭ respublikanskim unitarnym servisnym pradpryjemstvie «Biełtechahlad».
Pavodle źviestak Ministerstva pa nadzvyčajnych situacyjach, u studzieni—žniŭni ŭ Biełarusi adbyłosia 559 pažaraŭ na transparcie. U paraŭnańni z takim ža pieryjadam 2025 hoda ich kolkaść vyrasła na 14,5% — z 488 da 559. Najbolšy rost kolkaści ŭzharańniaŭ zafiksavany ŭ Bresckaj vobłaści — na 35%, i ŭ Minsku — na 30%.
Bolšaść pažaraŭ prypadała na lehkavyja aŭtamabili. Za vosiem miesiacaŭ zaharelisia 440 lehkavych mašyn, abo 78,7% ad ahulnaj kolkaści transpartnych pažaraŭ. Siarod ich byli dva elektramabili.
U «Biełtechahladzie» adznačyli, što asnoŭnaj pryčynaj uzharańniaŭ stanovicca avaryjny režym pracy elektraabstalavańnia. Z hetaj pryčyny za nazvany pieryjad adbylisia 434 pažary, što składaje 77,6% ad ich ahulnaj kolkaści.
Praviedzieny analiz pakazaŭ, što bolš za pałovu transpartnych srodkaŭ, paškodžanych ahniom, nie mieli dziejnaha dazvołu na ŭdzieł u darožnym ruchu. U Minsku hety pakazčyk skłaŭ 58%, a ŭ Bresckaj vobłaści — 52%. Mnohija z takich aŭtamabilaŭ naohuł nikoli nie padavalisia na prachodžańnie dziaržaŭnaha techničnaha ahladu.
Dla paraŭnańnia, tolki ŭ vieraśni 2026 hoda dyjahnastyčnyja stancyi «Biełtechahladu» vydali 144 044 dazvoły na dopusk transpartnych srodkaŭ da ŭdziełu ŭ darožnym ruchu.
«Tut u pałovy «karčoŭ» z Bresta dzirki skotčam zaleplenyja». Što mohuć pravieryć u aŭtamabili na biełaruska-polskaj miažy i kali raźviernuć?
Kinutyja aŭtamabili buduć prybirać z vulic haradoŭ chutčej
Biełarusy ciapier mohuć prachodzić techahlady nočču
Zapuścili novy biaspłatny servis dla prodažu aŭtamabilaŭ
Ciapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie23
Kamientary