Misija «Artemida»: kapsuła NASA «Aryjon» dabrałasia da Miesiaca. Nastupny palot budzie ź ludźmi
Kaśmičnaja kapsuła «Aryjon», zapuščanaja na minułym tydni ŭ ramkach prajekta NASA «Artemida», prajšła za 130 kiłamietraŭ ad pavierchni Miesiaca i ciapier vychodzić na bolš vysokuju arbitu, piša Bi-bi-si.
Padčas hetaha manieŭru suviaź z aparatam pierapyniłasia na 34 chviliny, pakolki modul znachodziŭsia z advarotnaha boku Miesiaca.
Paśla vychadu na suviaź karabiel pasłaŭ u centr kiravańnia palotami zdymak Ziamli, na jakim jana vyhladaje maleńkim błakitnym šarykam na fonie čornaha kosmasu.
Pa słovach śpiecyjalistaŭ NASA, pakul što misija pieraŭzychodzić usie čakańni.
«Heta adzin z tych dzion, ab jakich doŭha-doŭha dumaješ i maryš, — pryznaŭsia kiraŭnik prahramy palotaŭ NASA Ziebułon Skovił. — Ranicaj my praviali vakoł Miesiaca čarhovy kaśmičny karabiel, zdolny nieści ekipaž, i praź niekalki hadoŭ budziem znoŭ hatovyja adpravić tudy ludziej. Heta sapraŭdny praryŭ».
Kali kapsuła pralatała nad Miesiacam, jana prajšła nad miescami pasadki karabloŭ «Apałon-11-12-13».
Pačatak misii «Artemida» pakłaŭ pusk samaj mahutnaj na siońniašni dzień rakiety-nośbita z Kaśmičnaha centra imia Kienedzi ŭ Fłarydzie.
Pakolki heta vyprabavalny palot, u kapsule, technična pryznačanaj dla ekipaža, raźmiaścilisia try maniekieny, abviešanyja raznastajnymi datčykami i pryborami.
«Usie hetyja prybory dapamohuć vyśvietlić, ci padychodziać dla ludziej umovy na borcie, — tłumačyć kandydat u astranaŭty NASA Ziena Kardman. — Tam jość datčyki radyjacyi, sensary ruchu, aksieleramietry — uvohule, usio toje, što maje vialikaje značeńnie dla ludziej».
Kali hety probny palot projdzie narmalna, to ŭ nastupny rejs da Miesiaca adpraviacca ŭžo nie maniekieny, a žyvyja astranaŭty.
Za palotam uvažliva sočyć i Jeŭrapiejskaje kaśmičnaje ahienctva, jakoje adkazvaje za budaŭnictva techničnaha adsieka «Aryjona», u jakim raźmieščany enierhietyčnaja i siłavaja ŭstanoŭki.
JEKA «damoviłasia» i ab adpraŭcy da Miesiaca svajho pasažyra — znakamitaha brytanskaha mulciašnaha hieroja barančyka Šona, jaki lacić pryšpileny pa ŭsich praviłach u kreśle. Kampaniju jamu składaje amierykanski hieroj komiksaŭ i multfilmaŭ, talisman NASA sabačka Snupi. Toj, praŭda, nie pryšpileny i svabodna lotaje pa kapsule.
Prajšoŭšy pobač ź Miesiacam, «Aryjon» zaraz pavinien vyjści na bolš vysokuju arbitu i 26 listapada pabić rekord dalokaści, ustalavany «Apałonam-13», addaliŭšysia ad Ziamli na 400171 km.
A praz dva dni kapsuła pieraadoleje miažu ŭ 430 tys. kiłamietraŭ — tak daloka nie zalataŭ jašče nivodny kaśmičny karabiel, pryznačany dla ekipaža.
Paśla hetaha «Aryjon» adpravicca ŭ zvarotny palot, znoŭ projdzie pobač ź Miesiacam i 11 śniežnia pavinien pryvadnicca ŭ Cichim akijanie.
Kamientary