U Pieciarburhu drony atakavali adzin z samych zahružanych składoŭ Ozon
Paśla ŭdaru na łahistyčnym centry pačaŭsia pažar. Pavodle Ozon, usich rabotnikaŭ evakujavali, nichto nie paciarpieŭ.
ASTRA vyznačyła, što atakavany skład znachodzicca na Safijskaj vulicy ŭ Kołpinskim rajonie Pieciarburha.
Pra ataku ŭ noč na 18 kastryčnika paviedamiŭ sam markietpłejs.
«Siońnia ŭnačy pad ataku BPŁA trapiŭ adzin z našych łahistyčnych centraŭ u Sankt-Pieciarburhu. My apieratyŭna evakujavali ŭsich rabotnikaŭ, nichto nie paciarpieŭ. Uźnik pažar, na miescy pracujuć ekstrannyja słužby», — zajavili ŭ kampanii.
Heta adzin z samych zahružanych centraŭ Ozon na paŭnočnym zachadzie Rasii. Jaho płošča dasiahaje 79 tysiač kvadratnych mietraŭ. Tut zachoŭvajuć tavary, kamplektujuć i adpraŭlajuć zakazy.
Udar pa Ozon adbyŭsia padčas masiravanaj ataki na Pieciarburh i Leninhradskuju vobłaść. Miedyja nazyvajuć jaje samaj maštabnaj dla vobłaści. Hubiernatar Alaksandr Draździenka paviedamiŭ pra 144 źbityja bieśpiłotniki.
U Pieciarburhu taksama zaharelisia naftavy terminał i naftabaza «Ruċji», a ŭ Leninhradskaj vobłaści byŭ atakavany data-centr «UKantakcie».
Pavodle hubiernatara Pieciarburha Alaksandra Biahłova, u vyniku načnoha ŭdaru pa horadzie adzin čałaviek zahinuŭ, piaciora paciarpieli.
Kamientary