«Rasija biez nas abydziecca, a my bieź jaje nie zmožam». Pra što siońnia havaryli Pucin z Łukašenkam
Łukašenka i Pucin zaviaršyli pieramovy ŭ Minsku. Jak hadami zaviedziena ŭ biełaruska-rasijskich adnosinach u hetym farmacie, infarmacyi pra źmiest pieramoŭ i vyniki — nie tak šmat. Abodva baki, kamientujučy ich, u asnoŭnym abmiažoŭvalisia ci ahulnymi pafasnymi słovami, ci bolš razhornutymi kamientaryjami pa druhasnych pytańniach.
Spačatku delehacyi praviali pieramovy ŭ šyrokim składzie — z Rasii pryjechała šmat vysokich čynoŭnikaŭ, — a paśla Pucin i Łukašenka pajšli pieramaŭlacca adzin na adzin.
Abodva palityki, kamientujučy chod i vyniki pieramovaŭ, uvieś čas padkreślivali, što abmiarkoŭvajuć pieradusim ekanomiku, pastajanna havaryli pra rašučyja praryvy i bliskučyja pierśpiektyvy, nazyvali ličby, na jakija pabolšała supracoŭnictva ŭ roznych halinach. Pucin achvotna razvažaŭ pra supracoŭnictva ŭ kaśmičnaj śfiery i ŭ atamnaj enierhietycy, u jakoj Rasija nibyta dziejničaje navat sa stratami dla siabie, pra efiektyŭnaść dvuchbakovaha supracoŭnictva ŭ zmahańni z zachodnimi sankcyjami.
Łukašenka skazaŭ, što jon zadavoleny vynikami abmierkavańnia z Rasijaj pierśpiektyŭ stvareńnia ahulnaha hazavaha rynku i ŭmovami cenaŭtvareńnia na enierhanośbity na nastupnyja try hady. Što heta za ŭmovy, jon nie ŭdakładniŭ. Cana na haz na nastupny hod dla Biełarusi nibyta budzie fiksavanaj, ale jaje pamier taksama nie nazyvaŭsia. Vonkava Łukašenka sapraŭdy vyhladaŭ zadavolenym.
Pucin dziažurna zajaviŭ, što Rasija nie źbirajecca nikoha pahłynać, bo ŭ hetym, maŭlaŭ, niama metazhodnaści. Łukašenka ž taksama dziažurna skazaŭ, što «Rasija biez nas abydziecca, a my bieź jaje nie zmožam».
Najbolš balučym i intryhoŭnym było pytańnie adnosna pierśpiektyŭ vajennaha supracoŭnictva i mahčymaści aficyjnaha ŭstupleńnia ŭ vajnu Biełarusi razam sa svajoj armijaj. Rabilisia zdahadki, što pieradusim dziela hetaha Pucin i pryjechaŭ. I hetaja tema na pieramovach taksama abmiarkoŭvałasia, toje-sioje prahučała i z vusnaŭ Pucina dy Łukašenki.
Pucin zajaviŭ pra namier praciahvać praktyku sumiesnych vajskovych vučeńniaŭ. Jak viadoma, mienavita padčas takich sumiesnych «vučeńniaŭ», ab praviadzieńni jakich abjavili taksama pierad Novym hodam, i była ažyćcioŭlenaja 24 lutaha ahresija suprać Ukrainy, u tym liku i ź biełaruskaj terytoryi. Akramia taho, havaryłasia pra stvareńnie sumiesnaj vajskovaj techniki i farmiravańnie «ahulnaj abaronnaj prastory».
Taksama Pucin paviedamiŭ, što jon damoviŭsia z Łukašenkam pra padrychtoŭku ekipažaŭ bajavych samalotaŭ biełaruskaj armii,
jakija, maŭlaŭ, užo pieraabstalavanyja dla mahčymaha prymianieńnia bojeprypasaŭ pavietranaha bazavańnia sa śpiecyjalnaj bajavoj čaściu. Havorka tut viadziecca pra jadziernyja zarady. I heta moža być adnym z hałoŭnych vynikaŭ hetych pieramoŭ.
Łukašenka ž adspravazdačyŭsia, što biełaruskaja armija ŭžo, maŭlaŭ, pastaviła na bajavoje dziažurstva pieradadzienyja Rasijaj sistemy S-400 i «Iskander».
Kamientary