Na miescy byłoha majontka Ahinskich znajšli staryja cahlinki sa śladami sabaki i kata
Majontak znachodzicca ŭ vioscy Ručyca (byłaja Hanuta), što ŭ Vilejskim rajonie.
Pra heta žurnalistu «Rehijanalnaj haziety» raskazaŭ krajaznaŭca ź Vilejki Dzianis Kaniecki.
— Niejak adzin čałaviek daŭ mnie prafiesijnuju paradu — zaŭsiody źviartać uvahu na staruju cehłu. Tam moža trapicca šmat cikavaha. I voś na praciahu hoda ja znachodziŭ staruju cehłu z adbitkami dałoni čałavieka, sa śladami žyvioł. Kažuć, radziej na cehle sustrakajucca ślady ptušak. Mnie jany pakul nie traplalisia.
Hetym razam čarhovyja znachodki čakali Dzianisa ŭ Ručycy, na miescy byłoha majontka Ahinskich Hanuta, što na Vilejščynie.
Adnu cahlinku — vierahodna, z adbitkami łap sabaki — surazmoŭca znajšoŭ u tranšei, druhuju — sa śladami kata — u kučy śmiećcia. Viadoma, što raniej na hetym miescy stajali pabudovy majontka. A niedaloka mieściŭsia pałac.
Pa słovach Dzianisa, na miescy byłych uładańniaŭ Ahinskich časam traplajucca cikavyja znachodki — reštki kieramičnaha posudu i cehła. Samyja rannija ź ich možna datavać XVII stahodździem.
***
Adzin z samych vieličnych majontkaŭ Vilejščyny ŭ Hanucie (siońnia vioska Ručyca) pabudavaŭ 1765 hodzie architektar ź Italii. Jaho zaprasiŭ tahačasny haspadar Tadevuš Ahinski.
A siadziba Hanuta była ŭvohule viadomaja ad pačatku XVI stahodździa. Majontak, pabudavany ŭ 1765-m, składaŭsia z pałaca i haspadarčych pabudoŭ.
Siońnia pra byłuju vielič nahadvaje napaŭrazburanaja kaplica, a taksama reštki brovara i panskaha młyna. Na miescy pałaca — zarosły ŭzhorak. Kampazitar i dypłamat Michał Kleafas Ahinski staŭ haspadarom majontka ŭ 1814-m, atrymaŭšy Hanutu ŭ spadčynu ad svajakoŭ. Apošnimi uładalnikami Hanuty byli Vałovičy. Majontak značna paciarpieŭ u Pieršuju suśvietnuju, ale byŭ adnoŭleny. Kančatkova Hanutu źniščyli ŭ 1943 hodzie. Tady źniščali šmatlikija panskija siadziby.
Ciapier čytajuć
Śpiavačku Meryjem Hierasimienka na praciahu dvuch hadoŭ źbivaŭ muž33
Śpiavačku Meryjem Hierasimienka na praciahu dvuch hadoŭ źbivaŭ muž
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»77
Kamientary